Htilin peng, Ahkyiwarbin khua pawng kahdohnak ah council ralhraang Battalion-11 in Naing Lin Aung cu YDF nih a nung in an tlaih, April 26, 2022. Magwe ramthen, Htilin peng, Ahkyiwarbin khua pawng ah Council ralhraang le Yaw Defense Force (YDF) kar April 25 zing suimilaam 7:00 hrawng ah kahdohnak a chuak i council ralhraang lei Battalion-11 in Naing Lin Aung cu hriamnam he a nung in kan tlaih tiah YDF nih an thanh.
Kahdohnak hi minutes 45 hrawng a rau i ralhraang pawl cu YDF battalion 6, 7, 14 nih an bawh hna i an kah hna hi a si. Kahdohnak ah council ralhraang lei thi le hmapu an tam lai zumh a si. YDF lei hliam tuar an um lo tiah ka theih.
A nung in tlaih mi ralhraang Ralkap Naing Lin Aung he MA3 meithal zuun 1, zenthong bawm 3, ke lamh mine 1, kutcheh bomb 1, RPG bomb thei 1, 5.56 zenthong 216 le a dang thilri cheukhat kan lak. Tlaih mi Naing Lin Aung cu zulhphung he aa tlak ning kan zohkhenh ko tiah an thah. Crd; The Hakha Post
Relchap; Shan ramṭhen, Ywangan(ရွာငံ) peng Layking Le Ngiakalay (လယ်ကိန်းနဲ့ ညားကလေး) khua ah mino 21 cu SAC ralkap nih an tlaih hna, tiah theih a si. SAC rakap nih Ywangan khua hi i hmaithlak in thazaang tampi he an doh, tiah tualchung mi pakhat nih a chim. “April 24 ah SAC ralkap le hriamtlai phu hna kahdohnak a chuak. Thawngpang a daih in mino 21 an phone an check hna i an tlaih beh hna.
Khuate mi cheukhat zong an tlaih hna nain an tlaih hna zat a fiang lo. A luancia April 22 ah SAC ralkap nih Ywangan khua ah mawṭaw 5 le minung 70 in thazaang an chap i atu ahcun minung 400 an si cang,” tiah tualchung mi pakhat nih a chim. SAC ralkap nih mizapi tlaihkhih, thah nawnnak a tuah ruangah Ywangan peng minung 500 leng nih an khua an zaam taak. A zaammi hna ca ah a lamkip in bawmh an herh ko tiah theih a si. Crd; The Chin Post
Sagaing ramṭhen, Taze(တန့်ဆည်) khua, Shwedaungmin datsii dawr ah umhmun khuar mi SAC ralkap pawl cu tualchung hriamtlai PDF phufonh hna nih, April 24 ah an kah hna caah tamlak an thi i, 2 lawng an luat kho tiah theih a si.
“Kahdohnak hi zanlei sml 3:00 in aa thok i kan hriamngan kuan 28 in kan kah hna. Kahdohnak cu sml cheu hrawng lawng a rau,” tiah Myanmar Defense Force- MDF Battalion 1 in chimphuannak nawlngeitu nih a chim. SAC ralkap 30 hrawng cu MDF-Taze Tiger le ṭangrual phu hna nih kan kah hna i kanmah lei in hliam tuar kan um lo, tiah MDF – Taze Tiger nih cathanh an chuah.
Sagaing ramṭhen, Monywa zong ah SAC ralkap 30 hrawng rallam an sial lio ah ṭangrual PDF nih April 24 zinglei ah bomb in an puah hna i, SAC ralkap 3 faak ngai in an i hliam, tiah Chindwin Attack Force nih cathanh a chuah. SAC ralkap cu Bomb puah an ton hnu in meithal puah thorh in an puah i, Sulaykungzayet(ဆူးလေကုန်းဇရပ်) cu mei in an khangh, tiah Chindwin Attack Force nih cathanh a chuah.
Be First to Comment