Sagaing ramṭhen, Watlat (ဝက်လက်) peng kahdohnak ah SAC ralkap minung 3 an thi, cu a thi mi SAC ralkap hna cu vawlei ah an phum ta hna, tiah Watlat (ဝက်လက်) PDF nih cathanh an chuah. March 9, zaanlei suimilam 3:00 hrawng ah Shwebo pengkomh Watlat(ဝက်လက်) peng, Ganphyu(ကမ်းဖြူ) khua in Shwejin(ရွှေကျင်) lei ah minung
Thazaang 60 hrawng he rallam a sialtu SAC ralkap phu hna cu Watlat(ဝက်လက်) peng PDF battalion 2 le Pah-Kah-Phah (ပ.က.ဖ) phufonh nih Tawngkhung(တောင်ကုန်း) khua pawng ah an kah hna. Cu kahdohnak ah cun SAC ralkap lei in minung 3 an thi i, minung 2 nih hliamhma an tuar, tiah Watlat (ဝက်လက်) PDF battalion 2 nih cathanh an chuah.
Nizaan March 10, zinglei suimilam 6:00 hrawng ah Tawngkhung (တောင်ကုန်း) khuachung mipi umnak inn 5 cu SAC ralkap nih meikhangh in an hrawhpiak hna. Kahdohnak ah a thi mi SAC ralkap chungtel pakhat ruak cu SAC ralkap phu nih vawlei chilh sawh in an phum i Pah-Kah-Phah(ပ.က.ဖ) phu hna nih an hmuh ṭha tein a ruak an phumpiak ṭhan. Kaphnih kar kahdohnak ah Watlat (ဝက်လက်) peng PDF in hliamhma tuar an um lo, tiah an cathanh ah an langhter chih.
Cun Magwe ramṭhen, Yesagyo (ရေစကြို) peng March 8 ah khan SAC ralkap minung 50 hrawng cu zaan suimilam 9:11 ah bomb lung 2 puahhnawh in an doh hna caah SAC ralkap chungtel minung 8 an thi, hliamhma tuar an tam, tiah Myaung (မြောင်) peng mizapi vengtu phu le security phu-CDSOM nih cathanh an chuah. SAC ralkap phu bomb puah an tonnak ah SAC phu nih meithal an thlah ve len nain, mizapi vengtu ralkap phulei hliamtuar um lo in hnu an tolh kho ṭhan, tiah theih a si.
Shwebo-Mandalay Ah SAC Ralkap Motor 6 PDF Phufonh Nih Bomb In An Doh: March 10 zaan Sml 6:29 ah, Sagaing ramṭhen, Shwebo-Mandalay lamthluan, Saininggyi(စိုင်နိုင်ကြီး) khua pawng ah SAC ralkap motor 6 cu Shwe Bo Yanbalu phu le ṭangrual phu- Nyaung Yu phyohcia, Trawwin Daung le Shwe Bo Defense Force SBDF hna nih bomb puahhnawh in an doh hna i motor 2 an hrawh lengah ralkap 5 leng an thi kho, tiah Yanbalu phu nih thawng an thanh. Credit: The Chin Post
Be First to Comment