Sagaing ramṭhen, Salingyi (ဆားလင်းကြီး) peng, Ngawngpingyi in a chuak mi SAC ralkap motor 3 cu Dawngmin(ဒေါင်းမင်း) phu nih pa-de-ta bomb lung 12 in an puahhnawh hna caah a thi mi le hliamhma tuar an tam, tiah tualchung hriamtlai phu hna nih an thanh. SAC ralkap pawl bomb puahhnawh an ton hi nihin May 11, zinglei suimilam 8:00 hrawng a si i, an motor 3 cu tualchung hriamtlai phu pawl nih bomb an hmanh mi an i lamh caah.
A thi mi zong an tam, sinain ralkap zeizat dah an thih cu fiang tein kan thei rih lo, tiah Chindwin Yoemah (ချင်းတွင်းရိုးမ) phufonh nih an thanh. “Nizan le nihin zinglei ah SAC ralkap a thi mi hi 20-30 kar cu an si lai,” tiah Yinmapin tualchung hriamtlai pah-kah-phah phu chungtel pakhat nih a chim. May 10 zaan, Pale kahdohnak ah SAC ralkap nih motor 7 an thlah hna i, cu motor hna cu tualchung hriamtlai phufonh nih pa-de-ta bomb lung 8 an puahhnawh hna caah motor 3 a rawk i, a zat fiang te chim loin ralkap zeimawzat an thih kong an thanh fawn.
Myaung Le Yesakyao Kahdohnak Ah SAC Ralkap 14 An Thi: Sagaing ramṭhen Myaung peng in Magwe ramṭhen Yesakyao peng ah rallam sialtu SAC ralkap hna cu tualchung hriamtlai phu hna nih voihnih tiang bomb an puahhnawh hna caah SAC ralkap 14 an thi, tiah MGN 35 pah-kah-phah sin in theih a si. SAC ralkap voikhatnak kah an ton cu May 3 ah khan a si i, Myaung peng Nabatsanpiah(နဘက်စံပြ) khua le Tawnggyi(သောင်ကြီး) tualchung hriamtlai phu hna nih an rak kah hna.
Cu kahdohnak ah cun SAC ralkap 9 an thi i, midang 7 nih hliam an tuar. SAC ralkap hna sin in bomb le kuan zeimawzat lengah a herhmi catlap(document) an laak, tiah theih a si. A voihnihnak kahdoh an ton cu May 7 ah a si i, Myaung peng le Yesakyao peng kar ah um mi khua hna khaang ding ah a kal mi hna cu tualchung hriamtlai phu hna nih zinglei suimilam 9:00 hrawng ah pa-de-ta bomb lung 3 in an doh hna. Cu kahdohnak ah cun SAC ralkap 5 an thi i, 9 hliam an tuar, tiah theih a si.
SAC bomb puahnak ah cun MNG 35 pah-kah-phah phu, The value of Young man (Tawngta), Myanmar Fighting Defense le Hnalung Hlah Lu Mait Gyi (နှလုံးလှလူမိုက်ကြီး) phu hna an i tel, tiah MNG 35 pah-kah-phah phu nih an thanh. SAC ralkap nih Yesakyao peng khua 9 cu meikhangh in an hrawhpiak hna caah mipi hna cu a himnak hmun ah an zaam hna, tiah theih a si.
Thawai, Myatta pengchung um mi Kinpunchung(ကင်ပွန်းချုံ) khua pawng ah, nizaan May 10 zaanlei ah khan tualchung hriamtlai phu hna le SAC ralkap kahdohnak a chuak i, kahdohnak ah SAC ralkap pakhat a thih lengah meithal pakhat le kuan zeimawzat kan lak khawh, tiah Eastern Defense Force(EDF) nih an thanh. Kinpunchung (ကင်ပွန်းချုံ) khua le Bawinpin(ဘဝပင်) kar um mi SAC ralkap sakhan cu nizaan May 10 zaanlei suimilam 3:00 hrawng ah tualchung hriamtlai phu hna nih luhhnawh in an kah hna i kahdohnak ah cun SAC ralkap 2 zong hliam hma an tuar, tiah theih a si.
“Kanmah Eastern Defense Force-EDF lei hliam tuar um lo in hnu kan tolh kho. SAC ralkap nih hriamngan le hriamhme in minutes 20 hrawng cu an duhnak hmun poh an kah ruangah phung-ki sianginn chung ah cu hriamngan cu a puak i, minung pakhat a nunnak a liam, phung-ki pakhat zong hliamhma a tuar ve. SAC ralkap hriamngan kahnak ruangah khua mi nunnak a liam cu kan ngaih a chia tuk hringhran,” tiah Eastern Defense Force-EDF Nih nihin May 11 ah an thanh.
Kahdohnak ah cun meithal pakhat leng ah kuanbawm 4 le kuan 219 kan lak khawh, tualchung hriamtlai phu lei cu hliam tuar um lo in hnu kan tolh kho, tiah EDF nih cun an thanh. Kuatkhai, SAC Ralkap le MNDAA Kahdohnak Ah SAC Ralkap 4 An Thi: Shan ram thlanglei Kuatkhai (ကွတ်ခိုင်) khua SAC ralkap hna le Kokang MNDAA hma cu May 8 ah khan a i kap i SAC ralkap 4 an thih lengah midang 7 nih hliamhma an tuar, tiah The Kokang media nih an thanh.
SAC ralkap hna cu Kuatkhai (ကွတ်ခိုင်) pengchung MNDAA hmunhma pakhat ah rallam an sial caah Kokang hriamtlai phu nih rak bawh in an kah hna, tiah theih a si. Kahdohnak cu May 8, chunhnu suimilam 3:30 in 4:25 tiang, suimilam pakhat hrawng an rau i, cu kahdohnak ah cun MNDAA lei hliamhma tuar an um lo, tiah The Kokang media an thanh. The chin Post
Be First to Comment