Press "Enter" to skip to content

ZORO Hruainak In India Central Cozah Nih Nawlpekmi Duhlonak An Langhter Lai…Hi nawlpeknak hi a rannak in let dingah Central cozah cu an hal.

ZORO Hruainak In India Central Cozah Nih Nawlpekmi Duhlonak An Langhter Lai

Myanmar ram buai ruang i India ah a zammi kan unau hna cu India Central cozah nih an ram ah kuat than dingin ramri state a simi Mizoram, Nagaland, Arunachal Pradesh le Manipur uktu hna sinah nawl a pek hna.

Hi kong he pehtlai in Mizoram mipi cu an ngaih a chia, an lung a fak i an thin a hung. Cucaah March 17, 12:00 pm ah Zo Reunification Organization (ZORO) General Headquarters executive committee cu meeting an ngei colh. Meeting cu ZORO President Pu R. Sangkawia nih a hruai hna.

An meeting ah cun Government of India, Ministry of Home Affairs in Mizoram, Nagaland, Arunachal Pradesh le Manipur Chief Secretary, cun DG Assam Rifles Myanmar in a rak lutmi ralzam hna cu tlaih in a rannak in an ram ah kuat than dingin nawl a pekmi hna kong an ceih.

ZORO hruaitu hna nih cun himnak duh ah India ram i a zammi hna an ram ah kuat than dingin Government of India, Ministry of Home Affairs nih nawl a chuahmi cu an doh. Hi nawlpeknak hi a rannak in let dingah Central cozah cu an hal.

ZORO cu vawleicung hmunkip i a ummi Chin miphun (anmah nih cun Zo hnahthlak/Zofate an ti) dihlak i fumtom than i uknak pakhat tangah um kho dingin aa zuammi an si.

Cu ruangah Government of India, Ministry of Home Affairs nih ralzam kuat than ding a timi cu ZORO nih an duh lo, Mizoram cozah le mipi zong nih an duh lo.

Cucaah hi nawlpeknak doh le duhlonak langhternak cu March 23, 2021 ah thut buin (Sit-In-Protest) an ngei lai. Hi ni ahhin Government of India, Ministry of Home Affairs nih ralzam kuat than dingin nawlpeknak ca an pekmi hna copy cu mei in khangh a si lai.

Hi Sit-In-Protest ahhin mipi dihlak chuak dingin ZORO nih cun sawmnak a tuah.

Source: ZoRO FB Page

Be First to Comment

Leave a Reply

Your email address will not be published. Required fields are marked *