Press "Enter" to skip to content

Thih Dar:Coronavirus zoh nakin khum le cheu hngakchia pate a thih.

Saudi Ariabia ram ah hngakchia te pakhat cu Covid-19 zawtnak a neih le neih lo an cheknak ah a nunnak tiang a liam tiah thawngpaang theih a si, Coronavirus zawtnak hi mi zei paoh nih ttih ciomi zawtnak cu a si ko nain hi bantuk thil hna a hung chuah tik ah Coronavirus zawtnak maw ttihnung deuh sibawi te dah timi bia halnak hna a chuak ngai.
Hngakchia te a thihnak a ruang bik cu Covid-19 zawtnak a neih le neih lo hi a hnaar bak in pipe hrolh in an chek, mah ti an cheknak ah an hrolhmi pipe kiak in le a hnaar chung taan ruangah si. Mah thil hi a luan ciami Zarhte Ni (July ni 18) ah khan a cangmi si i a thimi hngakchia te kumkhat le cheu lawng a si rih.

July ni 17, kum 2020 zan ah khan hngakchia te cu a tak linh ruangah Shaqra Hospital ah an kal pi, hngakchia te hi a ngandam ngai ko timi sibawi te nih an hmuh ruangah Coronavirus zawtnak a neih le neih lo cheknak caah a herhmi nasal swab la ding in bia chahnak an tuah.

Hngakchia te thaw dawpnak simi a hnaar bak in Covid Nasal Swab an laak khawhnak ding caah pipe an hruk piak, swab an laak lio ah hngakchia te hnaar chungah an khumhmi pipe cu kiak in a hnaar chungah aa taap. A hnaar chungah aa taapmi pipe cu laak piak a herh caah mehse pe in operation an tuah colh.

Kan fate hi zawtnak dang zei hmanh a neimi si lo, operation tuah ding zong cu a hram thok ah cun ka duh bak lo, a si nain ka chungkhar hna le sibawi te nih ttihnung lai lo an ti ruangah ka cohlaannak si tiah hngakchia te hringtu a pa le a pu hna nih Saudi thawngzamhnak simi Al Arabiya nih interview an tuah hnanak ah an chim.

Operation tuahnak cu zinglei suimilam 1:00AM ah an dih i a hnaar chungah aa taapmi pipe zong tlaamtling tein an chuah khawh piak ko. A si nain hngakchia te a lung hung fim tik ah hringtu a nu nih hngakchia special sibawi a auh colh, cun an fate a dirhmun tthat le tthat lo a chek ter colh bantuk in a hnaar chungah aa taapmi pipe hi ttha tein an chuah khawh le chuah khawh lo chek tthan ding in a hal.

Sibawi te nih cun operation kan tuah lio ah hin thisen chuah tuknak le thaw chuah khawh lonak timi surgery complication zei hmanh kan tong lo tiah an chim. Cun sizung rianttuan tu hna nih hngakchiate hringtu nu cu sibawi pa a rak phanh khawh rih lo caah hngak rih ko tiah an chim. Mah ti cun a thaizing, July ni 18 zinglei suimilam 9:00AM ah cun mah hngal loin a um cang.

Hngakchia te hringtu pa nih sibawi ngan rak kan auh piak uh tiah a hal chih hna, cu tik ah Radiologist nih X-ray an vun tuah tik ah cun hngakchia te i a cuap thaw dawpnak khat lei cu a pih bak ko an hmuh. Cu ruangah sizung ttha deuhmi ah kalpi ding in an hal, sibawi te zong nih kalpi ko uh tiah an onh ko hna nain mizaw phur tu motor an hngah lio ah hngakchia te cu a thi.

Mizaw phurtu motor hi zei ruangah dah tlai tuk ah a phanh timi cu theih khawh si lo, hi kong he pehtlai in hngakchia te hringtu pa nih hlathlainak tuah ding in cozah nawl nei tu sin ah a hal hna. Cun Saudi ram ngandamnak lei vuanci simi Tawfiq bin Fawzan al-Rabiah tiang nih a lung tthat lonak kong a chim bantuk in hlathlainak tuah ding in nawl a pek hna.

Be First to Comment

Leave a Reply

Your email address will not be published. Required fields are marked *