Theih Nuam Taktak Si! SAC Ralkap Nih An Tlaihmi Minung (15) Hna Cu Mipi Ralkap Hna Nih An Va Bawmh Khawh Hna E

SAC Ralkap Umnak Hmun Ah A Taangmi Tualchung Mi 15 Cu PNDF Le KNDF Nih An Chanhchuah Khawh Hna. Shan ram thlanglei Pinlaung peng Taungsalone khua cu SAC ralkap nih an rak luhhnawh hna lioah zaam manh loin khuachung ah a taangmi mi ngandam lo tualchung mi 15 cu PNDF le KNDF nih an chanhchuah khawh hna tiah NUG cozah runvennak lei vuanci zung nih a thanh.

March ni 8, zinglei suimilam 8:00AM hrawng ah Pinlaung peng Taungsalone phungki sianginn le khualu lei ah a ummi pura ah SAC ralkap an phan tiah thawngpang theih a si lioah tualchung mi hna cu an rak zaam, cu lioah a zaam manh lomi tualchung mi hna cu Pa-O National Defence Force(PNDF), Karenni National Defence Force(KNDF), Naypyitaw tualchung hriamtlai phu NPT PDF, 1003 battalion phufonh nih an rak chanhchuah hna.

Riahcaw a dih ruang ah riahcaw laak ding in a kalmi pakhat sin in khuachung inn cheukhat ah tar le ngandam lomi, thluak lei damlonak a ngeimi hna khuachung ah an rak um ti thawngpang an theih tikah SAC ralkap an umnak he meter 100 in 150 tluk aa hlatnak tiang tualchung hriamtlai phu hna nih naih in tualchung mi 15 cu an chanhchuah khawh hna tiah a thanh.

Chanhchuahmi tualchung mi hna cu ngamdamnak lei rianṭuantu hna nih an herhmi ngandamnak zohkhenh in le riahcaw an pek hna hnu March ni 19 ah KNDF le PNDF nih chanhchuahmi 19 cu hmunkhatte ah an pumhkhawmh hna, cu hnu March ni 22 ah phaisa 20,000ks cio an pek hna pin ah anmahle chungkhar sin ah kalter an si tiah NUG cozah runvennak lei vuanci zung nih a langhter. The Chin Post

Nihin, March ni 22 zinglei suimilam 8:00AM hrawng Mandalay, Aungmaythazan peng lakphak dawr hmun khat ah inn za uktu 2 meithal kah an tong tiah tualchung mi nih an chim.

Aungmaythazan peng, Amarahtani nichuahlei sang no.80, 7/8 lam kar ah a ummi lakphak dawr ah kah an tong tiah theih a si. Kah a tongmi hna hi Amarahtani nichuahlei sang 19/a inn za uktu U Win Ko le 19/b inn za uktu U Soe Naing hna an si.

Kah a tongmi inn za uktu hi an pahnih in kum 60 luan hrawng an si, pakhat cu a hna hram ah an kah i pakhat cu a paw ah an kah, Mandalay siizung ah an kalpi hna tiah theih a si.

Inn za uktu minung 2 an ṭhutnak lakphak dawr chung ah luhhnawh in meithal aa put mi mino 3 nih an kah hna tiah SAC ralkap lei nih an thanh. TCP