Tanintharyi ramṭhen, Dawei pengkomh ah CDM palik le mino 20 cu “PDF pawl nan bawmh hna” tiah puh an si i SAC ralkap nih an tlaih hna. April 4 ah Myatta(မေတ္တာ) peng Kyaukmyetaung (ကျောက်မဲတောင်) khua ah petrol a zuartu U Khin Maung Ting(ဉီးခင်မောင်သိန်း), a nupi Daw Aye Aye Ma le an tupa Ko Ting Ting Zaw, cun CDM a tuahtu Dawei palik Tat Paing Soe(သက်ပိုင်စိုး)cu SAC ralkap nih an tlaih hna.
Cun, Lawnglung peng Pandalay(ပန်းဒလဲ) le Lawnglung khua khua mi Ko Aung Tu Hein(ကိုအောင်သူဟိန်း), Ko Wai Yan Kyaw(ကိုဝေယံကျော်), Ko Min Aung le Ko Aung Aung zong an tlaih hna. April 5 le 6 ah Dawei khuapi Byohtawwah(ဗျောတောဝ) chekgate le Kahmawkin(ကမြောကင်း) hlei ah Taningtharyi cazual editor hlun Ko Aung Luan le tualchung mi 4 an tlaih hna.
Tlaih a tong mi hna cu Dawei, Myatta, Kyaukmyetaung, Lawnglung palik sakhan le tlaih an sinak hmun ah SAC ralkap nih an chekhlat lio hna a si. SAC Ralkap nih uknak an lak hnu kum 1 leng chung ah Tanintharyi ramṭhen ah civil mi tlaih a tong mi 1000 leng an si cang, tiah theih a si.
Phurosu Peng Ah Rallam A Sialtu SAC Ralkap KNDF Nih An Kah Hna I 10 An Thi: Karenni ramkulh, Pharosu peng ah SAC ralkap le KNDF cu nihin April 10 zing Sml 8 hrawng ah an i kap i, SAC ralkap 10 an thih lengah hliam tuar zong an tam, tiah theih a si. KNDF batallion 15 nih Dawngekhu(ဒေါညေးခူ) le Thikaludaw(ထီးကလူဒေါ) khua karlak ah,
Rallam a sialtu SAC ralkap pawl cu a thlithup in kan kah hna i SAC ralkap 10 an thi i, hliam tuar mi zong an tam, tiah KNDF batallion 15 nih thawng an thanh. April thla a zarhkhatnak chung ah SAC ralkap le KNDF kar kahdohnak ah SAC ralkap 15 an thi i KNDF lei in pakhat a nunnak a liam ve, tiah central KNDF nih an thanh. The Chin Post
Yangon, Lanmadaw peng SAC Incharge General (Bohmu) Khuday Phyo Aung cu April 10 zaan sml 6:30 ah, Lanmadaw penguk zung le Palek security laknak hmun karlak ah a um mi rawldawr hmai ah PDF nih an kahthah i, a hawipa zong hliam a tuar, tiah theih a si. “Hihi Nan Htike Aung Operation mission a si,” tiah Yangon PDF Phu pakhat nih an chim.
SAC ralbawi Khuday Phyo Aung hi DSA Batch 48 in a dih mi a si i, Russia ram in ME degree a ngei mi a si. NLD cozah chan ah SAC nih Yangon ramṭhen MP rian an khinh mi zong a si i, SAC nih uknak an lak hnu in Lanmadaw peng In Charge Military Administration rian tlaitu a si.
April 10 zaanlei sml 4:00 hrawng zong ah Yangon , Kamaryut peng Inya lampi “Wala” sang ah SAC ralkap camp cu ‘Nan Htike Aung’ operation ah aa tel mi Special Force nih an kah hna i SAC ralkap 4 hliam an tuar, tiah theih a si. Yangon ramṭhen chung ah ‘Pyanhwa Aung operation’ ti mi cu thla 7 chung kan tuah hnu ah ‘Nan Htike Aung Operation’ kan thok ṭhan cang lai, tiah PDF nih April 7 ah khan a rak thanh.
Be First to Comment