Thawngpang Tha Tuk A Si: Dohthlennak Caah US Nih Dollar Nuai 136 Leng A Bawmh Cang Lai

US Nih Dohthlennak Caah Dollar Nuai 136 Renglo A Bawmh Lai. Myanmar ram zaukphung (democracy) le federal ram sernak caah dohthlennak tuahtu hna cu US nih Dollar nuai 136 renglo a bawmh lai tiah theih a si.

Hi bawmhnak pek ding kong hi kum 2023 chung US Cozah tangka ṭhenphawtnak upadi (Consolidated Appropriations Act of 2023) ah aa telmi a si i cu upadi cu Dec 29 ah President Biden nih fehternak min a thut cang.

Chin Association of Maryland (CAM) dirhtu le Excutive Director a simi Pu Zo Tum Hmung nih “US cozah tangka ṭhenphawtnak upadi cu President Biden nih min a thut cang i cu chungah Myanmar ram caah dollar nuai 136 renglo bawmh ding timi aa tel. Kan i lawm taktak” tiah a chim.

Dollar nuai 136 cu dohthlennak caah a za mi a si lo nain zeimawzat cu thlennak a chuahpi lai tiah zumh a si. Hi US cozah i Consolidated Appropriations Act of 2023 cu Senate nih Dec 22 ah an cohlan i House of Representatives nih Dec 23 ah an cohlan ve. Cuticun President nih Dec 29 ah fehternak min a thut.

Hi bawmhnak hi zeitikah dah pek a si lai ti cu a fiang rih lo nain tuan lei paoh ah a si ko lai tiah thiamsang hna nih an chim. Credit: The Chin Post

2008 Phunghrampi Remh Ding Le Thimnak Tuah Dingin SAC Le Tlangcung Hriamtlaibu 5 Lungtlinnak An Ngei. Dec 26-29 tiang, ni 4 chung Naypyidaw ah tuahmi SAC le tlangcung hriamtlaibu 5 hna tonnak ah a tlangpi in lungtlinnak 4 an ngei kho i cu chungah 2008 phunghrampi remh ding le 2023 ah thimnak tuah ding ti an i tel.

Tonnak ah aa telmi tlangcung hriamtlaibu hna cu NCA ah min a thu i Peace Process Steering Team (PPST) chungtel a simi Arakan Liberation Party (ALP), Democratic Karen Budhist Army (DKBA), KNU/KNLA-Peace Council, Lahu Democratic Union (LDU) le Pa-O National Liberation Army (PNLO) hna an si.

2008 phunghrampi remh ding timi ah zei zawn dah a si timi bel fiangin theih a si rih lo. Tutan SAC he tonnak ah PPST chungtel a si ve mi Restoration Council of Shan State (RCSS) le New Mon State Party (NMSP) cu an i tel lo.

Kum 2023 thimnak ah SAC nih Proportional Representation (PR) thimning hman an timh. Asinain 2008 phunghrampi ah cun NLD chan lio i rak hmanmi thimning First-past-the-post (FPTP) lawng a um. PR hi 2008 phunghrampi he aa kalh caah 2008 phunghrampi remh ding an timi hi zeidang a si lai lo. FPTP le PR kong a si ko lai tiah ramkhel hlathlaitu hna nih an chim. Tcp