Ralhrang CDM Tuah An Tam Tuk Caah Ralhrang Nih Ralrinnak An Pek Cang Hna

SAC ralhrang nih sualnak ngei lo mipi an thahnawn hna cu duh lo in SAC Air- Force in CDM tuahtu an tam tuk cang caah CDM tuah lo ding in ralrin peknak SAC ralhrang nih Signboard ah an taar, tiah theih a si. Naypyidaw, No. 45, Air-Force camp in CDM tuahtu ralbawi le ralkap minung 18 an si cang i cu 18 hna hmanthlak cu an taar i CDM tuah lo ding in ralrinnak an pek hna, tiah theih a si. Naypyidaw, No. 45 Air-Force camp in CDM tuah hmsa bik cu Captain Ye Thu Aung a si i atu ah cun hmunhimnak a phan cang. Credit; The Chin Post

Yangon ramṭhen, Hlaingthaya peng, Industry part 4 Myawaddi Mingyi lam ah a um mi Sunshine kawl thilthuam ṭhitnak factory cu February 28 zingka suimilam 9:00 hrawng ah a kaang. Factory ah hin rianṭuantu minung 500-700 karlak hrawng an um, tiah theih a si. Thilri chiahnak hmun in mei hi aa thok i factory ning piin a kaang dih, tiah a kanghnak pawng um mi pakhat nih a chim.

Meikaang hi suimilam 2 chung ah Meithat zung rianṭuantu nih an thah khawh, tiah cathanh an chuah. Sinte Khua Nih Electric Power An Ngeih Lo Caah Harnak An Tong: Pago ramṭhen, Pyi pengkulh nitlak lei ah a ummi Pangtaung peng (ပန်းတောင်း), Sinte(ဆင်တဲ) khua ah February thla dongh zarh in SAC ralhrang kuttang EPC zung nih nikhat ah Sml 2 hrawng lawng electric power an pek caah khua mi harnak an tong, tiah theih a si.

Sinte khua hi a hlaan ah cun Sml 24 chung mei a ra ko nain atu thla in SAC nih mei an hmih, tiah theih a si. Khuami nu pakhat nih, “Kan khua mei a rat lo nak ni 5 chung a si cang. Caan khel tein mei zong a ra kho ti lo, zing Sml 2 in a ra i zaanlei Sml 6 hrawng ah a mit ṭhan.

Mei man a pe lo mi cu nan mei kan in hmih khanh hna lai an ti caah mi tampi nih mei man an pek nain a caan khel tein a ra hlei lo, hiti a si ding hi thei usihlaw mei man kan rak pe hnga lo!” tiah a chim. SAC ralhrang nih mei an hmihnak a ruang cu EPC zung rianngeitu pawl an hal hna i kan hngal lo an ti, tiah a haltu khua mi nih an chim.

“Mei a mihnak hi kei ka theih ning ahcun Pantaung(ပန်းတောင်း) khua EPC zung bawi pakhat aa ṭhial thok in a si, a hlaan bang electric bill ṭha tein a lak khawh lo caah aa thial. A tubantuk in mei a mih lengmang ahcun electric power bochan in ṭuan mi rian pawl tam tuk rawk lai,” tiah min langhter a duh lo mi pakhat nih a chim. Cu bantuk in Pyi pengkulh peng le khuate hna zong ah SAC ralhrang nih mei man hramhram in an hal hna nain caan saupi mei an hmih khanh hna, tiah theih a si. Credit; The Chin Post