Rev. Dr. Thlaawr Bawihrin Nih USA Um CBCUSA Chungtel Sinah Thawngthanhnak Biapi Taktak A Tuah
Bawi Khrih ah miphun hawi hna, Vawleicung ram kan zoh tikah ralkap ukmi ram cu a si a fakbimi bik le fimthiamnak a niam bikmi ram an si dih. Asiana ram ah ram rumbik asimi Kawlram cu 1962 in Ralkap uknak ruangah vawleicung ah sifakbik ram ah a cang. 1988 in vawleicung fimthiamnak a niambik ram ah an ser. Tlangcungmi nunphung, holh le ca an hrawh. Tlangcungmi cihmih in Bamami (Burmanization) siter timh asi. Ralkap uknak cu ram thanchonak le fimthiamnak zeihmanh a tuaktan lomi, next generation caah fimthiamnak hrawktu le anmah power hmunhnak ca lawng rian a tuanmi an si. Luak cangmi ei than dingah ralkap Min Aung Hlaing le hawikom nih Kawlram uknak cu February 1, 2021 ah hramhram le sining lo in mizapi sin in an lak.
Ralkap uknak duhlonak langhternak ah Kawlram mipi an colcanghnak cu hmuh dih asi. Hriamnam in dirhhnawh siloin, Civil Disobedient Movement (CDM), nemnak nonviolence colcanghnak zong tampi hmuh asi. CDM ruangah kan phunhawi tlaihkhih, hrocer le an rian in dinhter an si ti zong kan theih. Ralkap uknak hrawk in mizapi thimmi nih ram uknak ngeih dingah, miphun le ram kong ruat in duh lonak a langhtermi Cozah rian a tuanmi hna harnak a tongmi hna bawmh channnak caah CBCUSA Khrifabu kip nih thlacamnak in, chawva in, ruahnak peknak in tel ve dingin Board of Director nih lakhruak in biakhiahnak kan ngei.
Cucaah CBCUSA chungtel Khrifabu nih nan sikhawhnak cio in bawmhchanhnak pek dingah kan in nawl hna. Bawmhnak poah cu CBCUSA office ah March 31, 2021 hlan ah kuat asi lai. Chin miphun an tuarnak, kan tuarnak, an dohmi hmuitinh, kan hmuitinh, Democracy ram sinak caah miphun le ram caah sining chuah cio dingah kan sawm hna. Bawipa nih CBCUSA le Chin miphun thluachuah pe chin ko seh. Nan tuan hawi, Thlaawr Bawihrin (General Secretary) CBCUSA, 7216 US 31 South, Indianapolis, IN 46227, (317) 402 7233.
