A Tha Tuk Ee! Gangaw Pengah SAC Ralkap Hna Nih An Zuatmi Meheh (50) Leng An Chuh Kho Hna Hih
Gangaw Peng Ah SAC Ralkap Nih Zuatmi Meheh 50 Leng Pah Kah Phah Nih An Chuh Hna. Magway ramṭhen, Gangaw peng Taungkhayan palik sakhan ah zuatmi meheh 50 leng cu Pah Kah Phah Spring, Companny 7 nih March ni 1 ah an tlaih, tiah theih a si.
Cu meheh 50 leng cu Gangaw pengkomh Battalion 1 lei ah zuatkhalh ding in an pek(hlut) hna, tiah theih a si. Meheh 50 leng tlaih khawhnak ding ah Pah Kah Phah Spring phu in ralkap 4 cu Gangaw pengkomh Battalion 1 nih, pakhat ah kyats sing 120,000 cio in lawmman laksawng an pek hna, tiah theih a si.
Relchap; Ayewaddy ramṭhen, Angpu peng March ni 2 ah SAC ralkap cu PDF an um lai tiin an lunhrinhnak hmun ah rallam an sial i, bomb puahhnawh an ton caah ralkap 4 an thi, tiah theih a si.
Natpati tlang ah rallam a sialmi SAC ralkap hna cu March ni 2 ah bomb in kan puahhnawh hna caah SAC ralkap 4 an thi i hliamhma pumi an tam, tiah PDF nih cathanh an chuah.
March ni 1 lioah SAC ralkap pawl cu Makyipin ah zan an riak i ramlak in rallam an sial lai ti kan hngalh caah bomb kan hmanh. Kan hmanhmi bomb zawn ah an kal i a puah caah SAC ralkap 4 an thi, tiah Sunyeni PDF in ṭuanvo ngeitu nih a chim.
Cu bomb puahhnawhnak ah Sunyeni PDF(Red Falcon PDF) le Angpu peng Pah Kah Phah hna i bawm in kan puahhnawh hna caah SAC ralkap bokhat telh in 4 an thi, tiah Red Falcon PDF nih cathanh an chuah.
March ni 1 ah Makyipinkwin khua ah SAC ralkap leilawng ngan pakhat nih ralkap 23 a phurh hna i a thaizing zanlei cu Angpu peng in mizaw phurhnak leilawng nih ralkap a thimi le aa hliammi a phurh hna, tiah tualchung mi hna nih an chim.
