Press "Enter" to skip to content

Tih Nung Ko : Biden Nih Teinak A Hmuh Ah Cun Stock Market Cu Ai Hrawk Dih A Si Ko

Nan ka thim than lo a si citcet ah cun kan stock market hi ai rawk dih lai, tiah Trump nih a tu le tu American mipi ralrin a pek hna. A taktak ah cun, a tu i thil umtuning hi a let ta lem lam.

“Biden thim a si ah cun markets pawl an i rawk dih lai,” tiin August le October kar lawng hmanh ah khan voi 6 khengte Trump twitter in a thlah. Cu bantuk biachim cu cuhlan president pawl nih chim an i sum zungzal mi bia asi.

“The Dow Jones Industrial hi 29,000 lenglo tiang in a hlawh a tling! Nan President ka si mi hi cu nan van a va tha ve aw… Joe Biden chan ah cun siseh law ai rawk dih hnga,: tiin Sep. 2 ah khan Trump nih twitter a thlah.

Zanmangchia muisam a kengmi Election buaibainak ruangah markets pawl an thathawhnak a zor ngai cang ko nain, Pfizer le Moderna nih vaccine serchuah khawhnak lam an hmuhchuahmi thawngpang nih investors pawl tampi an tha a thawhter than cang hna.

S&P 500 le bang cu 1932 hnu in a thabikmi election week a tinco khawh cang. Monday i faak ngaiin a tlak ko bu zongah November thla chungah the Dow hi 12% tiang a kai. Cucu 1987 January hnu in a caah a thabikmi thla (month) a si. The S&P 500 le Nasdaq zong April hnu in tu thla hi an caah a thabikmi thla a si.

“Biden hi market caah a tha lo, tiin thawngpang kan theihmi le nihin hi kan hmuhmi hi ai ralkah ngaingai,” tiah Hedgeye Rish Management ah research director Daryl Jones nih a chim.

𝐖𝐚𝐥𝐥 𝐒𝐭𝐫𝐞𝐞𝐭 𝐧𝐢𝐡 𝐓𝐫𝐮𝐦𝐩 𝐚𝐧 𝐜𝐡𝐮𝐚𝐡𝐭𝐚𝐚𝐤 𝐜𝐡𝐢𝐧𝐜𝐡𝐢𝐧 𝐜𝐚𝐧𝐠 : Trump nih tax cuts a tuahmi le sikaan a dorhmi ruangah markets pawl tampi a thathnem hna, ti cu lunghrim awk um lo a si. Asinain, China he trade war a thok mi le tax lak a tlaihchan tuk mi nih hin stocks pawl a chiatchuah bak ve hna.

Markets pawl a hnursuangtu ding a hleichuat policy pakhat hmanh kai hman lai lo, tiah Biden nih a chim. A economic team cu Monday ah khan theihternak a tuah cang i, investors nih an uar ngai mi former Federal Reserve chair Janet Yellen nih a economic team cu bia a ruah hna.

Kan business le economic dirhmun in conh a si ah cun, Biden hi ai ningcang deuh ngai te lai, ti a lang, tiah Jones nih a chim.

November chung i Wall Street ah thanchonnak nehnak a ummi nih hin hmailei kongkau i khuadawm bangmi a khamtu thilritpi hi tutan election nih a thumh cang, ti a langhter. Election hlan ah khan cun, constitutional crisis kongah le nawlngeihnak i apnak kongah lungretheihnak faakpi a um. Trump nih a sungh ruang i tazacuainak a tuahmi pawl pakhat hnu pakhat hnonpiak an vun ton hnu belte in khan cun, investors pawl an lu an vun mang lulh ve cang.

“Kan phanmi cu election ah an i tlukte sual lai, ti hi a si. A taktak ah, an i tluktuk. Asinain, election results a khupthal leh than khawhnak dingah Trump nih lam bi te lawng ai ngeih, ti hi pom cio a si ko cang” tiah Invesco ah chief global market strategist Kristina Hooper nih a chim.

𝗗𝗶𝗿𝗵𝗺𝘂𝗻 𝘁𝗵𝗮 𝗻𝗶𝗵 𝘁𝗲𝗶𝗻𝗮𝗸 𝘁𝗹𝗶𝗻𝗴 𝘂𝗺 𝗸𝗵𝗼 𝗹𝗼 𝗱𝗶𝗻𝗴𝗶𝗻 𝗮 𝗸𝗵𝗮𝗺 : Wall Street nih an hmuh ve ningah, Democrats lei nih an i ruahchan bantuk taitai in cun tutan election nih teinak a phakpi kho hna lo, ti a si.

Senate uk khawhnak dingah cun Georgia i a lawng chom dingmi senators hmunhma 2 hi Democrats nih an i uk khawh a hau i, Vice-president-elect Kamala Harris 50/50 in dirhmun ai ngeihmi hi an hrawhpiak khawh a hau.

Senate uk kho dingin Republican pawl biatak tein an cawlcang ve, tiah online prediction market a si mi Predictlt nih a chim.

2021 tiang zong i ai thenhmalmi cozah ah hin investors pawl caah thawchuak ngai a si dingmi corporate le pumpak tax Biden nih a karhter kho te lai lo. Cun, Democrats pawl nih duh ningin climate change kongkau i phung an sermi zong an lanhter kho fawn lai lo.

