Press "Enter" to skip to content

Zualko : Afak Tuk Hringhran E Malaysia Ah Kan Unau Pakhat Nih A Kan Liam Tak

Tutan i Malaysia ah thih naak a tong mi hi Pi Matlani pasal Pu Lalrozauva S/o Than Zika Kelkang khua mi a si. Pu Lalrozauva le Pi Mantlani hi malaysia ah rianttuan in khuasa mi an si i, a pasal Lalrozauva hi Kal(kidney) fah damlo naak a ngei mi a si i 25-September 2021 ah khan a zawtnaak cu a tuar kho ti lo i a nupi cu a liam taak.

A ruak hi na khua Mizoram Kelkang ah tlun pi an duh tuk ko nain thil zeimaw ruangah ruak cu tlunpi awk a tha lo i Malaysia ah an vuiliam tiah theih a si. Lalrozauva nupi Matlani hi a tuar tuk i zaangfak tak tak a si i, nan thlacam piak naak zong bomh kan rak in hal hna.

Hi bantuk in Pu Lalrozauva thih naak kong hi Facebook ah post dingin an nu Matlani cu phone ka chawnh i a nih nih cun zeihmanh chim loin post dingin a ka senh caah kailom ngai ngai. Hmantlaak le video clip thenkhat zong Maena fanai nih a ka pek caah a cungah kai lom tak tak.

Pu Lalrozauva thih naak kong ah a nupi nih a chim mi pawl kan rak langhter lai. Kan nupa in rian ttuan mi kan si i, Kan pa hi kal leoi zawtnaak a ngei i cu ti ngai ngai in a zual lo caah sii dinding kan cawk i sii cu nichiar in a din piak i a mah zong cu ni fatin in a rian ttuan naak ah rian zong a ttuan kho peng.

A hun zual deuh hi 20 September khan a si i, a thaw chuah ai harh i a thaw a pit lengmang i, Matlan ka thi ko lai ka thaw chuah a hman ti lo tiah a ka chimh i kei nih cun ka tak ka vun i kholh lai i clinic(sekhan) ah kan kal lai i sii an in pek lai an in chunh lai i na dam ko lai na thin phang hlah mu na dam ko lai tiah ka ti i, aw, vun i kholh ne law kan kal lai mu tiin a ka leh i ka tak cu ka vun i kholh zawk zawk.

Ka tak kai kholh dih cun a rianran naak in sekhan pakhat ah kan kal i kan vai zohter nak Doctor pa nih cun kei nih cun ka zoh kho lai lo cu caah sizung lian mi ah va kal uh a kan ti i kal kal naak ding sizung min cu a kan ttial piak i sizung ahcun kal cawlh loin kan inn ah kan rak lawi ta.

Inn kan vun phan i kan pa cu a hung dam deuh cang lai tiin ka ruah lio ah a thaw a phih i a thawh a chuah kho ti lo caah a rian ran naak in kan chungkhat le hawikom na duh mi poh chawn hna law sizung lian mi ah cun a rian ran naak ka kal pi ko uh ka celh ti lo ka thi cang ko lai tiah a ka ti.

A ho dah ka chawnh hnga aw tiin kai ruat i kan pastor pa hi chawn ko ning ka ti i hmaikhap lo tak in pastor pa cu ka chawnh i kan pastor pa nih cun kan kal naak ding Ambulance zong a vun rat pi cawlh i, kan inn hmai an phak ahcun kan pa cu oxygen a rak herh tuk cang ruangah Ambulance chung ahcun a mah te in a tli i a luut cawlh i Oxygen cu an rak bunh cawlh.

Kei cu Ambulane chungah luh ve an ka senh lo caah taxi dang kai hlan i an hnu cun ka zulh ve hna. Kal kal naak ding sizung an ti mi cu kan phan i kan pa cu sizung chungah cun an luh pi cawlh i kei tu cu a lengah dawr pakhat a um i cu ka cun rak hngak tiah an ka ti caah dawr chung ahcun kan pa thawngpang result cu ka hngak.

Sau nawn an rauh hnu ah khin Nurse pakhat a rak chuak i a rak ka auh i zei bantuk thawng pang dah a ka chimh lai tiin thather bu in ka va kal i, Nurse cu kan pa cu zei dah a lawh a tha deuh cang maw tiah ka hal i, nurse nu nih cun a sugar blood hi control hmasat a hau i a tu hi kan control cuahmah lio a si i, kan control khawh ahcun sii dang zong kan chunh khawh lai tiin a ka leh i a lut than.

Keimah te lawng nih cun dawrchung cun ka hngak peng i zaan a si cang caah ka hawi le nupa hna cu ka phone hna i an mah zong cu caan rau lo te ah ka sin an rak phan cawlh ve. Nurse nu cu voikhat hmanh a rak chuak ti lo i kan pa result cu zei tin si hnga tiin thin phang tak in kan hngah lio ah Nurse pakhat cu a leng ah a rak chuak than i a ka auh.

A rianran naak in Nurse nu sin ahcun ka va kal i Sayamah kan pa cu zei dah a lawh cang tiin ka hal i, aw a sugar blood cu kan control cuah mah i a thawchuah a har ter tu hi a zeidah a si ti hi kan kawl cuah mah i kan hmu kho rih lo. Cun thisen zong pek a hau i thisen zong kan rawnh cuah mah lio, tii zong a chungah a tlawm caah ti zong kan rawnh cuahmah lio a si tiin a ka leh i nan mah zong a chungah nan luut kho ttung lo i inn ah va lawi ko uh a kan ti i a luut than cawlh.

Cu hnu cu voikhat hmanh an rak kan phone ti lo i zinglei zong a si cang caah i hngilh ve ko hna usih aw kan ti i kan pathum cun kan it hna i, tlawmpal te ka vun i hngilh i kai thang than cawlh i, suimilam ka vun zoh i 5:30am a si cang. 6:00am ah ka phone cu a hung ring.

Phone ka vun zoh cu kan pa um nak sizung in a si i keimah nih cun ka tlai ngam lo i kanau pa pakhat ka tlaih ter i nan paa kha tunai te ah a cat cang ee an vun ti i ka theih ka cu ka taksa hi a uai dih i mah hngal loin ka um. ka lung a hung fim thaan i kan rianttuan naak kan pu ka chawnh i a mah nih cun ruak zong cu tlamtling tein a kan laak piak i 25 September 2021 zanlei ah kan pa ruak cu tlamtling tein kan vuiliam.

Be First to Comment

Leave a Reply

Your email address will not be published.