Kalay pengkomh Battalion 4 camp cu May 14 lioah SAC ralkap nih Jet Fighter 3, MI 35 vanlawng 2, Helicopter 1 le Drone in suimilam cheu chung an rak kah hna, tiah theih a si.
Cu hnuah SAC ralkap 200 hrawng nih rallam an sial i Kalay PDF he minutes 15 chung hrawng an i kap i Hriamnam aa thlau tuk caah Battalion camp in Kalay PDF nih, an chuah taak hna. SAC ralkap nih Battalion camp ummi thilri sing 500 man, fur caan ei awk ah an i chiahmi eidin, thilri le ralzam ngakchia caah an on mi sianginn le sii-khan zong an khangh dih hna, tiah theih a si.
Battalion camp a kangh lawng si loin thilri vialte a kangh chih dih caah, Battalion camp thar sak ṭhannak ca ah mizapi nih nan bawmhnak kan herh ko, tiah an langhter. Credit; The Chin Post
Thawngdang Relchap>>>>><<<<<< North Atlantic Treaty Organization (NATO) nih Russia ralkap camp in meng (miles) 40 lawng ai hlatnak Baltic hmun ah raltuk cawnnak ngan pi a tuah tiah theih asi. ”Hedgehog” tiah cu raltuk cawnnak cu min an bunh i a rauh hlan ah NATO chungtel ah a lut ding mi Finland le Sweden tel in ram 10 an i tel, Hi raltuk cawnnak cu June 3 tiang Estonia ram ah an tuah i,
Russia nih Ukraine a tuk hlan khan rak timhtuah cia mi a si, Hi raltuk cawnnak i Russia ralkap camp pakhat in meng(miles) 40 lawng ai hlatnak hmun ah tuah asi, hihi NATO ralkap pawl raltuk ding in timhia kan si nak le kan i funtomnak langhter pah zong a si tiah NATO lei nih an chim.
Finland a si loah Sweden nih NATO a fonh mi kong ah kan caah zeihmanh a poinak umlo nain ramri tiang ralkap an tthawnter ahcun ka lehrulh lai tiah Russia President Putin nihcun ralrin peknak a chim ve. Finland nihcun kan hnuzarh ah NATO chungtel ah luhding in a thanh i May 16 ah Sweden nih a thanh ve.
Relchap>>>><<<< Ayeyawady ramṭhen Ma-Oo-Pin peng ah nizan May 16 zaanlei sang ah thlichia a hrang i khuakomh 12 in inn 162 a rawk tiah tualchungmi hna sin in theih a si. Cuaidung (ကျွဲဒုံး) khuakomh, Kaan kung (ကံကုန်း) khuakomh, Seihta (ဆိပ်သာ) khuakomh , Netsin (နတ်စင်) khuakomh le a dang khuakomh 12 ah inn hna cu an rawk i minung a hliam mi cu an um lo tiah Ayeyawady ramṭhen meithat zung in ṭuanvo ngeitu pakhat nih a chim.
Inn 130 hi a cungcih an rawk i inn 32 cu an rawk dih, Cu inn 32 a rawkmi chungkhar hna cu an umnak ding tawlrel piaknak zeihmanh a um lo caah an mah le an sahlawh sin cio ah an i fonh chung hna tiah a chim chap.
Thlichia ruang ah a rawk mi inn pawl hna cu nihin zing may 17 ah meithat zung nih an va bawmh hna i inn a rawkmi chungkhar hna cu hartong bawmchantu phu hna nih bawmhchanh ding in an timhtuah lio si tiah Ayeyawady ramṭhen meithat zung in ṭuanvo ngeitu pakhat sin in kan theih.
The Chinland Post | 2022 May 17 – Chin ramkulh chung kahdoh a tamnak hmunhma pawl telh in peng tam deuh ah 2022-2023 cacawn kum caah sianginn pawl cu June 1 ah on khawh ṭhan ding in SAC nih timhtuahnak a ngei tiah theih a si.
Kahdoh a tamnak Mindat peng chung zongah SAC nih High School awn ṭhan ding in timhtuahnak a ngeihmi hi mipi pawl khamnak caah hman a duh i a si lai tiah CDF-Mindat Brigadier General U Thang Chum Phe nih Chin World ah a chim.
“Zeizong vialte hi ningkhel te a si cang timi kha langhter a duh, a taktak ahcun kahdoh a fah lioah khuapi chung ah zeitik caan poah kahdohnak a chuak khomi a si. Sianginn hna awn ṭhan in khamnak caah an hman duh i a si lai tiah ka ruah.
SAC kuttang ahcun, sal fimcawnnak a si tiah an fale sianginn a ap duh lomi an um bantuk in cheukhat nupa nih an fale sianginn kaiter a duh cangmi zong an um tiah theih a si.
Hakha khuami pakhat nih” Atu bantuk ramkhel a ṭhat lo lioah pakhat le pakhat kan harnak aa lo cio lo. Cheukhat hna ralzaam dirhmun in an um lioah sianginn awn ding a si rih lo, fa ka ngei ko nain ka kaiter hna lai lo” tiah Chin World ah a chim.
Mindat peng mipi uknak phu hna nih a luancia kum in khuate kip ah fimcawnnak an thok cang tiah theih a si. CDF-Mindat Brigadier General U Thang Chum Phe nih “SAC he cun zeihmanh ṭanṭi in rianṭuan a si lai lo, mipi zong zeitik hmanh ah SAC he an i fonh lai lo, SAC rualchan cingla lawng an kai lai” tiah a ruahdamh.
SAC Ministry of Education zong nih a raa laimi 2022-2023 cacawm kum caah sianginn apnak cu May 26 in June 1 tiang riikhiahnak a tuah i sianginn ap tikah tangka lak lo ding, sianginn hman tein an kai khawhnak hnga nu le pa he rianṭuanṭi ding in a rak langhter. Chin ramkulh peng cheukhat, mipi hriamtlai phu nih an tlaihnak hmunhma hna cun nikum in fimcawnnak an thok cang tiah theih a si.
Be First to Comment