Press "Enter" to skip to content

Ralkap nih NLD chan Ministers le an chungkhat pawl Bank tangka chekpiak, Chin Ramkulh Ministers hlun nih an thei lo

Ralkap nih NLD chan Ministers le an chungkhat pawl Bank tangka chekpiak, Chin Ramkulh Ministers hlun nih an thei lo
===================================================

Ralkap nih nawlngeinak a lak February 1 in nihin tiang Ministers le an chungkhat pawl Bank tangka taang zat an check mi cu Chin Ramkulh Cozah Ministers hlun hna nih February 17 chun tiang ah an thei lo. Hihi February 16 ni ah Ralbawi pakhat minthut in Ralkap Runvennaklei Phu nih pumpak nih ngeih mi Bank Managers hna sin ah ca an kuat.

An cakuat ah, “February 1 in nihin tiang Ramkulh le Ramthen Ministers hna le an chungkhat pawl an bank chung tangka taang mi zat thanhpiak ding, hi karlak ah bank account dang a ser i tangka a thial mi an um ahcun langhter ding, an chungkhat a si mi hna an min, an hmatpungtin he kuatchih ding in na kan bawmh naklai kan in nawl,” tiah Ralbawi pakhat minthut in Ramkulh le Ramthen um pumpak bank Managers hna sin ah ca an kuat.

“Hi kong hi February 17 zing ah khan minung pakhat nih biavaivuan phun in a ka chimh tak ve. Asinain, kanmah nih cun kan hngal bak lo. Bank tuanvo ngeitu nih an hngalh lai cu,” tiah Social Affairs Minister hlun Pu Pau Lun Min Thang nih The Hakha Times ah a chim.

Hi kong ah Agriculture, Livestock, Forestry and Mines Minister hlun Pu Mang Hen Dal nih, “Kei cu zeihmanh ka thei lo. Atu kan umnak Minister’s Housing (Vuanci Inyar) hrawng hi Wifi zong kan hmang kho lo. Internet line peh le facebook hon zong kan thiam lo tik ah zeihmanh ka thei lo. Kanmah Hakha khua chung thil cang hmanh kan thei kho lo,” tiah The Hakha Times ah a chim.

Khit Thit Media nih a langhter ning ah, “Atu ralkap nih an kan fial mi hi Bank pakhat nih customer pakhat i a sining, tahchunhnak ah tangka taang zat le an min, hmatpungtin tibantuk cu chim phung a si lo. Central Bank nawlpeknak zong a si fawn lo. Cun, Central Bank in nawlpeknak a rat hmanh ah kanmah Bank cio i Board of Director nih an ceih rih ding mi a si. An thil tuah mi hi mi sual an kawl i ramkheel mit in zoh ahcun an sining le dirhmun tangthlak an duh hna bia a si,” tiah pumpak Bank pakhat in Assistant Manager pakhat nih a chim,” tiah an facebook cahmai ah an langhter.

Crd: The Hakha Times

Be First to Comment

Leave a Reply

Your email address will not be published. Required fields are marked *