A Poi Kho Taktak Ko E: SAC Ralkap Hna Nih Khua Mi (2) Meikhangh Nak In An Thah Hna E
Salingyi Peng Ah SAC Ralkap Nih Tualchung Mi 2 Cu Meikhangh In Zohchia Tuk In An Thah Hna. Sagaing ramṭhen, Salingyi peng Baittayat khuami 2 cu SAC ralkap nih meikhangh in an thah hna tiah Fighter 9 Force Salingyi in ṭuanvo ngeitu pakhat nih a chim.
April ni 1, zinglei ah SAC ralkap nih Salingyi peng Baittayat khua cu an luhhnawh i inn pakhat an khangh hnu ah tualchung mi 2 cu inn an khanghmi lak ah an khangh chih hna tiah theih a si.
“SAC ralkap hna cu Baittayat khua ah zan an riak, zinglei ah tualchung mi umnak inn 1 an khangh hnu ah sualnak ngei lo tualchung mi 2 an khangh chih hna. Mei khangh a tongmi hna cu Myinchainbua(မြင်းခြံဘွား) khuami Ko Aye Ko le a dang pakhat cu a ruak a rawh tuk caah aho si theih a si rih lo” tiah Fighter 9 Force Salingyi in ṭuanvo ngeitu nih a chim. The Chin Post
Sagaing ramṭhen, Monywa khuachung Myawady bank le Economic bank hmai ah security lami SAC ralkap hna cu kah an ton caah 4 an thi tiah Monywa peng pahlahphah in ṭuanvo ngeitu pakhat nih a chim.
April ni 2, zinglei suimilam 5:53AM hrawng ah Monywa khuachung Myawady bank le Economic bank hmai ah himnak ding ca ralvengtu SAC ralkap hna cu tualchung hriamtlai phu nih an kahdoh hna caah SAC ralkap 4 an thi tiah theih a si.
“Nihin, zinglei ah kan kahdoh hna SAC ralkap 4 an thi, kanmah lei in leilawng pakhat kan sung” tiah Monywa peng pahlahphah phu hruaitu pakhat nih a chim.
SAC ralkap hna cu Monywa peng tualchung hriamtlai pahlahphah le Monywa pengkomh battalion 22 Natsoe phufonh nih an kahdoh hna tiah theih a si. TCP
Chin ramkulh, Thantlang peng, Zahnaktlang Bungkhua mi Pu Sang Lian (kum 24) a thattu cu nihin April ni 2 ah khuami hna nih an tlaih khawh cang tiah theih a si.
April ni 1 zan ah Pu Sang Lian le a hawile pahnih cu India le Myanmar ramri Ṭio tiva ah ramriak in thlam chung an um lio zan suimilam 8:30PM hrawng ah, mi a thattupa hi thlam chung ah lut in Pu Sang Lian nih 4.8 zenthawng rawn cia a meithal tunmi cu la in a ruang um loin a kah hnu ah a zaam tiah theih a si.
Mitthat lainawngtu hi kawl ding in thawng an thanh hnu ah khuami pa hna nih Ṭio lei ah kal in chekhlatnak an tuah hnu nihin April ni 2 ah an tlaih khawh tiah theih a si.
“Mithat lainawngtu cu khuami nih kan tlaih hnu ah ṭuanvo ngeitu hna sin ah kan ap,” tiah khuami pakhat nih The Chin Post ah a chim. “Atu bantukin khuami nih kan tlaih khawh hi a ṭha ngai, hi hnu pinlei zong ah hi bantuk minung an um sual ahcun ram kalmi le khualtlawng lamlimi ca zong ah ṭihnung ngai a si, i ralrin deuh kan hau ko tiah” a chim chap.
Pu Sang Lian ruak cu nihin zanlei ah an vui lai tiah theih a si. Pu Sang Lian nih a nupi le kum 2 le thla 4 tluk a fapa a liamtak hna tiah theih a si.
