SAC Ralkap Nih PDF Sakhan An Luhhnawh, PDF Pasaltha (5) Nih An Nunnak A Liam E
Yesagyo-PDF Sakhan Pakhat SAC Ralhrang Nih An Luh Hnawh; PDF 5 An Nunnak Liam, Hliamtuar Zong An Um. Magway ramhen, Yesagyo peng ah ummi PDF et-khuai sakhan pakhat SAC ralhrang nih an luhhnawh hna caah PDF 5 an nunnak a liam. Nunnak liammi minung 5 hna chung ah hin 2 cu an tlaih hna i, Vai-tuhmui in an tukthah hna, tiah Yesagyo Pah-kah-phah in uanvo ngeitu pakhat nih a chim.
Vaute[March] 31 zinglei suimilam 4:00 tluk ah SAC ralhrang thazaang 70 tluk nih Yesagayo peng PDF et-khuai sakhan pakhat an luhhnawh caah maitonh in kahdohnak fakpi a chuak i, PDF 3 an nunnak a liam. Minung 2 cu an tlaih hna hnu ah SAC ralhrang nih tuksapur in Vai-tuhmui in an tukthah hna, tiah theih a si.
“March ni 30 ah voi 2 tiang bomb kan puah hnawh hna caah SAC ralhrang lei an faktuk caah Yesagyo khuapi kir lo in thazaang an chap i, PDF et-khuai sakhan pakhat an luh hnawh. Humhimnak a la tu zong an um ko nain ruahlopi thil a si caah kan tuar deuh,
kan kahveko hna nain kan sakhan an laak pin ah minung 3 an nunnak liam, minung 2 cu an tlaih hna hnu ah vai-tuhmui in an tukthah hna, pakhat cu a thluak zong a umtilo, a lu kuai dihlak in an tuk thah” tiah Yesagyo Pah-kah-phah in uanvo ngeitu pakhat nih a chim.
Nunnak liammi hna hi Yesagyo peng PDF chungtel Pah-kah-phah in minung 4 le YLK in minung pakhat hna an si i, an ruak cu ha te in kan vui hna. Hi kahdohnak ah mipi hriamtlai minung 3 nih hliamhma an tuar i, AK zuun 2 le M4 zuun khat zong kan sung chih, tiah an langhter. #Lungmili Post #Khit Thit Media
