Press "Enter" to skip to content

US speaker Nancy Pelosi khual lam nih Democracy le American ram biakamnak a fehter chin

Taiwan Ah Drone A Zuan Caah Taiwan Runvennak Zung Website Doh An Tong: Taiwan ram cung ah lunghrinhmi drone a zuan caah Taiwan runvennak zung website cu hacker nih an doh, tiah Taiwan nawlngeitu nih nihin August 4 ah an chim. US House Speaker Nancy Pelosi cu Taiwan a tlawn hnu in Taiwan runvennak zung nih atu bantukin thawng an thanh.

Pelosi cu Taiwan a tlawn caah Tuluk nih lehrulhnak ah Taiwan pawngkam ah raltuk cawnnak an tuah i, Taiwan in ti lam meng 12 pawnghrawng ah raltuk cawnnak an tuah, tiah runvennak zung nih an langhter. Voidang ah kan ton bal lomi a si i, Tuluk nih Taiwan cu ti lam le van lei he phihkhamnak tuah a timhmi a si kho, tiah runvennak zung in ralbawi pakhat nih a chim.

Tuluk nih Taiwan cu Tuluk ram ramkulh pakhat bantukin a ruahmi a si i, ramdang palai a chiah zong a hau lo tiah a ti. Culio ah US palai Nancy Pelosi nih Taiwan a tlawnmi cu Beijing thin a phawh tuk hranghran. Meithal kuan he raltuk cawnnak a tuah pinah Taiwan pawngkam Area 6 ah raltuk cawnnak ka tuah lai, tiah Tuluk media Xihua nih a thanh.

Nancy Pelosi cu Taiwan in S. Korea ram lei a lanh caan tlawmpal ah Taiwan Island cung ah min hngalh lomi drone a zuang i, Taiwan runvennak website cu an doh caah caan karlak pehtlaihnak a rawk, tiah theih a si.

US speaker Nancy Pelosi khual lam nih Democracy le American ram biakamnak a fehter chin i, Tuluk ṭhihphaihnak nih vawleicung hruaitu hna cu Taiwan i an tlawnnak lam a kham kho hlei lai lo, tiah Taiwan nawlngeitu hna nih an chim. Credit; The Chin Post

Yekyi Ah Rammi Sinak A Ngei Lomi Minung 25 Tlaih An Tong, Pakhat A Thi!: Ayeyarwaddy ramṭhen, Yekyi peng Kuanga Taichaung kalnak lampi ah nizan August 3 zinglei ah rammi sinak a ngei lomi minung 25 cu palik nih an tlaih hna. An tlaih hna lio ah motor khaltu pa cu a zaam i, a cung ah aa citmi pahnih cu an tlak caah pakhat a thi, tiah palik he naihniam mi pakhat nih a chim.

Rammi sinak a ngei lomi minung 25 cu lampi ah tlaih an tong i, cu chungah nu pahnih cu meng tung 44/0 le 44/1 karlak ah motor cung in an tla i, pakhat cu a lu a kuai caah a thi, tiah theih a si.

Palik he naihniam mi pakhat nih, “An tlaihmi hna cu minung 25 an si. An kan tlaih sual lai tiah a zaammi pahnih lak ah pakhat cu motor cung in a tlak caah a nunnak liam. Yekyi palik camp ah a herhmi tete halnak le chekhlatnak an tuah hna,” tiah a chim.

Tlaih a tong mi hna chung ah nu 11, pa 11 le kum tling lo ngakchia 3 an i tel. Nawlngeitu hna nih humhimnak an lak lio ah an tlaihmi hna an si, tiah theih a si. Tlaih a tongmi minung 25 cu Yekyi palik camp ah an chek hna lai i, uapdi he aa tlak ning in taza cuai an timh hna, tiah theih a si.

Arakan Liberation Party Chungtel Lt.Colonel Khine Paw Lin Le Tang Riat Siangngakchia Pa Cu AA Nih An Tlaih Hna!: Arakan Liberation Party(ALP) in Central Committee chungtel Lt. Colonel Khine Paw Lin cu August 2 ah Arakan Army(AA) nih an tlaih, tiah ALP Secretary Khine Kyaw Khine nih a chim. Khine Paw Khine cu a inn ah kan va tlaih i, tang riat cawngmi siangngakchia pa Soe Min Ngaing zong kan tlaih chih, tiah AA nih an thanh.

Hi bantuk thil tuah cu Rakhine miphun karah buainak le remlonak thil a chuahtertu a si caah ALP nih kan cohlang hrimhrim lo. Cu pinah ULA/AA nih kan party hruaitu cheu khat le party chungtel ralkap hna cu an rak tlaih hna i, atu tiang an thlah hna lo, tiah ALP nih cathanh an chuah.

RELCHAP; WALDEN Sianghleirun Cu Eihmuar Online Sianghleirun A Si Tiah US Ah Taza An Cuai!: Min Aung Hlaing nih Minister ah a thimmi Dr. Thet Thet Khine, PhD degree a laknak WALDEN Sianghleirun cu eihmuar online sianghleirun a si, tiah a luacia April thla ahkhan US ah taza an cuai. Social Welfare Relief And Resettlement Minister Dr.Thet Thet Khine nih PhD a rak laknak WALDEN Sianghleirun nih cun Ph.D lak a duhmi hna cu an hlen tawn hna i, phaisa tampi an hal hna caah Washington um, National Student Defense Network nih a luancia April 11 ah taza a rak cuai, tiah theih a si.

Maryland ramkulh, biaceih zung ah WALDEN Sianghleirun cu taza an cuai i, minak nu hna le miphun tlawm hna cu a hlen hna caah tazacuai an si, tiah media nih an langhter.

WALDEN Sianghleirun nih Ph.D cu thla 18 kai lawng ah nan ngah lai, tiah a thanh i sinain an kai taktak tik ahcun kum tam tuk kai a si i tangka tam tuk a hal hna, tiah theih a si. WALDEN Sianghleirun ahhin singangakchia 49,000 an um i, cu chung ah minak nu 15,743 an um, tiah theih a si.

WALDEN Sianghleirun nih siangngakchia hna sin ah $ dollar sing 28 leng sianginn dihheu(fees) ca ah a hal hna, tiah National Student Defense Network nih a langhter.

Dr. Thet Thet Khine zong Ph.D ngah nakding ah har taktak in voi 16 tiang a rak i zuam tiah a va pa nih social media ah a langhter. WALDEN Sianghleirun nih siangngakchia hna cu caan saupi sianginn a kaiter hna i, tangka eihmuarnak lam a kawl, tiah New York Times nih a langhter ve. TCP

Be First to Comment

Leave a Reply

Your email address will not be published.