Press "Enter" to skip to content

Tlangcungmi caah cun β€œDemocracy Maw Na Duh Deuh Federal/Mahte-uknak dah?” ti biahalnak um Sehlaw>>>>>>

Lungrual kan herh rih! Kan tei hrimhrim lai!
– Salai Ceu Bik Thawng
_____________________
Khah…. hun ihne tualmal rih ko hna usih!
(Biakhiahnak caah a biapimi-thil le zualral-thil thleidan thiam herh)

Tlangcungmi caah cun β€œdemocracy maw na duh deuh federal/mahte-uknak dah?” ti biahalnak um sehlaw federal kan ithim dih ngawt cio ko lai. Cucaah cheukhat nihcun β€œziah democracy cu tlangcungmi caah a biapi bik asi tung lo, aziahdah federal/mahte-uknak lohma kaltak in democracy tiluan ah kan i peih dih kun ne?” tiah biahalnak tete a um. Keimah zong miphun covo le federal β€œpakhatnak” ah a chiami ka si ve ko nainβ€”hitin tawi tein fianter ka duh.

Eisenhower timi pa nih urgent (zualral) timi le important (abiapimi) timi thenhaithiam a herhnak principle a chuahmi cungin zohchih ah a fiang ngai ko tiah ka ruah. Abiapi bik kha hmasa bik ah tuah hrimhrim ding tinak si theng lo i ahmasa ah kan tuah ruangah cucu a biapi deuh tinak zong a si thlu lem fawn lo. (Tahchunhnak ahβ€” zingka kan thawhka in hmasa bik ah facebook kan zoh ruangah khakha a biapi bik si theng loβ€”thilthar le zualral hna um sual maw tiah chikkhat van zohta bia a si).

Atu ah ralkap uknak thlaaknak le democracy thlennak caah mipi nih kan thazang dihlak kan bungh. Cucu zualral(urgent) thil a si caah a si. Kan ramkhel ah a biapi bik a si tinak si lo nain atu lio ah zualral bik a si caah a si. Atu thla hnihkhat asiloah kum hnihkhat chungah kan tei lo ahcun kan tei thai ti lailo, asiloah, cantha(chance) a um than ti lailo caah a si. Ukraine ram mipi dothlennak cu ni 85 a rau.
Federal/miphun-covo khelnak cu kan thih tiang kan khel ding si ko. Kawl nih an ti tawn bantuk in Democracy-pakhatnak, Federal-pahnihnak kan tinak a si hrimhrim lo.

Cucaah ahohmanh lungawtawm hngin lo tein le thachia lo tein kan thazang dihlak in ralkap uknak kan thlaak khawh hlan tiang dir-awnh ko hna usih. Atu tlawmpal ah a nak/rang aa hliah colh ko lai. Kan tei pek kan sungh pek ahβ€” khi hnu cunβ€” kan miphun lohma ah kan kir dih than te ko hna lai.

Biakilh: Ralkap-thlaak le democracy lohma kan lim khin Kawl pawl cu β€œrian lim” an ti te lai i an idin te lai. Kannih tlangcungmi pawl belte cu kan cho canceo lawng si rih lai caah federal/miphun covo caah idin loin lohma nawr rih kan hau te lai. Cucu kan ram tuanbia ah kan ton cia cangmi a si ko. Cucaah lung-ne ngei tein le tha hman thiam tein hmainawr cu kan hau ve).

Lungrual kan herh rih! Kan tei hrimhrim lai!

Credit: Salai Ceu Bik Thawng

Be First to Comment

Leave a Reply

Your email address will not be published. Required fields are marked *