Ralzaam Hngakchia Caah Laipa Tthawng Rung Lian Ceu Nih Phaisa Tam Taktak A Hlut

Rung Lian Ceu nih ralzaam hngakchia hna caah USD$500 a hlut! 2022 March 5 – Lai paih Champion hlun Rung Lian Ceu nih Chin ralzaam hngakchia sianginn kainak caah tiin USD$500 a lut tiah Olivia Nu Cinzah facebook page cahmai nih March 5 ah a langhter. Credit; The Chinland Post

Hramhram uknak a latu cozah he ramkhel lei biaruahnak kan ngei lo tiah AA nih a chim. 2022 March 5 – Arakan Army (AA) nih remdaihnak kong siseh, ramkhel lei siseh hramhram uknak a latu cozah he biaruahnak kan ngei lo tiah ralhrang le AA remdaihnak kong he pehtlai in biahalnak ah an tuah lio ah a chim.

Mipi nih thimmi phungning cozah he lawng ramkhel lei biaruahnak kan ngei lai tiah AA in biachimnak nawl a ngeitu Khaing Thukha nih a chim. “Kan duhmi pungsan a si lo cun ramkhel lei biaruahnak cu a tlamtling lo. Remdaihnak kong biaruah cu kahdaihak kha a si ko.

Ramkhel lei biaruahnak cu phungning cozah he lawng i ruah ah a tlamtling lai. Phungning cozah kan timi cu mipi duhnak he aa khatmi phunghram ṭha te he mipi a ukmi kha a si. Cucaah, hramhram uknak a latu cozah he ramkhel lei biaruahnak kan ngei lo” tiah a chim.

AA le ralhrang karlak ah phungning a simi hnatlaknak zeihmanh a um lo. Zei bantuk hnathlaknak minthut hmanh a um lo tiah Khaing Tukha nih a chim. AA le Kawl ralkap karlak ah 2018 thokin 2020 thimnak lai te tiang kahdohnak a chuak. Thimnak a dih hnu ah kaphnih theihthiamnak in kahdohnak an dihter hi a si.

A luancia thla chungah, Maungdaw hmunhma lei ah AA le Kawl ralkap karlak ah kahdohnak a rak chuak i kaphnih in thihlohnak a um nain a tu ahcun kahdohnak um ti loin a daih liopi a si. Ref: Western News, The Chinland Post

Ukraine le Russia karlak ah a voikhatnak bik kahdaih hnatlaknak an ngei. 2022 March 5 – Tlanglei Ukraine ram ah a ummi Mariupol’ le Bonarka khua hna ah chikhat kahdaihding in ram hnnih ningin hnatlaknak an ngei.

Mah khua pahnih karlak ah a tapimi mipi pawl khamh le chuahter hmasa dingah a voikhatnak bik kahdaihding in hnatlaknak an ngeih hi a si.
Mah hnatlaknak an ngeih hlan ah mah khua ah ummi mipi pawl bawmhkhawhnak lam ka serpiak lai tiah Russia Minister of Defense nih a chim.

Asinain, Ukraine ram a dang khua pawl ahcun bom in kah an tong peng rih ko. A tubantuk remdaihnak an tuah hi Ukraine caan zinglei 11:00am hrawng in aa thok i sml pakhat chungah mah khua hnih i mipi hna chuah an si lai tiah BBC nih a langhter. The Chinland Post