𝐆𝐚𝐦𝐞 𝐚 𝐭𝐡𝐥𝐞𝐧𝐠𝐭𝐮 𝐕𝐚𝐜𝐜𝐢𝐧𝐞𝐬 𝐡𝐢 𝐌𝐚𝐫𝐤𝐞𝐭𝐬 𝐩𝐚𝐰𝐥 𝐧𝐢𝐡 𝐚𝐧 𝐢 𝐡𝐦𝐚𝐢𝐭𝐡𝐥𝐚𝐤 : Main Street ah zatlaknak a karh lio ah Wall Street ah cun khuang an cawi. Fall khuati a phaak le cangka pulrai nih teirulcham pungsan in ai laak ve i, mizaw le sizung a phanmi an karh chinchin cang. Lockdown le sikaan an chap, federal bomhnak nih cun le donghcah lei a panh.

Chungkhar nih an i ngeimi dawr hme tete (mom-and-pop shops), baisikup zung, hotels, airlines le tirawl dawr ko hi an ngan a faak khun. Zarh khat hnu zarh khat in rianlo dirhmun a karh chinchin, November in cun cozah rian khanhnak thazang a derthawm chinchin cang, tiah Friday ah khan cozah nih thawng an thanh.

Karh lei a panh mi pulrai lonh in khamnaksii an sermi lawng investors pawl nih an i hmaithlak cang hna.

“Vaccine hi game changer taktak cu a si. Stock market pawl nih hin nihin a tonmi harsatnak cungah si lo in, a thadeuhmi hmailei ruahchannak tu hi an i hmaithlaak cang,” tiah Hooper nih a chim.

Covid in a zualhma taktakmi thlopnak dingah kan sermmi vaccine hi 100% tiang hmual kan ngeihter khawh cang, tiah Moderna nih Monday ah khan thawngthanhnak a tuah cang. Kan hnung thla hnih thum ah khan cun hman awk tlak vaccine hi an ser taktak kho te hnga maw hi, tiin lungre lawng a rak thei.

A tu ah cun, 2021 chungah khin Covid nih faktukin a denmi khualtlawn lamlitnak rian telhchih in, a dang economy vialte an i letthal dih than cang lai, tiah ruahchannak nganpi a um cang.

Hi ti ning a si ko ah cun, 2021 ah khin cun global GDP hi 5.4% tiang a kai te lai. Cucu 1973 hnu in a thabik kum a si te lai, tinak a si. US GDP hi 4.5% tiang a kai te lai i, cucu 1999 hnu ah a thabik dirhmun a si te lai, tiah Bank of America i economists pawl nih chimchungnak an tuah.

“Virus kum, ti si lo in, vaccine ser kum, lockdown kum, ti si lo in, rian onthan kum, zatlak kum, ti si lo in, i hrimthan kum, ti a si lai,” tiah Bank of America ah chief investment straitegist Michael Hartnett nih Monday ah capar a chuah.

𝗠𝗶𝗿𝘂𝗺 𝗹𝗲 𝗺𝗶𝘀𝗶𝗳𝗮𝗸 𝗸𝗮𝗿𝗹𝗮𝗸 𝗸𝗮𝗵𝗰𝗵𝗮𝗽 𝗮 𝗸𝗮𝘂 𝗰𝗵𝗶𝗻𝗰𝗵𝗶𝗻 : Market a thanchomi nih hin thilcawtu pawl le corporations sungh lei panh lo tein thathnemnak a pek hna lai. Cu nih cun economy tha a thanchoter fawn lai.

Asinain, Wall Street hi V-shape in ai hrim than tikah i khahlonak dirhmun a chuahpi ve. A ruang cu, market thanchoter a si lio ah zeihmanh a tingco ve lo mi American mipi millions tampi an um ve rih.

American chungkhar dihlakin 52% hrawng lawng hi market ah investment ai ngeihmi an si. Cu hna lak zongah tam u hi cu 401(k)s le retirement accounts hmang lawng in invest an tuah hi a si, tiah the Pew Research Center nih a chim. Direct in market ah invest tuahmi chungkhar hi cu 14% lawng an si.

Stock market a thancho mi nih hin mirum le sifaak karah kahcham tuktuk in a cawhpiak ve hna, zeicahtiah mirum lawng nih hi bantuk game ah hin sawhkalhnak thazaang an i ngeih kho.

2020 i a hmasa thla hnih thum chungah khan, American nih a ngeihmi stocks le a fekmi funds dihlakin 87% hi 10% lawng a si mi American mirum chungkhar lawng nih an i haikonh, tiah the Federal Reserve nih a chim.

Stock hi ahonih an vai ngeih pek ah, markets hi cu a zungzal in a kai peng kho lo. Vaccine cung i an chiahmi ruahchannak an i thathnempi kho mi a si. A tu tein Wall Street in ai thok cang. S&P 500 hi March 23 hnu in 61% tiang a kai manh cang. Cu thawngpang nih cun market pawl hi chunglei in an tha a thawhter ngaingai manh cang hna.

“Asinain, a nganmi stock market pawl nih a miak an hmuh nih hin khat lei ah a thalomi thil a chuahpi lai lo, tiin ruah awk a si hrimhrim lo. Thilman a kai lai, tax a karh lai, khat le khat karlak sachuk man a kai lai. 2021 ah khin thilman thlung tawngin a kai te lai,” tiah Bank of America i Hartnett nih a chim. Chelsea Bawi

Be First to Comment

Leave a Reply

Your email address will not be published. Required fields are marked *