Press "Enter" to skip to content

Thanksgiving Beden Biachimmi : ” Khat Le Khat Si Loin, Virus Raal Tu Kan Doh”

𝐓𝐡𝐚𝐧𝐤𝐬𝐠𝐢𝐯𝐢𝐧𝐠 𝐁𝐢𝐝𝐞𝐧 𝐁𝐢𝐚𝐜𝐡𝐢𝐦𝐦𝐢: “𝐊𝐡𝐚𝐭 𝐥𝐞 𝐤𝐡𝐚𝐭 𝐬𝐢 𝐥𝐨 𝐢𝐧, 𝐕𝐢𝐫𝐮𝐬 𝐑𝐚𝐚𝐥 𝐭𝐮 𝐊𝐚𝐧 𝐃𝐨𝐡”
========================================================
“Covid-19 in US kan temtuarnak a caan a sautuk cang. Cucaah i thenhmalnak donghter a cu cang,” tiin US President-elect Joe Biden nih forhfialnak bia a chim. “American nih kan dohmi raal hi virus a si, khat le khat kan si lo,” tin Thanskgiving holiday i biachimnak a ngeih lio ah Biden nih a chim.

US ah virus a karh lei a panh cuahmah ko rih caah, cuhlan i holiday an chuah bangin cun tutan ah cun chuah lo dingin thazang a pek hna. Nov. 3 election phichuak a kupthal lehpiak dingin Trump nih amah a tanhtu pawl cawlcangh a fial hna.

Pennsylvania i Republican state legislators pawl nih an tuahmi puai ah White House a umnak hmun in Trump nih phone in biachimnak a ngeihpiak hna. Cu lio zongah cun election fir a tonnak kong tu le tu a vun nolh thiamthiam ko rih. “Hi election hi a khupthal kan leh a hau. Timh ciammam tein an firmi a si,” tiin a chim.

Puai an tuahnak ah cun kal dingin timhlamh a si ko nain, a sihni Rudy Guiliani zong virus nih a tlunh ve cang caah, an let thanmi a si. Amah Guiliani tu cu a mipum hrimhrim in a vai tel thotho, tiah theih a si.

Electoral college votes ah Biden nih fawizang ngaiin buan a co. Rian i chawnnak ding zong cu a tu hi an kalpi cuahmah cang. Key states i Trump nih tazacuainak a tuahmi vialte cu nihin tiangah cun hlawh a tlingmi a um rih lo.

US media nih Biden buan a conak kong thawng an thanh zarh 2 lenglo hnu ceu ah Wednesday ah khan China President Xi Jinping nih Mr Biden sinah a cawnglomhnak capar a vun kuat ve.

Asinain, Russia President Putin, Mexican President Lopez Obrador telhchih in, vawleicung pumpi hruaitu tampi hna nih cun nihin tiang biaka an aang rih hna lo. “US election an tawlrelmi a dongh cikcek hlan lo cu cawnglomhnak ka langhter rih lai lo,” tiah Mexican President Lopez nih Wednesday ah khan a chim.

𝐇𝐢 𝐯𝐢𝐫𝐮𝐬 𝐡𝐢 𝐤𝐚𝐧 𝐭𝐞𝐢 𝐤𝐡𝐚𝐰𝐡𝐦𝐢 𝐚 𝐬𝐢 𝐤𝐨 : “Nan President sinin biatak theih peng dingah ai tlakmi nan si dih hna, tiah ka zumh. Virus a karhsomi hi kan tlaihbawh, hmunhter a hau. Cu bantuk rian kongah cun doctors te le, nurse pawl le suul a pahtu hna cungah leiba tampi kan ngei…Kan citizens hawile cung zongah leiba kan ngei. Covid nih kan ngan a kan fahtertuk cang, a kan sunghtertuk cang, kan lungthin a hrawhtuk cang, minung tamtuk nunnak a kan lakpiak cang. Kan lungthin a kan thenhmal dih, kan thin a kan hunter, khat le khat a kan raalter phah. Virus donhnak kongah kan ram pumpi in kan thin lawng a phang chinchin cang, ti cu theih cio mi a si. Asinain, kan theih dingmi cu hihi a si – virus kan do, khat le khat kan i do lo,” tiin Biden nih a chim.

