A Poi Tuk Ee!
Yangon ramṭhen, Mingalardung(မင်္ဂလာဒုံ) peng Pale ah April 5 zinglei suimilam 9:00 luan hrawng ah mizapi vengtu ralkap Ghost Ranger nu pakhat cu SAC ralkap nih an tlaih. Nu pakhat tlaih a ton hnu ah Ghost Ranger umnak hmunhma cu SAC ralkap nih an luhhnawh hna i, mizapi vengtu ralkap 6 cu tlaih an tong ṭhan, tiah theih a si.
Tlaih a tong mi hna bawm ding in a kal mi Gosh Ranger an phak lio ah SAC ralkap he an i tong i, minutes 5 hrawng kahdohnak a chuak, tiah Gosh Ranger hruaitu a si mi Bu Sin Kya nih Delta News Agency ah a chim.
Pawngtae Peng Ah SAC Ralkap Kah An Tong I Minung 2 An Thi: Pako ramṭhen, Pawngtae(ပေါင်းတည်) peng, Laepin(လဲပင်) khua SAC ralkap riahcaw chantu hna cu April 5, chunhnu suimilam 2:00 ah Pyi pengkomh battalion 3601, tat-khuai 1 nih an kah hna i, cu kahdohnak ah cun SAC ralkap 2 an thi, tiah Pawngtae (ပေါင်းတည်) mizapi vengtu ralkap in ṭuanvongeitu nih a chim.
A luancia March 15 ah khan Laepin(လဲပင်) khua mi hna cu ‘Mizapi vengtu ralkap hna he pehtlaihnak an tuah’ ti in an khua cu SAC ralkap nih an rak duah. Khua ah cun SAC ralkap hna nih umhmun an khuar caah khua mi minung 400 leng cu Theinkung(သိမ်ကုန်း) khua phung-ki sianginn ah umhmun khuar in an zaam hna, tiah khua mi nih an chim. TCP
Magwe ramṭhen, Ngaphe (ငဖဲ) pengchung ah SAC ralkap le PRA-Magwe hna kahdohnak a chuak i cu kahdohnak ah cun SAC ralkap 20 hrawng an thi, tiah People’s Revolution Alliance sin in theih a si. “SAC ralkap hna cu April 3 khan rallam sial ding in timhtuahnak an ngei i, cu thawng cu a hlankan in kan theih caah timhtuah cia in kan doh hna,” tiah PRA-Magwe ralbawi Ha July nih a chim.
“Kan i timhtuah ning bantuk in kan timhlamhnak hmunhma an phak lio ah bomb kan puah hna i, hriamhme he zong kan i kap,” tiah Ha July nih cun a chim. A hlankan in timhtuahnak kan ngeih lengah SAC ralkap minung thazaang 600 tluk a si mi ralkap ruun rallam an sialnak cu kanmah i runveng buin kan doh khawh hna i, kahdohnak ah hin SAC ralkap 20 hrawng an thi, tiah a chim.
Cu kahdohnak ah cun PDF in minung 2 hliam an tuar nain an hliamhma ah thinphan ding a um lo. Hliamtuar mi pahnih cu tholbul an si. SAC ralkap lei nih kahdohnak faak deuh chuahter ding in timhtuahnak an ngei i, minung thazaang an chap rih, tiah theih a si. Credit; The Chin Post
