Lubo Pa Min Aung Hlaing Ralhang An Phomh Hna

Mon ramkulh, Yee(‌ရေး) peng, Sapiah( စံပွ) khuachung ah thil caw ding in a kal mi SAC ralkap kah an tong i, SAC ralkap 2 an thi, tiah theih a si. April 2 zinglei Sml 7 :30 hrawng ah ralkap uniform loin Sanpiah khuachung ah thil caw ding in a lut mi SAC ralkap 4 cu KNU Brigade 6 Battalion 16 in, ralkap 2 nih a thli tein an kah hna, tiah YGF nih cathanh a chuah.

Cuka hmun i kah a tong mi SAC ralkap hna chung in minung 2 cu a hmun ah an thi colh. A taang mi 2 cu an hliamhma he an zaam, tiah theih a si. Sanpiah Payar Kone ah hmunhma a la mi SAC ralkap hna nih 40 mm in an rak kah hna nain mizapi ralkap 2 cu him tein an kir ṭhan kho, tiah theih a si.

SAC ralkap nih Yee ( ရေး) peng Hnin Sone ( နှင်းစုံ) khua le Sanpiah ( စံပြ) khua inn hna cu kan khangh lai tiah an hro hna pinah an lunghrinh deuh mi mino hna zong an tlaih hna caah zaan caan ah cun khua mi tam deuh cu anmah inn cia ah riak ngam loin an i thup hna, tiah khua mi hna sin in theih a si.

Magwe ramthen, Yesagyo( ရေစကြို) peng, Yelay Kyun (‌ေရလယ်ကျွန်း) ah SAC ralkap cu rallam hmun 3 ah i ṭhen in, Yelay Kyun chaklei ah a ra mi hna cu PDF a phufonh nih bomb in an rak doh hna i SAC ralkap 2 an thi i ralbawi pakhat hliam a tuar, tiah Min Chein um MGN 35 nih cathanh an chuah.

SAC ralkap hna cu Min Chien ( မြင်းခြံ) peng Battalion 5 in MGN 35 le The Value of Young Men hna hruainak in Myaung Fighter Defense Force, PDF Taloke, Chaung U Local Denfense Force le hriamtlai dang phufonh i bawm in bomb an puah hna, tiah theih a si.

SAC ralkap 20 hrawng cu bomb hmanhnak lei ah an luh khawh nakhnga Mizapi vengtu ralkap nih an lem hna i, bomb hmanhnak chung an phanh ah bomb cu a puak i SAC ralkap 2 an thih lengah tamlakte nih hliam an tuar, tiah theih a si. Bomb puahnak hmun ah hin ralhriam zeimawzat mizapi vengtu ralkap nih an laak, tiah Mizapi Vengtu ralkap nih an thanh.

Ayeyawady Tiva Ah SAC Ralkap Tilawng Myohhla PDF Nih An Kah Hna: Kachin rakulh, Shwe Ku peng Kyaukgyi khua in Myohla khua lei ah Ayeyawady tiva in a kal mi SAC ralkap seh tilawng 4 cu April 3 zing Sml 6:30 ah Myohhla PDF nih rak bawh in an kah hna i tilawng pakhat cu a pil, tiah theih a si.

Cu tilawng 4 cu Myohhla PDF nih 74mm hriamngan le hriamhme he an kah i tilawng pakhat cu a pil. SAC ralkap hna nih an riahcaw pawl cu heh tiah an thiar, tiah Myohhla PDF nih thawng an thanh. SAC ralkap lei nih hriamngan in an kah ve hna nain Myohhla PDF lei hliam tuar um lo tein hnu an tolh ṭhan, tiah theih a si. Credit; The Chin Post