UN Palai Pakhat Le Myanmar Ralkap Ai Awh Pakhat Cu An I Chawn Bia

Myanmar ralkap in ralkap uk thu a suahmi ah UN cu a theitawkin tan a la rero lai ih Myanmar ralkap cu an thu hnuk kirsal dingin le thuneihnak cu hriltlin NLD hnenah hlansal dingin zangfah an dil rero.

Ram 15 telnak UN Security Council thurelnak khalah Russia le China khal lungkim in Myanmar ralkap cu a kaihmi pawl thlah zalen lohli dingah theihter an si. Hivekin ram 15 rori lungkim thluh ih thu an rel caan a tam lo tiah theih a si ih Russia le China rori in an lungkimpi cu karbak thatuk pakhat a si thu UN lamin thu an suah.

UN Secretary General Antonio Guterres “UN in Myanmar ram buainak thawn pehpar aw in thu kan suah tharmi cu Myanmar ram daihnak le rualremnak hrang a si ih kan zaten lungkim in thu kan suah thei timi cu thupi tuk hleice le kalbak thatuk pakhat rori a si.

“Culawng siloin UN in Myammar palai ih kan hmanmi Christine Schraner Burgener le Myanmar ralkap aiawh ralbawi Soe Win khal online in an be aw. Cumi ah UN palai cun thu kan suahmi siseh,ralkap cangvaih dan cu Democracy muangtertu a si thu a sim tlunah UN cun Myanmar ralkap cangvaih dan kan mawhthluk zet thu a theihter. Kaihmi pawl thlah zalen lohli ding khal in zangfah dilnak a nei rero a si,” tiah a ti.

UN palai le Myanmar ralkap aiawh biakawknak ah Myanmar ralkap lam khal in thurelmi tamzet an nei ve ih “Hrilawknak dik lo thu, thuneihnak an laknak san ,zangfah an dil rero nan, simfiangnak um lo ruangah thuneihnak la an si thu pawl an rel ve. UN lam in Myanmar ralkap cu zangfah a dil rero ih ralkap in a san an rak sim ve. An be aw leh dingih UN dilmi Myanmar ralkap in a hlawhtlingter lo asile thuhla dang a um leh rori ding a si. ( BBC ) vapualauaw