“Kan ruangruh hi thir bangin kan fehter a hau, a lethnih in thazaang chuah kan hau, virus do dingin kan pum kan i pek than a hau,” tiin thazaang a pek hna. “Cun Thanksgiving puai nan tuah tik zongah fimkhur tein tuah u. Kei cu, mipi he vai ton i puai va tuah nak cha in cun, ka nupi Jill le kan fanu le a vapa ti vial lawngin puai kan tuah ko lai. A dang a tangmi kan chungkhar pawl cu kanmah bang cun hmetete in phu an i then ve lai,” tiin a chim.

Tu kum holiday hmang dingin khual a tlawngmi hna an miluzat hi ni kum lio nak in cun a zor ngai ko. Asinain, ngandamnak lei officials pawl nih virus kongah ralrinpeknak nolhcip in an thanh ko nain, American mipi lakin million tamtuk kaa dangah a ummi an chungkhar tong dingin khualtlawn an i thawh thotho ko hna.

“Tinhmi caan chungah virus hi kan tei khawh te ko lai. Virus kan tei khawh ko, ti hi ka hngalh. Cucaah kan tei lai. Nunnak hi punghman ningtein a vun si than cang lai, tiah bia kan kamh hna” tiin Biden nih a chim.

“Khat le khat lungthin i thenhmalnak khuacaan hna cu ceunak le lung i rualnak chungah an tlau dih te ko hna lai, tiah ka zumh,” tiin a chim.

US ah virus a karh chinchin ko nain, Thanksgiving holiday zong cu a vun i phua. Tuesday lawng i a thimi hi 2,000 an si than cang i, cucu May thla hnu in a zualhmabikmi dirhmun a si. US i a thimi hi 260,000 an si cang i, vawlei cungah a tambik an si, tiin Johns Hopkins University nih a chim.

𝐑𝐢𝐚𝐧 𝐢 𝐚𝐩𝐧𝐚𝐤 𝐤𝐨𝐧𝐠𝐚𝐡 𝐳𝐞𝐢 𝐭𝐡𝐢𝐥 𝐝𝐚𝐡 𝐚 𝐜𝐚𝐧𝐠 𝐜𝐮𝐚𝐡𝐦𝐚𝐡𝐦𝐢 𝐚𝐧 𝐬𝐢? : Election in zarh 3 dengmang a rauh hnu ah, Monday in khan cun phungningte i rian i apnak thok dingin Trump zong a lung a tling ve cang.

January 20 i president office a conak dingah timhlamhnak a thok cang bangin, key government officials le fund hrang i an chiahmi dollar million tampi cu Biden nih a tak in a vun hman khawh ve cang lai.

Presidential Daily Brief (biachimnak) zong a ngei kho cang lai – international lei in a rami hrocernak siseh, thil sining ai thleng tharmi pawl kong zong a theih khawh cang lai. Monday ah khin Aide Jen Psaki zong a hmasabik biachimnak a vun ngei kho cang lai. Cun, Biden a senior team kut ah cozah biathup pawl zong hromh an si ve cang lai.

Tuesday ah khan, a cozah sernak ah a herhmi rian 6 caah minung a thim hna. Cu hna lakah cun secretary of state le national security adviser zong an i tel. A economic team telhchih in hmai zarh lei ah khin a dang zung riantuantu pawl tampi rian a khanh rih hna lai, tiah theih a si. Minung ai thimmi a tamdeuh hi cu Senate nih a namhnehpiak ta hna an hau te lai. ‎Chelsea Bawi‎

Be First to Comment

Leave a Reply

Your email address will not be published. Required fields are marked *