Myanmar Defense Force (MDF) nih vanlei ralvennak, rifle 6.6 kuan hmang mi, hmunhlat kahnak ah hmanmi rifle phunkhat kan ser mi cu a hlawhtling cang, tiah cathanh an chuah. Vanlawng kahnak taktak bantuk in a thawng mi cu a si lo nain, ṭhathnemnak tampi a ngei, tiah an chim.
“Zeitluk hlat tiang dah a kah khawh cu fiang tein chim awk a ṭha rih lo. Zeiruang ah ti ah cun zei tluk tiang a kah khawh kan chim ahcun cunak hlat sang in vanlawng an zuang sual lai. 1km nak sang tinh mi hmun cu ṭha tein a kah khawh, hi hriamthil hi voi tampi zohchunhnak tuah in a tlamtlin hnu ah kan langhter mi a si,” tiah Myanmar Defense Force (MDF) in ṭuanvo ngeitu pakhat nih a chim.
“Kan ser mi hriam cu vanlawng kahnak taktak bantuk in a thawng lo na in, hriamthil tampi he hmunkip in ṭan khawh ahcun a ṭhawng mi hriam a si kho,” tiah a chim chap. Magwe Ramṭhen ah SAC Ralkap Bomb Puah An Tong I 35 An Thi, Magwe ramṭhen, Myine peng, Gaitawmah (ကိုင်းတောမ) khua lei ah rallam a sial mi SAC ralkap hna cu nihin May 12 zaanlei ah bomb puahhnawh an tong i, ralkap 35 an thi, tiah theih a si.
SAC ralkap motor 7 le minung thazaang 150 hrawng nih zulh mi rallam sialtu hna cu Myine peng le Poah peng aa tonnak Netat (နယ်သတ်) khua pawng an phak, an i dinh lio ah bomb puahhnawh an si, tiah Myaing PDF in ṭuanvo ngeitu nih a chim. “Kahdohnak ah meithal zunkhat hmanh kan puah lo nain SAC ralkap 35 hrawng an thi, a hlankan te timhtuahnak in bomb puahhnawh an si, bomb puahhnawh an ton hnu ah motor 2 in ruak cu an thiar hna,” tiah ṭuanvo ngeitu nih cun a chim chap. Credit; The Chin Post
Ayeyawaddy ramṭhen, Bokalay khua ah, May 12 ah, Pyusawthi hruaitu Maung Myint cu meithal in kah thah a tong, tiah theih a si. Nginaung (ညီနောင်) khuami SAC ralkap thawng petu, Pyusawthi hruaitu Maung Myint cu hriamtlai pakhat nih May 12 zing sml 8:00 hrawng ah MongHeinkha (မုန့်ဟင်းခါး) dawr ah meithal in voi 4 an kah i a thi, tiah tualchung mi hna nih an chim.
“Maung Myint cu SAC ralkap he aa kom tukmi a si, khuabawi pawl zong a kuttang a chiah dih hna, Nginaungdai (ညီနောင်ဒိုင်) hmun hrawng ahcun mi nih hngalhmi hruaitu pakhat a si i Dalaan lawng si loin Pyusawthi hruaitu bak a si tiah,” tualchung mi pakhat nih a chim.
Maung Myint nih khuate khuabawi pawl cu a uk dih hna, Thil tam deuh zuarmi pawl cu a cheu a hal hna, Khuami hna zong kutdong sawh in a tlaih ter hna, tiah a chimchap. Bokalay khua ah Dalaan a ṭuanmi Chit San Maung, Ye Thuat Zaw le Thu Zar Kyi cu fimhlawm an rak si cang i Atu hi a palinak an fimhlawm a si, tiah theih a si.
Loikaw, KayanTharyar Lamtthen Um SAC Ralkap Pawl Cu Loikaw PDF Nih Sniper In An Kah Hna SAC Ralkap 1 Thi, Karen ramkulh, Loikaw peng, Kayan Tharyar lamtthen ah umhmun khuar mi SAC ralkap pawl cu nihin May 12 zinglei ah Loikaw PDF nih Sniper in kan kah hna i SAC ralkap 1 a thi tiah Loikaw PDF nih cathanh an chuah.
Nihin zinglei Sml 9:20 hrawng ah SAC ralkap hna nih thli tein an kah hna i kahdohnak cu minute 15 hrawng a rau, Loikaw PDF lei in a hliammi um lo tein hnu an tolh kho tiah theih a si. Mipi hna zong nih kahdohnak a umnak hmun KayanTharyar lamtthen hrawng cu ralring tein umkal ding ah Loikaw PDF nih an cathanh ah an langhter.
Magwe ramṭhen, Yesagyo peng ah inn a khaangtu SAC ralkap hna le tualchung hriamtlai phu hna cu nihin May 12 zinglei ah an i kap, tiah theih a si. SAC ralkap hna cu May 11 zinglei ah Yesagyo pengchung NanOo khua ah zaan an riak i, nihin May 12 zinglei ah nichuahlei Taung khua ah rallam sial in, khuachung inn an hrawh lio zinglei suimilam 9:00 hrawng ah kahdohnak a chuak, tiah Yesakyao PDF in hruaitu Hmai Tae Zah nih a chim.
Kahdohnak cu a rau lo nain SAC ralkap 4 an thi i, Tualchung hriamtlai phu lei cun hliam tuar an um lo, tiah theih a si. Rallam a sialtu SAC ralkap hna hi Sagaing ramṭhen in Magwe ramṭhen ah a phan mi an si. Ral tu ding nakin mipi hrem i, harsatnak pe ding in le khuachung inn khaang ding in timhtuahnak he a ra mi an si, tiah Hmai Tae Zah nih cun a chim chap.
SAC ralkap hna cu Yesagyo People’s Defense Force battalion 2 le KNT pah-kah-phah phufonh nih an kahdoh hna, tiah theih a si. Rallam sialtu SAC ralkap hna cu a luancia caan zong ah Yesagyo peng khuachung ah voi tampi rak lut in, mipi umnak inn an hrawh i, sui le mansung thilri leng ah thilri dang zong an fir hna, tiah tualchung mi nih an chim.
May 9 le 11 ah Yesagyo peng, Yelaykyun (ရေလယ်ကျွန်း) ah SAC ralkap le tualchung hriamtlai phu hna cu an i kap i, sniper kahnak in SAC ralkap 3 an thi, tiah MG 6 pah-kah-phah phu nih an thanh. Credit; The Chin Post
Be First to Comment