Myaung Peng Ah Sniper Kahnak In SAC Ralkap 3 An Thi, Chaung U peng Kyauk Sit Kaan (ကျောက်ဆစ်ကန်) in Myaung lei ah a lut mi SAC ralkap hna cu PDF phuli fonh he an i kap i PDF lei nih sniper in an kah hna i SAC ralkap 3 an thi. Kahdohnak a chuahnak hmun hi Myaung peng le Myinmu peng aa pehnak ah a si i, April 30 zing Sml 11 ah khan a si. SAC ralkap 70 tluk an si i PDF lei nih rocket le sniper in an kah hna.
SAC ralkap lei zong nih hriamngan in an kan kah ve, tiah CDSOM (Myaung) in BoMin Yat Khah(ဗိုလ်မင်းယက္ခ) nih a chim. “SAC ralkap 3 cu kan sniper kahnak in an thi i, kaphnih kahdohnak hi Kyia Pin Hla(ကြာပင်လှ) khua Lat Yiat Mah(လက်ယက်မ) khua karlak ah a si. SAC ralkap lei zong nih hrimngan in kah thlorh in an kan kah,” tiah a chim. Kahdohnak ah hin CDSOM (Myaung), Myinmu Guerrilla Force, Minchian PDF, Taloke PDF hna an i bawm, tiah theih a si.
Nizan April 30 Zan sml 6:00 hrawng ah Taungngu Pengkomh PDF camp lei ah rallam a sial mi SAC ralkap pawl cu, Taungngu Battalion 3501 Company 3 nih bomb an puahhnawh hna caah SAC ralkap 8 an thi, tiah theih a si. “April 29 ah Taungngu peng Mya(မြာ) khua kam ah SAC ralkap le PDF kan i kap i, hriamnam kan i thlau tuk caah PDF lei cu hnu kan kir ṭhan. April 30 ah rallam an rak sial ṭhan caah bomb in kan puahhnawh hna hi a si,” tiah Pagu PDF ṭuanvo ngeitu pakhat nih a chim.
April 30 Taungngu peng Samu lam kam ah SAC ralkap pawl cu bomb in kan puahhnawh hna caah 8 an thi. Nihin May 1 zing sml 10:00 hrawng ah Yetashi(ရေတာရှည်) Ciantangwe(ကြံသနွယ်) khua ah SAC ralkap pawl an i tong i, Taungngu peng Yuma lei ah hmunhma runvennak an va tuah, tiah PDF ṭuanvo ngeitu pakhat nih a chim.
A luancia thla 3 hrawng ah khan Taungngu pengkomh PDF nih Pagu Yuma ah mawṭaw le cycle in hohmanh i chawh lo ding, tiah an rak thanh cang. Aa chawk mi cu SAC ralkap ah ruah nan si lai i kan in kah hna lai, tiah cathanh an rak chuah. Mya khua cu SAC ralkap nih hriamngan in an kah lawng siloin umhmun an khuar caah khua mi pawl cu ramlak ah an um rih, ei-din zong an har ngai, tiah theih a si. Crd; The Chin Post
Relchap; Myanmar ram pumpi in dohthlennak tuah hnu April 30, 2022 nikhat chung kahdohnak ah SAC ralkap 104 an thi i, PDF 13 an nunnak a liam, tiah Yangon Khit Thit nih a thanh. Cazin ning ah SAC ralkap a thi mi hi Sagaing ramṭhen Myaung ah 3, Kahta ah 15, Shwe Bo ah 1, Tanhse ah 10, Monywa ah 2, Shan ramkulh Ywa Ngan khua ah 10, Karenni ramkulh Demosu ah 2, Chin ramkulh Hakha ah 25, Mandalay ramṭhen Nua Htoo Gyi ah 6, Pago ramthen Taungoo ah 8, Magwe ramṭhen Pauk peng ah 3, Kyaw ah 15, an dih lak 104 an si. PDF lei in Khin U ah 5, Yua Ngan ah 5, Pauk ah 3, an dih lak 13 an nunnak liam.
Mandalay Ramṭhen, Nuathugyi Peng Kahdohnak Ah SAC Ralkap 8 An Thi. Mandalay ramṭhen, Nuahtugyi (နွားထိုးကြီး) peng Watloe (ဝက်လူး) khua ah SAC ralkap ti than hna cu nihin May 1, zinglei suimilam 7:30 ah bomb puahhnawh an ton caah SAC ralkap 2 an thi, tiah Nuathugyi PDF sin in theih a si. Bomb puah an ton hnu ah anmah bawmtu ding in a kal mi SAC ralkap motor 2 cu bomb puahhnawh an ton ṭhan caah an motor pakhat a rawk i a thi mi zong an tam kho, tiah an chim.
April 30, zinglei suimilam 8:00 ahkhan Nuathugyi peng Pinsi(ပြင်စည်) khua nitlaklei ah SAC ralkap motor pakhat cu bomb puahhnawh a si i, cu motor cu a rawk i SAC ralkap 6 nak tlawm lo an thi, tiah Nuathugyi PDF hruaitu nih a chim. “SAC ralkap 10 hrawng an si i, Pa-de-ta bomb lung 14 kan puahhnawh hna, cu chung ah cun minung 6 an thi,” tiah Nuathugyi PDF hruaitu nih cun a chim.
April 27 zong ah khan Nuathugyi peng Pinsi (ပြင်စည်) khua sianginn ah umhmun a khuar mi SAC ralkap hna cu 40mm in kah an rak si i, 2 an thih lengah pakhat cu fak ngai in hliamh a rak si. TCP
Be First to Comment