Press "Enter" to skip to content

Ramkulh Ngandammnak Zung nih riantuantu an duhlo bu in minthutter a timh hna, tiah thawngpang a leng

Ramkulh Ngandammnak Zung nih riantuantu an duhlo bu in minthutter a timh hna, tiah thawngpang a leng
==================================================================================

Ralkap nih nawlngeihnak a lak hnu ah Chinram Cozah riantuan dihlak deng cu an rian an chuahtak hna i an pule nih zung kai than ding an forhfial hna, Ngandamnak Zung lei zong nih duhlo bu in an min thutter an timh hna, tiah February 16 ah kan theih.

Hi kong ah min langhter lo mi pakhat nih, “Kei hi Malaysia ah ka um. Malaysia bak in ka vun in chawnh. A ruang cu ka naule hi Ngandamnak Zung ah riantuan mi an si i anmah nih an in chim ngam hna lo. Atuletu phone an chawnh hna. Min rak thu u, an ti peng hna. Cun, NLD Cozah kai than hmanh sehlaw rian nan hmu ti lai lo, tibantuk in an tlerh hna,” tiah The Hakha Times ah a chim.

Cun, Chin Ramkulh Ngandamnak Zung lutlai Dr. Aung Ngwe San nih amah minthut in February 15 ah Hakha sii-inn-uk cu zung riantuantu min cazin pawl pek ding in thawng a thanh. Hi kong ah Sii-inn-uk Dr. Mang Biak Kung kan chawnh tik ah, “A ruah awk bak ka hngal kho ve rih lo. Amah Dr. Aung Ngwe San si lo le tuanvo ngeitu lawlaw chawn hna ulaw a fiang bik ko lai,” tiah a kan leh.

Hi kong ah Dr. Aung Ngwe San cu phone kan chawnh len nain a tlai lo. Cun, Amah Dr. Aung Ngwe San changtu a si mi Assistant Director Dr. Sharon Par nih, “Keimah cu CDM ah aa tel mi Ngandamnak Zung riantuantu pakhat ka si. Khun (leave) zong ka hal lo. Zung zong ka kai lo. Zungkai mi cazin le khunh hal mi cazin ah ka min a um ahcun keimah duhnak le lungtlinnak a si hrim lo (hrimhrim lo),” tiah a facebook cahmai ah a langhter.

Zung kai than ding kong he pehtlai in February 15 ah Chin Ramkulh Cozah Chuangtuan (Secretary) U Toe Win nih Ramkulh, Pengkomh le Peng lutlai deuh meeting a auh hna i Cozah riantuan vialte Zung kai than dih ding kong meeting an tuah, tiah kan theih. Asinain, “Nusal pasal pei kan si cu. Kan chuak cang. CDM ah kan um. Zung kan kai ti hrimhrim lai lo. Kan duhlo bu cun zeitihmanh in an kan hne kho fawn lai lo,” tiah min langhter lo mi pakhat nih a rak chim bal.

Crd: The Hakha Times

Be First to Comment

Leave a Reply

Your email address will not be published. Required fields are marked *