Thi Kir : A Thi tiah an Ruahmi Chin Tlangval Nihin ah Nungdam in a Luat
A Thi tiah an Ruahmi Chin Tlangval Nihin ah Nungdam in a Luat
—–
Yangon, Tamwe lamzawhnak ah meithal kahnak in a nunnak a liam tiah a chungkhar nih an ruahmi Mang Suan Khai cu nihin chun sml. 11:00 ah nungdam tein a luat, tiah chungkhar nih an chim.
Hringtu a pa nih, “Nihin sml. 11:00 hrawng ah dam tein inn ah a rak phan. Kan i lawm tuk ning hi kan chim kho lo. Tlaih a ton hnu ah sizung le palik sakhaan ah kan kawl i kan hmuh lo tik ah a thi tiah kan rak ruah. Innsein thonginn in nihin ah minung 700 hrawng an thlah hna i kan fapa zong aa tel ve,” tiah a chim.
Mang Suan Khai hi a thi tiah an rak ruah i March 7 ah khan ruak um lo buin Khrihfa phung ning in ruakhumh tthutpinak zong an inn ah an rak tuah. Lamzawhnak ah ralkap nih meithal in an rak kah hna i, Mang Suan Khai hi a phei ah an rak khen. Cu dih cun ralkap nih an kalpi i ralkap sizung ah an rak thlop. An thlop dih in Insein thonginn ah an kuat tthan hi a si. The Chin Journal
