Press "Enter" to skip to content

Ralhrang Le MNDAA Kahdohnak Ah Ralhrang 50 Hrawng An Thi (News dang tampi he)

ASEAN Meeting ah ramkhel he pehtlaihnak a ngeilo mi palai lawng cohlan dingmi kongah NUG Cathanh: Tuthla donghlei ah tuahding mi ASEAN meeting ah ralhrang phu cu telnak nawl pek lo in, ramkhel he pehtlaihnak a ngeilo mi palai pakhat cu telnak nawl pek a si lai tiah ASEAN nih biakhiahnak a tuahmi kongah NUG nih ka lungtling tiah nihin October 18 ah cathanh a chuah.

Meeting ah ralhrangbu hruaitu sawm lo ding tii ASEAN nih ramleng vuanci hna nih biakhiahnak an tuahmi hi Myanmar mipi hna temtuarnak le aihramnak kha ASEAN nih a theih cang ti langhternak phunkhat a si.

NUG nih cun ramkhel he pehtlaihnak a ngei lomi timi zawn ah ralhrangbu hruaitu hna lawng si loin ralhrangbu chungtel, asiloah anmah he pehtlaihnak a ngeimi an si sual nakhnga lo le meeting ah sawm dingmi palai cu Myanmar ram le mipi caah thatnak a phurtu palai a si lai maw timi kong ruahpiah chih dingin ASEAN cu a nawl.

Cun Asian nih palai thimnak a tuahnak ah bawmchantu dirhmun in i tel ding ah timhcia kan si peng ko tiah NUG nih cathanh ah cun an langhter. BBC

Mukung, Phawngsai khua ralhrang umnak le MNDAA umhmun thlacamnak tlang in kaphnih fakngai in kahdohnak a chuak, ralhrang lei in minung 50 hrawng an thi: Shan ram thlanglei Mukung peng Phawngsai khua ah ummi ralhrang hna sakhan cu October 18 ni zinglei suimilam 10:00 hrawngah Kukanh MNDAA hna nih luhhnawh in an doh hna caah kaphnih kahdohnak fak ngai in a chuak tiah theih a si.

October17, nizaan zaan ah Kukanh MNDAA hna umhmun thlacamnak tlang cu ralhrang nih an doh hna, asinain ralhrang hna cu a thimi tampi he hnu an tolh than, cun MNDAA lei in minung 5 nih hliam an tuar tiah theih a si.

Khuachung thawngzamhnak pakhat nih “Nizaan ah ralhrang hna cu MNDAA umhmun thlacamnak tlangbo ah an va doh hna, hlawhtlinnak hmu lo in nihin zinglei ah hnu an tolh, ralhrang minung 50 hrawng an thi, an ruak hmamh an char kho hna lo” tiah a chim.

MNDAA umhmun thlacamnak tlang hi hmasa ah cun ralhrang umnak a rak si. September 1 ah KNDAA nih ralhrang cu an rak luhhnawh hna i an umhmun cu an lakmi a si. Cu ka umhmun thlacamnak tlang cu lak than dingah October 7 thok in ralhrang hna nih hriamngan hmang in an kah hna caah kahdohnak a chuah hi a si.

Ralhrang le MNDAA kahdohnak ruangah cuka kiangkap khua in China-Myanmar ramri ah ralzaam dirhmun in in a ummi minung 3000 tluk an si cang tiah Khit Thit Media nih a tial.

Kawlin PDF nih ralhrang sermi Beer tampi a phurtu ke 12 mawtaw 3 an tlaih i beer cu an hrawh dih: Sagaing ramthen, Kawlin peng Shwebo-Myitgyina lam ah ralhrang sermi Myanmar beer, Dagon beer le Adman Gold beer a phurtu kee 12 ngei mawtaw 3 cu October 17 ni ah Kawlin PDF nih an tlaih i beer dihlak cu an hrawh dih tiah Kawlin-PDF nih cathanh an chuah.

October 17 ni ah Shwebo-Myitgyina lam ah Kawlin PDF nih kee 12 ngei motor 3 cu checkhlatnak an tuah, ralhrang ta a simi Myanmar beer, Dagon beer le Adman Gold beer khatten a phorhmi cu an tlaih, Kawlin PDF le Local PDF hna nih ralhrang serchuahmi beer hna cu an hrawh dih, asinine mawtaw khaltu le an mawtaw cu him tein an kalter hna.

