Press "Enter" to skip to content

Thawng Tha : Biden Cu Green Light An Pek Cang

Malaysia le India ummi kan Laimi hna nan thla camnak cu Pathian nih a theih i thil tha bik an tuahpiak cang hna lai. Innka cu a on cang lai. Nan lung dong hlah uh. Nan cung i nahchuah ziarngeihnak he a khatmi thinlung ngeimi US ummi Pastor cheukhat le micheu khat nahchuahnak le ziarngeihnak cu Pathian nih a tei dih cang hna.

Nan Pathian cu Thangthat chin ko uh. Nan kut vui kua in beeng uh. Nahchuaknak ziar ngei mi hna nih Trump nih a tei lai i kan kut vui thum kan bengh lai an ti. Atu cu nahchuah ziar ngei mi hna cu Pathian nih an biang le an hna khaw ah chet cikcek in a bengh cang hna. Cei hna seh.! Krifa kan si an ti i Papak zuar, hlawhhlang nu he rumro a zi mi pa cu Pathian nih a covo a chuh cang.

Mihor si. Mihor cu Laimi nule Pa mihor hna nih an tanh i an tawkuat in thla an campiak. Biaknak pakhat te lawng zoh in Lainu Laipa hna nih nan tanh. Kan ram le Kan miphun ca ah PIA Khat man hmanh man ngei lo minung a si.

Biden ka huat a ti tu hna ruat tuah Biden cu hlawhhlang PaPak zuar he ciah lo. Pathian theimi asi. Nan uar mi pa cu atu a rian a dih cun TAZA CUAI tu ding nih an Hngah ko. Thil dang zoh lo in Biaknak pakhat te lawng zoh cu One way nan si.

Jerusalem cu Lai khua li pi si lo. Jews miphun cu Laimi an si lo. Anmah he pehtlaihnak pakhat hmanh kan ngei lo. Kan Bible cun a peh ko nain Kan zumhmi Bawi Khri cu Jews miphun nih zei ah an rel lo. Kamhtu tiah ni hin ni tiang an cohlang nemmam lo khah.

Bible thar cu zei ah an rel lo. Bible hlun lawng ni hin ni tiang an cohlan. Laimi hna Jerusalem cu nan khua pi si lo. Jews miphun nan si hrim hrim lo. Israel ram cu nan ram si lo.

Mizo kan Unau pawl a cheukhat nih Israel ram an rak ser kaa teah Jews kan si kan ram kan panh lai an ti i Nihin Israel ram ah an rak kal i an pem. Jews miphun hna nih Jews miphun an si lo kha tha tein an theih.

Atu ah mah mi pem hna cu Palestine ram he a naihnak bik ramri ah an chiah hna. Khua an sakter hna. Aruang cu nan thei maw? Palestine hna le Israel miphun hna cu Ral an si. An i thua peng. Cutikah Kan Unau hna mizo pawl cu Human shield ah Israel hna nih ramri ah an chiah hna. Na thih si le anmah thi hmasa hna seh.

Kanmah Jews pawl cu him usih timi thinlungput ziaza an ngei. Israel khuapi tehna ah khua saknak nawl an ngei lo. Ral he a naihnak bik ramri ah an chiah hna. Hi bantuk thinlungput ziaza chia a ngeimi hna Jews hna cu Ni hin Lai mi nih nan tanh hna Thla campiak hna usih nan ti ngam rih. Mah nakcha cun Kanmah ram le miphun an biaknak ca tuah Thla cam a tha deuh lo maw?

Mah miphun kaltak zei rel loin Miphun dangpi Biaknak dangpi Miram dangpi Zei i a kan rel lomi Israel miphun hna caah cun Thla cam usih nan ti tawn mi hi hruh maw si deuh Fim dah?

Jews miphun nih Khrifa cu an huat tuk ti hi Laimi tam tuk. Ni hin ni tiang nan thei fiang lo. An khuapi Jerusalem cu Trump nih a fonh thawng in Laimi le Khrifa caah thahnemnak um hlei maw? Nanmah khuapi si lo khah! Au khuang len hlah .

