Press "Enter" to skip to content

Taluk nih:An ton mi harnak’Phun3 hna hi nan theih cang maw.

Tuluk nih an tuanbia ah fak tuk in ningzahnak voi thum an tong an ti. Cucu hi ti hin a si. Ralhruang le hau an kulhning in a ttha taktak. A fel tuk, i a fek tuk fawn. Ralhruang cu a chah tuk i ral nih zeitihmanh in an hlanh khawh ding khi a si lo.

Cun vawlei tang in khur phun, zu hlet bantukin cawhpiak ti zong ah a chah tuk tthiamtthiam i ral nih zeitihmanh in a chung ah luh awk ttha a si lo. A ralhruang cu a feh tuk caah an hna a ngam, lenglei ral zeihmanh an ttih lo. Asinain voi thum tiang ral nih fak tuk in an rak tei khawh hna.

Zeicahtiah innka congtu kha ral pawl nih an ziknawh khawh hna i ralhruang lonh hau lo in innka in zan ttim ah an lut i ralkap pawl an i hngilh karlak ah fawituk in an thah hna, tiah an tuanbia rel khawh a si.

Atu lio Covid-19 pulrai chung in kan i ven lio ah a lamkip in a kan vengtu kan cozah lei rianttuannak cungah kan i lawm taktak. Kan pi Daw Aung San Suu Kyi nih an kan hnemh ning, a kan kilven ning hi cu uar lo awk a ttha lo.

Hakha zong ah ngandamnak lei le kan cozah nih an kan zohkhenh ning, an kan thlawp ning ah kan i lawm hringhran. Khat lei khel ah kan lung a nuamh lomi cu, Hakha gate hngahnak i khuallam in mawttaw an phak tik ah driver kha ziknawh cia (K. 50000/-) an si rua i, passengers cheu khat kha gate phak hlan in an ttum rua, an ke asiloah motor bike in Hakha ah an lut, an ti.

Cun truck mawttaw mawng pawl zong an hnar chung sawh in test tuah kha an duh lo i K. 10000/- an pek hna i test tuah lo in an lanhter hna ti kha, upat awktlak sibawi pakhat nih a chim tiah an ka chimh chin ve. Tuluk ram innka congtu zik an nawh khawh i voi thum tiang an mual phonak tuanbia kha ka lungthin ah a hung lang.

Ziknawh hi kan thi chung ah a lut tuk cang i kan i thleng kho ti hna lai lo maw? Bia kan theihmi hi a hmaan a si ahcun aphi chuak a rauh hlan ah kan temtuar ko lai. Hakha hi a him ti rua lo ee.

Kan nunnak thinlung innka te kha Satan nih a ziknawh peng ve i, a thli tein luh na sianh ve lai maw? Nangmah he mizapi he kan thi ko lai, a kan thah ve ko lai, miphun mual a pho peng ve ko lai.

Note: hi ca ka ttialmi nih mizapi nan thin in phanter tuk hna hlah seh; ziknawh hmang an um hmanh ah keimah ruahnak ahcun pakhat hnih an si ko lai, gate cawngtu pawl le driver vialte hoi hna misual zoh in kan zoh sual hna lo ding kha a biapi ve mi a si; kan upate belte nih fak deuh le fel deuh in an kan tthit hruai le runven zia an kan thiam ding tu cu ka duh ngai ve, mizapi zong nih bawmh ve hna usih.

Be First to Comment

Leave a Reply

Your email address will not be published. Required fields are marked *