Press "Enter" to skip to content

SAC Nih Thongtla An Thlahmi Hna Kongah Hmuhning

Oct 18, 2021 ah SAC nih nawlngeihnak an lak ni in an tlaih i thong an thlakmi ramkhel thongtla 5000 renglo an thlah hna. Cu chungah NLD hruaitu minlang hna zong an i tel. Minthang dangdan zong an i tel hna. SAC nih atu bantukin ramkhel thongtla tampi a thlahmi hna hi zeiruangah dah a si? Zeibantuk lungput he dah a thlah hna? Dawtnak lungput in maw a thlah hna? Asiloah mahca thatnak ruat in dah a thlah hna? Hi kongah kan Chin hruaitu hna sinah an hmuhning kan hal hna tikah a tanglei bantukin an kan leh.

“Remkhel thongtla an chuahmi hna cu kan i lawm ko. Kan i lawm ti tikah a chuahtu SAC cungah kan i lawmh khi a si lo, a chuakmi hna kan lawmhpi hna tu khi a si. Zeiruangdah dah SAC cungah kan i lawmh lo? An tlaih lo dingmi kha an tlaih hna i cucu atu an thlah than hna. An tlaih lo dingmi an tlaih hna i an thlah thanmi hna cu an cungah lawmhnak ding a um lo. Cun an thlah rih lomi hna tampi an um rih. Hitlukin sualnak a ngei lomi mipi an kan hrem, an kan thah an kan nawn ruang i kan lungfahnak hi ramkhel thongtla zeimawzat a thlahmi nih a damter kho nemmam lo. Cu pinah thongtla hna cungah dawtnak a ngeih caah a thlahmi hna zong a si lo. ASEAN ah mithmai tha hmuh a duh caah a si ko”.

A cunglei bia hi Salai Bawi Lian Mang nih a hmuhning a chimmi a si. Salai Bawi Lian Mang cu kan theih cio bantukin Chin Human Right Organization (CHRO) a dirhtu le atu tiang Excutive Director in a hruaitu a si. Hlanlio tein Chin miphun nih kan tonmi namnehnak, sersatnak le nunhrin covo buar piaknak kong vialte vawleipi theih in a phuangtu le aupitu a si. Vawleicung ram hruaitu tampi he kan Chin ram le miphun kongah aa tong i bia aa ruahmi a si.

“Kan unau an chuahmi cu kan i lawm. Asinain an chuah hna ruangah SAC cungah lawmh ding zeihmanh kan ngei lo. A tlaih hrimhrim an rak tlaih hna ding khi a si lo. An tlaih cia mi hna zong an thlah dih hna ding a si. Sualnak ngeilomi an tlaih hna i an hrem mi hna ca zongah phulei kan cham rih lai. An thlah nakhnga a ruang cu UN pi nih siseh ASEAN nih siseh SAC an cohlan ti lo tikah a lau i vawlei pi hmai ah SAC nih a hmaiah tlawmte a kut a hun i tawl khi si ko. A hlei in amah umnak a chungkhar a simi ASEAN nih chungkhar in an hlawt tikah tu hi fapa tlau dirhmun a phan. Mah ruangah hihi ASEAN hruaitu le mizapi hmai ah thian a hun i chehnak sawhsawh a si ko tiah ka ruah”.

Hihi Salai Ngun San Aung nih a hmuhning a chimmi a si. Anih hi CDF-Hakha ah information department tlaitu a si. Ram a buai hlan tein ram le miphun caah a cawlcang pengmi a si. Ram a buaika i Hakha lamzawhmi hna palek nih kah an rak timh hna lioah mipi cu kap hna hla u, nan duh ahcun keimah tu hi ka kap u tiah raltha taktak in a ti ngamtu a si.

“Anmah ralkap nih atu bantukin thawngtla pawl hi an chuah tawn ko. Tutan zong hi NCA kum 6 tlinnak ni ti in a chuakmi hna a si. NCA hi fehter a duhnak zong a si. Cuhlei ah international presure (ramkip hneknak) a um tikah ramdang mithmuh le mipi nih ka zumh hna seh ti a duh caah a si tiah ka hmuh”.

CNF chimnak nawlngeitu Salai Htet Nih nih cun a cunglei bantukin a hmuhning a chim ve. Anih hi Chin mipi nih CNF/A biatak tein kan dirkamh hna hlan pi, phundang cun CNF/A harsa le chambau tuk in an um lio khan kan ram le miphun caah lungsau tein rian a tuanmi a si. Camp Victoria ah um in a naule pawl a zohkhenhtu a si.

“Aw… hihi cu ASEAN nih a ra laimi 26-27 Summit meeting kai lo dingin pressure an pek caah cucu a celh lo i a phungmen tein a tuah bia si ko lo maw. ASEAN nih phun 5 in zulh ding tuanvo an pek i cucu pakhat hmanh a zul kho lo. Cu chungah cun hi ramkhel thongtla pawl chuah dih ding hi ai tel. Suu Kyi thlah ding tepawl kha a tuah duh lo caah atu bantuk in number tam nawn in zohco dingin a thlah ko hih. Lunglawmh awk zeihmanh um lo. Ramkhel thongtla zong a chuah dih hna lo. Cun a thlah hna i cheukhat cu inn an phanh bak ah a tlaih than hna tiah theih a si. Hnangam awk a tha lo”.

Salai Ceu Bik Thawng hmuhning a si. Anih hi kan theih cio bang miphun dawtnak lungput (Chin Nationalism) a ngei bakmi a si. CNLD ah General Secretary a rak tuanmi a si. Rambuai hnuin ram lei miphun caah i pek a duh caah a rian chuahtak in ramri leiah a kal vemi a si. Kawlholh in chuahmi Federal Journal a chuahtu zong a si. By. Salai CP Lian

Be First to Comment

Leave a Reply

Your email address will not be published.