Press "Enter" to skip to content

Vanlawng Cung ah Pa pakhat nih nu Pakhat Faktuk in Ningzah nak a Siam Piak

A mitthli tla lo dingin a sikhawh chungin ai sum ve ko nain a mitthli cu khamawk thalo in a tluang thluahmah . Zeiruang ah dah hitluk in a ngeihchiat i a mitthli hi a tlak hnga ?Hi nu cung i a cangmi thil hi zeidah a si hnga a donghtiang rak rel .hi nu a kong kan chim mi a min hi “Sovana Philip” ti a si i a mah hi pasal ngeimi le fa zong pahnih ngei cangmi a si . mi nunnem le mi zaidam ngai a si.

Asinain a mah nun ah hin ai duhlo mi a um ve , cucu a thau tuk mi le a rit tuk mi cu a si . Can zeimawzat chung cu a taksa tau le rit cu a tlak niam khawhnak hnga ai zuam tuk ve i , a taksa thau ruang ah hin a duhlo tuk mi bia le hmurka zong a tong tawn ve mi a si fawn.A hnu ah cun a thaumi cu ai ningzah pi hi a taksa cu mi lak ah a zahpi cang i a thinlung te in ningzah nak le mihmai ah i phuhrun nak te a ngei cang.

A sumdawn nak le a thildang rianherh ruang ah khual a tlawng ve tawn i vanlawng cung thutnak ticket lak tiang zong ah a mah he midang thut ti duhlo in midang nih an lak ve lonak thutnak cu a mah te lawng thu dingin a lak tawn .Asinain vanlawng cung khualtlawngmi an tam can ah cun ticket a full dih can zong a um ve kho tawn . Tutan zong “Sovana” cu khualtlawng dingin ai tim than i ticket a full dih cang caah a mah lawng thutnak ah thu lo in midang he a thu ti ding an rak si ve cang.

“Sovana” nih cun ticket a la ciami chungin ai letmi zong an um kho men tiah ticket la ciami chungin ai letmi an um sual hnga maw tiah a van check than i a hohmanh an i let lo caah Sovana cu midang he an thut ti hrimhrim a hau ve cang .Vanlawng cung an luh hlan deuh gate i an i line lio hrawng zong ah cun a thau tuk caah a thinlung tein a ningzak i midang mit ah keimah lawng te an ka ngiat i an thinlung tein an ka nehsawh deuh ko tiah ai ruah i an i line khawh cun a rak nak in vanlawng cung ah cun a lut colh i a mah thutnak ding thlalangawng pawng ah cun a va thu colh.

A mah pawng ah a rak thu ve mi putar kum 60 hrawng minung pakhat cu a rak thu ve i Sovana cu a mitser te in a zoh len i sovana zong nih cun ka thautuk caah a ka zoh ti cu elawk thalo in ai theih pah ve fawn .Putar pa nih cun Sovana cu a thautuk ruang ahb ka zoh timi hi i theih seh ti deuh phun cun a zoh chih i a taksa cunglei in tanglei tiang cu a zoh i a ngiat chih . Cukhawh cun a phone cu ai lak i message a type thluahmah i ka ca type mi hi hmuseh tiphun cun Sovana hmuh khawh ding cun a phone cu a langhter pah fawn.

Cu a phone in message a type mi cu a nupi sin ah ca a rak kuat mi a si i “Nuthaupi pakhat pawng ah ka thu i a thau le a rim nih hin ka luak an chuah ter , tutan ka khualtlawn cu ka lo o ” tiah Sovana” nehsawh ngai cun a nupi ca a rak kuatmi a rak si .Cu putar pa nih a nupi a kuatmi message a kuatmi cu Sovana nih a hmuhtik ah thlalangawng lei a hoih i a mah tein ka thau tuk tiah a lungrawk ciami a si pin i cuti putar pa nih a rak ti cu a ngeihchia tuk i a mitthli tla lo dingin ai zuam tuk nain ai sum kho bak lo a thli tein a mitthli a luang thluahmah i a ngeihchia kho tuk.

