Press "Enter" to skip to content

Thailand Nu Tlaihhrem Tu Kawlram Mi An Tlaih

Thailand, Rassada khua ih um Kawlram mi in Thailand nu a pawngsual ruangah an kaih thu The Phuket News ah an tarlang. A hmin cu Nyi Nyi Naing a si ih kum 42 mi a si, Thailand ramsung ah ramdang mi pawl hnaṭuan ding hawlsaktu a si.

Rassada khua sungah mi inn luah in a khuasa ih Thailand nu cu a inn ih hnaṭuan dingin a ko hnuah zankhat sung arak pawngsual. Thailang nu cu kum 47 mi a si ih Sa Kaeo khuami a si, police sakhan ah a report nan police pawlin an rak ngaihsak lo lawk.

Curuangah online parah a thilton cu a tarlang ih tualsung media pawlin hmaiton thusutnak an va nei, cutin a lar ciamco. Cumi hnu ihsin September 21 sun nazi 12:35 ah Thailand police pawlin mi pawngsualtu cu an kai, pawngsual thubuai an orhter ih thiamlo an coter asilen kum 20 sung thawngthlak le sumpai B8,000 & B40,000 zat a kuan ding.

Thailand nu in, “August 27 zan ah a inn ah hnaṭuan dingin in ko, a hnipuan sop dingin le a hnipuan pawl taihsak dingin in ko. Ka thlen veten rawlei ding arak tuahcia thluh, hnaṭuan ding thuhla kan rel veten in kaihrem hngal. In sit ih in thong ciamco, police hnenih na sim asikhallen ziangtin hman in ti lo ding. Police pawl hnenah sumpai tampi ka pe zo in ti…” tin media hnenah a sim thei.

Cun, zan nazi 9:00 ihsin zinglam nazi 4 tiang a pawngsual ih a puahcok rero, kut khal a thlak. A ka tla tape in a tawnbet, nam thawn tla in hringhro a ti. A itthat sungah tlansuahnak ding a hawl rero nan sangka zaten a kalh thluh ruangah a tlansuak thei lo, zinglam ah a rualpi pawlin hnaṭuan dingin an va sawm ih sangka an kalh theihngilh.

Sangkapi lam ihsin a tlansuak ngam lo ih sangkate ihsin a dawp suak. Cutin a naibik a rualnu tei inn ah ava tlanlut ih a rualnu thawn Phuket City Police Station ah thubuai an thehlut, asinan police pawlin an rak ngaihsak ṭha lo thu pawl cu media hnenah a sim thei. Police pawlin form an nganter hnuah amahten siizung ah an check-up awkter, a thuhla cu facebook parih a tarlang hnu ihsin police pawlin an ngaihsak sal ih mi pawngsualtu cu an kai. (#The Phuket News) Credit : Meifar

Be First to Comment

Leave a Reply

Your email address will not be published.