Sagaing ramṭhen, Yinmapin peng, Chinphung khua ah mucu kai zaa-ka ngakchia 85 cu nizaan, February 26 ahkhan SAC ralhrang nih an tlaih hna i atu tiang ah an thlah rih hna lo, tiah theih a si.SAC ralhrang nih nizaan, February 26 ah Chinphung khua i PDF training dihnak puai tuah lio cu Helicopter 6 in an kah hna i Helicopter in SAC ralhrang pawl cu an ṭum i Chinphung khua cu an laak, hngakchia hna zong tel in khua mi an tlaih hna, tiah theih a si.
“Ngakchia 85 hrawng an hren hna, Mucu sayama 10 an i tel i Computer Sayama 5 an i tel, Computer cawng lio mi minung 30 hrawng an i tel ve. Ramlak ah kan zaam dih ko nain phungki pa nih ngakchia pawl cu khuachung i phungki sianginn ah ai kirpi hna caah a si,” tiah tualchung mi pakhat nih a chim.
Nizan, February 26 zaan ah Chinphung khuachung ah cun meithal puahthawng a ṭhan caah khua mi an hren mi hna caah thinphang ngai a si, Khuachung i hren mi dihlak hi ngakchia 85 he minung 170 hrawng an si, tiah theih a si. Vanlawng YAK 130 pahnih Bomb Puah A Tonnak Kong Ah SAC Ralbawi Tlaih An Tong: Yangon ramṭhen, Hmawbi air force ah YAK raltuknak vanlawng 2 cu February 18 zanlei sang ah bomb puah a tonnak kong he peihtlai in air force ralbawi le ralkap pawl cu an tlaih hna i Yegyi Ing(ရေကြည်အိုင်) ah an chek hna, tiah ralkap lei thawngzamhnak nih a chim.
February 18 zaan Sml- 11:40 ah People Force (Yangon) nih tlangcung mi hna an umnak hmun pawl ah bomb a thla zungzal tawntu Hmawbi air force ah a um mi Jet Fighter pawl cu a langhlat control mi bomb in an puah i vanlawng 2 a rawk, tiah thawng an thanh ko nain ralhrang lei nih an thanh ve ning ah cun vanlawng 2 ning in zei pipa ngai a rawk lo, tiah an ti.
Atu hi Hmawbi air force in air force ralbawi pawl le an lunghrinh mi hna ralkap pawl cu an phone an check hna i social media ah National Unity Government(NUG) page like a petu le a share-tu ralkap chungkhar hna cu an tlaih hna, tiah theih a si. “Air force bomb puah case ruang ah ralhrang pawl cu anmah le anmah an i vel i, buai ngai in an um hna,” tiah ralkap thawngzamhnak nih a chim. Credit: The Chin Post
Be First to Comment