Culio ah cun Sovana nih cun high school a rak kai lio i a taksa ai dawh ning le pa pawl nih an rak uar i an rak capo huam ning te hna a thar in a ruat i a tu a dirhmun he cuai a thlai tik ah a ngeihchiat a zual chinchin .Cuti a tap thluahmah lio ah cun an hmailei i a thumi pa pakhat nih an sining cu a rak theihthiam ve piak deuh hna i , Sovana pawng i a thumi puter pa cu ka pu kan thutnak hi kan i thleng lai tiah a rak hal.

Puter pa nih cun zeiruang ah dah kan i thlen lai i a rak ti ve i , na message type lio ka rak hmuh caah na siarem deuh lai kan ti i a si tiah a chim than i puter pa zong nih cun aw a rak ti i an thutnak cu an i thleng .Cupa nih cun Sovana cu a sikhawh chungin hmurka a thiamtawk cun a hnemh chih ve i a ngeihchiat nak cu a tuar thiam deuh . Ahnu ah Sovana nih cun ai lomhnak cu a hmurka in a chim thiam lo nak le khatluk ningzak le lungfak ngai in khualtlawn lam ah a thut lio i a hnem tupa cung i ai lomhnak cu a mah pumpak hmanmi facebook ah midang hmuh ve dingin a langhter than.

Social media ah a capost mi cu a ruahnak lengin mi tampi nih an rak ngeihven i an rak share piak tik ah mi tamtuk nih an rak hmuh i puter pa cung ah soisel nak bia le , a mah a hnemtu pa cung ah lomhnak bia pawl cu tampi an rak kuat i an rak comment .A mah a hnem tu pa zong cu mitha tuk a si tiah mi tampi nih an rak hlat hlai i hi pa hi bar pakhat ah manager pakhat asi ti zong theih a si fawn.

Sovana a hnmetu manager pa nih cun hiti hin a chim ve ” khati puter pa nih message a tial i a nupi a kuat lio zong kha ka rak hmuh dih ve i Sovana a ngeihchiat i a mitthli a tlak thluahmah zong ka rak hmuh dih . Ka thinhung tuk ve i vanlawng a tum hnu ah putar pa cu fakngai in hro i ti chih ka duh ve ko nain Sovana a tap tuk ka hmuh tik ah an thutnak tu i thleng dingin putar pa ka va hal nak a si ” tiah a chim ve .Mi ampi nih hipa hi mi ngeih chiat lio i a zohsawh kholo tu mitha a si an ti i an uartuk i an thangthat tuk cio , a hnu ah cun TV Show pakhat nih interview tiang an va tuah phah.

“Hi thil ka tuahmi hi lar ka duh ruang le social media ah mi theih hlawh ka duh ruang ah a si bak lo mi tampi le mi ngeihchia mi hnemh ka duh ruang tu ah a si deuh ” tiah a chim ve fawn .Sovana an komh ve nak i a chim mi ah cun ” Social Media ah ka thilton mi ka postnak a ruang zong hi kha putar ka huat tuk ruang ah a si hrim lo i , khatluk ka ngeihchiat lio i a ka hnemtu pa ka cung i a that ning ka ruat tik ah mi theih awktlak mitha a si ka ti caah ka post mi tu a si i kha putar pa zong kha ka thinlung dihlak in ka ngeihchiam cang ko ee” tiah a chim ve than.

Sovana nih cun ” na hmurka in a chuakmi bia kaa khat ruang ah khan mi pakhat a nunchung a thinlung ah hma na siam piak khawh i a nun ah philh khawh ti lo dingmi ngeihchiatnak na pek khawh ti kha i thei law , na hmurka in a chuak mi bia cu midang caah lomhnak le thazang a simi bia lawng chim kha i zuam zungzal ko ” tiah mipi zong bia a cah ta ve hna.

Hi kong hi a hman tuk mi a si i , Scychologist pawl nih cun hngakchia pakhat cu a hngakchiat lio ah midang nih nehsawh in capo ceihnak ah an hman i an soisel deuh pengmi hngakchia cu a upat tik ah a thinlung ah i hmuh niam nak a ngei i hawi a tluk kho lo tiah an chim fawn . Midang caah lomhnak le thazang pek nak bia a si mi lawng chim i zuam cio hna u sih.

Be First to Comment

Leave a Reply

Your email address will not be published. Required fields are marked *