A tu lawng si lo in voidang zong ah ralhrang nih a chuahmi thilri cu hrawh lengmang a si lai tiah PDF nih cathanh an chuah.

Suh Kyi le President U Win Myint sihni 4 hna cu biaceihmi kong chim lo dingin an kham hna: Rampi ruahnak petu Daw Aung San Suh Kyi le President U Win Myint i sualpuhnak a chimrel piaktu sihni minung 4 hna cu ramdang palai le media hna sinah biaceihmi kong chim lo dingin ralhrangbu nih an kham hna tiah sihni he a pehtlai mi hna sin in theih a si.

Cuti an khammi hna cu Sihni U Khin Mawng Zaw, Sihni U Tee Mawng Mawng, Sihni Daw Min Min Soe le Sihni Daw San Malar Ngyunt an si.

Ralhrangbu nih sihni U Khin Mawng Zaw phihkham nak ca an chuahmi chung ah ramchung, ramleng thawngzamhnak, ramdang palai, INGO/NGO le ramdang cozah riangeitu hna sinah pehtlaihnak tuah lo ding tiah an langhter.

Ralhrang phu nih nawlngeihnak an lak hnu ah tlaihkhih a tongmi hna cu rikhiahnak um lo in luatnak pek an si, hmunkip in tazacuai a tongmi minung 4000 leng an case an phih piak hna: Ralhrangbu nih hramhram nawlngeihnak an lak hnuah lamzawhnak ah a telmi hna cu an tlaih hna i thonginn kipah khumhmi minung 1316 cu luatnak pek nan si lai tiah SAC ralhrang hruaitu Min Awng Hlaing nih October 18, tuni a biachimnak ah a langhter.Luatnak pekmi hna nih zulhphung zul loin sualpalhnak a tuah than ahcun a fak deuhmi dantatnak pek a si lai ti zong a chimchih fawn.
Cun lamzawhnak kong he pehtlai in tazacuai a tongmi hna zong an case phihkhar piak an si lai tiah a chim chih. Ramchung hmunkip in tazacuai a tong mi hna dihlak hi minung 4320 an si, cu hna i an case hlathlai le biaceih liomi (ကြားနာစစ်ဆေးဆဲပြစ်မှုဆိုင်ရာအမှု) cu phihpiak an si tiah ralhrangbu hruaitu nih cun a chim.

October 18 tuni chunhnu ah ralhrangbu chairman nih a cunglei bantukin a chim hi a si. Ramkhel thiamsang hna nih cun ASEAN meeting ah sawm lo dingin biakhiahnak an tuah hnuah a lungput a thumh deuhmi a si tiah an chim.

Sagaing ramthen ah ralhrang nih PDF nan si tiin misawhsawh 8 nak tlawmlo an thah hna: Sagaing ramthen ah ralhrang hna nih PDF nan si an ti hna i misawhsawh 8 nak tlawmlo cu an thah hna tiah theih a si.

Sagaing ramthen, Satawng khua pawng ah October 17, zinglei ah ralhrang le khuachung mi hna hmaitonh kahdohnak a chuak, cu kahdohnak ah cun PDF tiah min bunh piak in Ko That Zaw Awng ( Sagaing Technology University sianghngakchia) le Ko Zaw Myo Ko Ko cu an kah hna, cun khuami pakhat zong ralhrang nih an kah hnuah a hliamhma he mei an khangh tiah theih a si.

Cun October 15 ah Ayardaw peng Parami khua le Cia-pin-hlah khua kar ah ralhrang hna cu bomb hmanh in doh an ton hnuah, khuachung mi pahnih Ko That Naing Oo le U Ma Ya cu ralhrang nih an tlaih i an thah hna tiah theih a si.

Cun Shwebo peng Ngawngkai khualu ah October 12 ni ah ralhrang nih luhhnawh in doh an ton caah khauchung mi pahnih an nunnak a liam. October 11 zongah Sagaing ramthen Kyawngdawgyi (ကျောင်းတော်ကြီး) khua ah Ko Awng San Win tel in khuachung mi pali hna cucu hriamnam he kan tlaih hna tiah ralhrang nih an chim.

By. Anna Par

Be First to Comment

Leave a Reply

Your email address will not be published.