Laimi caah thahnemnak pakhat hmanh a um lo. Mah Miphun chung in Mifim thiam le Pathian a zum taktak in Kan ram le miphun thanchonak ah mi a kan hruai khotu Moses bantuk kan pe hram ko tiah thla cam u law a hman deu. Man zong a ngei mi Asullam zong a ummi Thlacamnak si.

Pastor cheukhat hna mi nan kan cawn piaknak a hman lo. Bible hlun cu a thi nan ti i phung nan chim tikah nan hman thiamthiam ko. Nan bia hnu le hmai a khat lo.

Biaknak pakhat te lawng zoh in kal nan duh.Kan hal ta hna lai. Atu ah kawl nih khin heh chet tiah kan that hna sehlaw nan tanh tuk mi Israel miphun hna nih khin an ralkap rak thlah in Laimi cu an in khamh hna hnga maw?. An taw hmanh a zaa lai lo khah.

US ralkap nih tah Laimi khamh ding ah an Ralkap an thlah hrim hrim lai tiah nan chim ngam lai maw? A har lai. Miaknak pakhat men cun an kan bawm nemmam lai lo khah nan lungfiang uh. Ram ngan hna nih Mi ramdang le miphun dang an bomh tik hna ah anmah caah thathnemnak a um lo ahcun fawite in mi an bawm nemmam lo.

Lairam le Lai miphun cu US cah thathnemnak pakhat hmanh le ruahchannak a um lo. An bawm nemmam lai lo. An kaa lawng in an au lai. Mah cah US cu miram tampi le miphun dang hna nihcun Big mouth Less hand an ti.

Mah caah cu thla nan cam duh taktak ahcun Kanmah miphun le Kan ram thanchonak tuah Bawipa Pathian Hruaitu tha le mifim kan pee. Kan mino hna chung in Mi fim le mitha kan pe. Kan miphun Ngandamter. Kan ram ngandamter.Thanchonak phuntling kan pe ve.

Nangmah an tihzah in ziaza tha he na Bible ning in a zumtu le A zultu kan si khawh nakhnga Lam ka hruai. Zuding le rithai si Kunya le khaini le Kuak zuknak tiang in kan hlawtter.

Fim thiam sang cawnnak ah a zuammi le a thiammi Fanu Fapa tha kan pe. Kan ram le kan miphun dawtnak thinlung ngeimi Kan si khawhnak fimnak kan pe. Mithaathu si lo in zuamnak he riantuan huammi Fanu le Fapa tha kan pe .Kan cin thlai mi le kan satil tiang thla chuah kan pe. Kan vulei hi Thlumter. Khua caan hman le khua caan tha kan pe tiah thlacam u law a tha bik.

Kanmah miphun le kan ram he pehtlaihnak a um lomi Israel miphun ca le Jerusalem caah na tawkuat in na mit tla tiang thlacam Len hlah. Kanmah Biaknak le kan miphun kan ram ca tuah a hmanmi Thlacamnak hi ngei cang hna usih.

Nahchuah ziarngeihnak nih Thil thaa a chuahpi bal lo. Thil hman lungthin thiang le DAWTnak lawng nih Thil tha le thil hman a chuahpi tawn. Nan pu Trump cu Pathian nih a pekmi a covo cu a hman a thiam lo. Huatnak le miphun thleidannak a ngeih tuk ruang ah Pathian nih a covo cu a chuh than cang.

Pathian duh ning hohmanh nih theih khawh asi lo. Kan kaa in kan chim mi le kan tuahsernak a dan tuk ah cun Pathian zong a kan zum lo i Mipi zong nih an kan zum ti lo. Ni hin kan hmuh mi thil um tu ning cu asi ko. Huatnak pakhat hmanh a tel lo. Mah le hmuhnak zumhnak cio in tial mi asi.

Kan hmuh ka kauh ding le Kan fim thiamnak karhnak caah CAA tampi rel i zuam hna usih. One way lawng in hmuh le kal cu Thil tha a chuahter lo.
_______ David Bual Hre

Be First to Comment

Leave a Reply

Your email address will not be published. Required fields are marked *