Press "Enter" to skip to content

Ralhrang nih an kah hna

Yangon Mayankung(မရမ်းကုန်း) peng no.3 sangah ralhrang uk duhlo langhter in lamzawhnak a tuahtu mino hna cu SAC ralhrang nih nizan February 25 ah kalhnawh in an kah hna caah mino pakhat a nunnak a liam, minung 2 nih kuan hliamhma an tuar, tiah khua mi nih an chim. Leirawtu thawngpeknak ruangah SAC ralhrang hna cu mino lamzawhnak hmun ah an phan i, lam aa chok sawh mi mino 4 zong a ruang um lo in an tlaih hna, tiah theih a si.

Cun, Yan-Kin peng no.13 sang Mukawng (မိုးကောင်း) lam ah nizaan February 25 zinglei suimilam 9:30 hrawng ah ralhrang uk duh loin lamzawhnak a tuahtu mino hna cu ralhrang phu nih lampi ah an ton hna caah minung pakhat an tlaih, tiah khua mi nih an chim.

Magway ramṭhen Chaut(ချောက်) peng, Shwepungtawng ah SAC ralhrang phu hna nih a luancia February 21 zanlei suimilam 5:00 hrawng ah kum-15 hrawng ngakchia 20 leng cu ralhrang nih an tlaih hna i, rallam tarhnak ah an hman hna leng ah an chiatha ah kuakci mei an nawn hna i an hrem tuk hna caah an nun ca ah thinphang a si, tiah Magwe dohthlengtu committee phu sin in theih a si. Tlaihkhih a tong mi hna chung cun nu 5 zong an i tel, tiah theih a si.

February 21 ah mino hna nih ralhrang uk duh lo cawlcanghnak sticker campaign an tuah. Cu duhlonak a tuahtu hna cu ngakchia kum tling lo mino tete tang 8,9 siangngakchia hrawng deuh an si hna, tiah theih a si. SAC ralhrang tlaih a tong mi ngakchia hna cu thluak lei le taksa lei ah fak tuk in hrem an ton caah an nun ca zong ah thinphang tuk an si. Tlaihkhih an tonnak ni 5 hrawng a si cang i, atutiang pehtlaihnak kan tuah kho rih hna lo,” tiah khua mi nih an chim. Credit: The Chin Post

Sagaing ramṭhen, ShweBo peng NgapihOo(ငါးပိအိုး), Khaipin(ဂွေးပင်) le Hnamah-sayit (နှမစားရစ်) khua hna cu February 24 zanlei le 25 zinglei ah SAC ralhrang nih hriamngan in an kah hnu ah mei in an khangh, tiah ShweBo thawngzamhnak nih an thanh.

“Zaan Sml-10 luan in ralhrang nih hriamngan in khua cu an kah i khua mi pawl an zaam. Zinglei ah Hnamah-sayit (နှမစားရစ်) khua cu mei in an khangh leng ah hriamngan in an kah ruangah nu pakhat a nunnak liam. Khuachung i kan luh ngam rih lo caah inn pazeizat a kangh ti hi kan hngal kho rih lo tiah,” khua mi pakhat nih a chim.

February 24 zaan ah inn 200 hrawng umnak NgapihOo khua cu a khua ning ti awk in a kaang i khua mi dihlak in an zaam. Cun, Kuaipinkung khua zong a kaang cuahmah rih, tiah theih a si. Hriamngan a kaptu le mei a duahtu SAC ralhrang hi Tilung (သီးလုံး) khua ah umhmun khuar mi an si. Seihkhun(ဆိပ်ခွန်) khua zong ah SAC ralhrang nih umhmun an khuar caah khua mi an zaam hna, tiah theih a si.

Cubantuk in ralhrang nih ruahlopi in an luhhnawh ruangah NgapihOo, Hnamahsayit khua pawl leng ah Maungtat(မောင်းတက်), Ungpoh(အုန်းပေါက်), Tekung(သဲကုန်း), Yawtitkung(ရွာသစ်ကုန်း), Kangyikung(ကန်ကြီးကုန်း), Takanta(တကံသာ), Segyi(ဆည်ကြီး), Cucia(ကြိုးကြာ) khua hna in khua mi minung 5000 leng an zaam, tiah ShweBo thawngzamhnak nih a thanh.

Shwebo, Ah Phyo-saw-thi Pakhat Mipi Ralkap Nih An Fimtawl: Sagaing ramṭhen, Shwebo peng nichuah ah a um mo Kwekone khua ah Pyo-Saw-Tti, sanguk bawi U Htun Htun Oo le Uu Myint Than cu Shwebo Defense Force, Ghost rider, BERMESE DRAGON FORCE le Shwebo Yam Belu(ယမ်းဘီလူး) i bawm in an fimtawl hna i meithal pahnih an laakpiak hna, tiah nizan February 24 ah Shwebo Yam Belu nih cathanh an chuah.

Nihin February 25 zingka suimilam 11 ah Kwekone khua lei ah rallam sial in a ra mi ralhrang le Pyo-Saw-Tti phu pawl cu Ghost Rider phu nih bomb 9 in an puah hna i ralhrang 35 nak tlawm lo an thi kho, ralhrang motor 1 zong a kaang i a rawk, tiah Ghost Rider sin in theih a si.

“Nizan ah Pyo-Saw-Tti pawl kan fimtawl hna. Cu ruangah Pyo-Saw-Tti dang pawl cu SAC ralhrang nih an va auh chap mi hna a si lai ti in kan ruah,” tiah Ghost Rider rianngeitu pakhat nih a chim. Bomb an puah hna hnu ah SAC ralhrang nih meithal le hriamngan in an kah ve hna i, hnulei an kir pah ah mipi vengtu ralkap Maya(မာယာ) an khen i a nunnak a liam, tiah an cathanh ah cun an langhter. The Chin Post

Be First to Comment

Leave a Reply

Your email address will not be published. Required fields are marked *