Press "Enter" to skip to content

Ram Le Miphun Caah A Nun A Petu CNA Paraltha

Miphun Le Ram Caah Nunnak Liammi CNA Ralkap. November 6.2021 Thantlang khua kahnak ah CNA in Trainer Soe Lin Naing a nunnak aliam, minung pahnih hliam an tuar tiah kan theih.

Ralhrang lei in thi le hliam zat theih asi lo, ralhrang hriam in Thantlang ah inn 7 hrawng akang chap tiah kan theih. The Federal Times

Relchap; Minung hi a chia tukmi dirhmun ah kan dir caan le a fak tukmi harnak kan ton caan ah chuah chan ngei lo mi vanchia ah kan i ruat i hi vawlei hi chuahtak kan duh tawn. Na tonmi harnak ruangah mah bantuk thinlung na ngei bal maw? Viktor Frankl tuanbia te hi rel ve tuah.

 

Kum 1942 ah ralpi voihnih nak aa thok i German ralkap pawl nih Austria ram cu an lak. Mah ram i a ummi Judah miphun pawl kha an tlaih hna i an thilri an chuh hna. An tlaihmi Judah miphun pawl cu Europe ram i thonginn ah an kuat hna. Rianhrang an ṭuanter hna, rian a ṭuan kho ti lomi poah an thah hna. Cuti i an tlaihmi hna lakah Austria ah a ummi Judah miphun lungthin lei siibawi Viktor Frankl le a chungkhar zong an i tel ve.

Thonginn pakhat hnu pakhat an ṭhial hna i a donghnak bik ah Poland ram i Auschwitz Concentration Camp ah an kuat hna. Auschwitz thonginn cu ralpi voihnihnak lioah German ralkap hna nih a fak bik in mi an hremnak a si, tiin min a thangmi a si. Judah miphun thongtla pawl cu thih dawnte lawng rawl an pek hna i din lo bakin rian an ṭuanter hna.

Rian a ṭuan kho ti lomi poah meithal in an kah hna. Tarnu le tarpa hna kha caw le rang bangin inn chungah an khumh hna i sii ṭhalo in an thah hna. Ngakchia tete cu German siibawi pawl nih hihsii chunh ta loin an nun buin an hlai hna i an chungril an chuah hna. Judah miphun tam tuk thah le nawn an rak tong.

Viktor te chungkhar Auschwitz an phak tlawmpal ah hringtu a nu cu inn chungah sii ṭhalo in an thahmi hna lakah aa tel. A nupi cu rianhrang a ṭuannak ah malaria in a zaw i a thi. Viktor zong cu thonginn pawng i lungkhur cawhnak ah rian a ṭuan lioah German ralkap nih meithal an kah i fak ngai in an hliam. A farnu pakhat tu cu thong chungah thi loin ral a dih hnuah nungdam in a chuak.

Viktor dirhmun ah dir tuah usih. A chungkhar an thi dih cang, a nupi zong a thi cang. Amah zong thonginn chungah nifatin tuk le hrem a tuar. Khuasik lakah hnipuan loin concrete cungah an ihter, rian an ṭuanter. German ralkap nih meithal kuang in an tuknak ah a tak pum dihlak hma-neh in a khat. Mahti a tuar hi nikhat lawng a si lo, thlakhat lawng a si lo, a kum in a si. Minung a si ve bantukin lungdongh tuk ah amah le amah thah duhnak a ngei. Nikhat cu hma le rung he a ih ko lioah a lung chungah ruahnak pakhat a hung lut. Cucu “Atu ka tuar-in nak chungin luatnak lam a um ti lo maw” ti hi a si. Amah le mah cu hitihin bia aa let.

“Asi, ka takpum caah cun luatnak lam a um ti lo. German ralkap nih an ka hremning poah in tuar kha a si ko, anmah leh ve khawhnak hriamnam ka ngei lo. Sinain duhthim khawhmi pakhat ka ngei. Cucu ka thinlung zalennak a si. Ka thinlung hi keimah ta a si, an ka chut kho lo. Ka taksa lawng hi an hrem khawh lai, ka thinlung cu a hrem cu chim lo a tawngh hrimhrim an tong kho lai lo” tiin.

 

Mah hnu cun German ralkap nih zeitluk fak in an hrem zongah dai tein a intuar khawh. Zaan a hung chuah tikah a chungkhar he nuam tein khua an rak sak lio caan kha a ruat i nuam tein a it. Chun i tuk le hrem an tuarmi vialte nikhat khat ah cauk in chuah dingah a thinlung in aa chinchiah hna. German ralkap nih a taksa cu an hrem khawh nain a thinlung cu an hrem kho lo, a zalen i nuam tein a um.  By. Salai CP Lian (CEO of The Chin Post)

Be First to Comment

Leave a Reply

Your email address will not be published.