Sagaing ramṭhen, Myaung peng SuailayOo (ဆွဲလဲအိုး) khua pawng ah suimilam 3 leng hrawng kahdohnak a chuak i, cu kahdohnak ah cun SAC ralkap 35 hrawng an thi, tiah Myaung PDF in ṭuanvo ngeitu pakhat nih a chim. “May 2, zinglei suimilam 4:00 in SAC ralkap minung thazaang 100 tluk hrawng nih rallam an sialnak cu doh ding ah Myaung PDF le tualchung hriamtlai phu 25 leng i fonh in timhtuahnak kan ngei.
A hlankan in timhtuahnak he doh an si caah SAC ralkap a thi mi an tam, cucaah hnu an tolh. An hnu zulh kan duh ko hna nain khuachung a si caah mipi zawn kan ruat sinain hlawhtlinnak he hnu kan tolh kho ko,” tiah PDF in ṭuanvo ngeitu nih cun a chim. Cu kahdohnak chung ah cun tualchung hriamtlai phufonh lei in minung 2 nih hliamhma an tuar nain an hliamhma kong ah thinphan ding a um lo, tiah theih a si.
Kahdohnak a dih in a kir mi tualchung hriamtlai phufonh hna cu an kirlei ah mipi nih pangpar, ti-dai le changreu he upat pek buin an don hna, tiah theih a si. SAC ralkap hna hnu an tolh hnu ah tualchung hriamtlai phufonh hna nih hmunhma zohfelnak an tuah pah ah bomb, kuanfang le kutcheh bomb le thilri zeimawzat an laak, tiah tualchung media nih a langhter.
Myaung pengchung ah a lut mi SAC ralkap nih rallam an sialnak ah SAC ralkap kuttang um palik cu anmah bawmtu ah an hman hna, tiah Myaung peng tualchung runvennak le security tuahtu phu CDSOM nih an thanh. Credit; The Chin Post
Mandalay ramṭhen, Kyaukse pengkonh chung ah a um mi khua hna cu Security training kai ding in khua pakhat ah minung 20 nan kan pek lai, ti in April 29 ah SAC ralkap nih khuabawi hna cu an hal hna, tiah tualchung mipi hna sin in theih a si. Training a kai mi hna cu thlahlawh pek an si lai i, hriamnam zong pek an si lai, SAC ralkap nih a herh ahcun hmaikal ah an auh lai, tiah an chim.
Khuachung um minung hna cu cazin an lakter hna i May 5 ah zacin ap dih ding in khuabawi hna cu an chimh hna, tiah theih a si. Kyaukse Nakaa Ni Pauk Kya ralkap in ṭuanvo ngeitu pakhat nih, “SAC ralkap nih mi an auh caah tualchung mipi hna cu an thinphang,” tiah a chim. Training kai ding cazin a latu le a forhtu khuabawi, innza uk hna le an chungkhar cio hna nunnak cu ṭuanvo kan la lai lo, tiah Kyaukse Nakaa Ni Pyauhkya ralkap hna nih May 2 ah cathanh an chuah.
Relchap; CDM Tuahtu Ralkap/Palik Hna Caah Lentecelhnak Puai Tuah A Si.SAC uknak tang ah um duh loin CDM a tuahtu ralkap le palik hna ca ah lentecelhnak puai le rawl dumṭinak puai tuahpiak an si, tiah NUG cozah Mnistry of Defense nih an thanh. NUG cozah rianngeitu hna le mipi sin ah aa fonh mi ralkap, palik hna i hawikomhnak puai cu kawl titoih puai (Thingyan) chung April 12 le 13 ah tuahpiak an si, tiah nihin May 2 ah an thanh.
Pumpululh chuih zuamnak le chin-lung chuih zuamnak leng ah Tingyan pangpar hnah in tithehnak, moh- lung -ye – paw( မုန့်လုံးရေပေါ်) sernak tibantuk pawl an tuah i, CDM a tuahtu hna muihmai ah lawmhnak hmuh a si. Puai an tuahnak hmun cu a himnak hmun pakhat ah a si i, NUG acting president Duwa Lashi La le Minister of Defense U Yee Mon(ဉီးရေမွန်) nih lawmhpinak roca an kuat hna. Credit; The Chin Post
Be First to Comment