Ralhrang Ceilak An Thi

Karen National Union (KNU) hmunhma Kawthulay hmun chung ah February 1 – 20 tiang ah SAC Ralhrang/BGF phufonh le KNLA/KNDO karlak ah kahdohnak voi 67 a chuak i ralhrang le BGF in 227 an thi i 159 hliam an tuar, tiah KNU nih a thanh. KNU Brigade (1) humhaknak Dotathu pengkomh, Ba-Aan peng,

Ceihthu peng le Tatthung peng chung hna ah ralhrang le an kuttang BGF nih mizapi umnak khuate pawl cu hriamngan in an kah hna, Khuachung ah an lut i phaisa an hal hna, din ei le thilri hramhram in an chuh hna. Ralhrang hriamngan nih minung(civil) 4 a hliamh hna i khuachung mipi cu ramtang ah an zaam.

KNU Brigade 3 Ngianglayopin pengkomh, Kyauhgyi peng, Mong peng le Sawthi peng chung zong ah ralhrang nih rallam an sial caah kahdohnak a chuak i mizapi ral an zaam. KNU Brigade 5 Muhtraw pengkomh, Dweloe peng, Botu peng le Luthaw peng chung hna ah ralhrang le BGF nih khuachung ah nifatin in hriamngan an kah pin ah

Dweloe peng le Luthaw peng ah vanlawng in bomb a thlak i minung 4 an nunnak liam i 14 hliam an tuar; Mizapi cu ral an zaam, tiah theih a si. Ni 20 chung kahdohnak ah KNLA le KNDO lei in ralkap 5 an nunnak liam i 21 hliam an tuar, tiah an langhter. Crd: The Chin Post

Students Union Hruaitu Hlun Ko Min Thway Thit An Thlah Cang: SAC ralhrang nih uknak a laak ni February 1, 2021 ah an rak tlaihmi Students Union hruaitu hlun Ko Min Thway Thit cu nihin, February 24 ah luatnak an pek cang, tiah theih a si. Thonginn in a luat ko nain Ko Min Thway Thit cu pawpi fah, keng fah le Mit fah- zawtfahnak a ngei, tiah a nupi nih Social Media ah a ṭial.

Ko Min Thway Thit cu Ralhrang nih uknak an laak ni bak in an rak tlaih i phungrelnak caang -59 in taza an rak cuai i 2021 December 30 ah khan kumkhat thong tla ding in biaceihzung nih bia a rak khiahpiak. Crd: The Chin Post

Depeyin Gwe Pin Kone Ah Minung 15 An Tlaih Hna: Depeyin khuapi, Gwe Pin Kone (ဂွေးပင်ကုန်း) khua cu ralhrang phu nih nihin February 24 ah khuachung minung 15 cu a ruang um loin an tlaih hna i, minung 3 cu ralkham ah an hman hna. Ralkham i an hman mi pathum chung in minung pakhat cu an thah, tiah Voice of Depeyin i upa pakhat nih Yangon Khit Thit ah a chim.

Cu ralhrang phu hna cu Depeyin khuapi Saipin ( စိုင်ပြင်) khuapi in an rak ra i thazang 30 hrawng an si, Gwe Pin Kone khuachung inn cheukhat cu an hrawh hna i facang pawl le cycle pawl cu an duahpiak hna, tiah theih a si. Khuachung ah lut in khua mi 15 cu an tlaih hna i minung pathum lam hmuhsaktu ah an kal pi hna. Saipin khuapi a um mi meithat zung pawng ah an tlaih mi pathum chung ah pakhat cu a ruak in an hmuh. A thi mi pa cu Gwe Pin Kone khua mi a si i a min cu an thei rih lo, tiah Voice of Depeyin i upa pakhat nih a chim.