A Zanmang Ah Raltuk Ngol Dingin Pathian Nih Bia A Ruah (+VIDEO)
Pathian nih bia a ka ruah tiah a zanmang a chimmi kan lainu pakhat nih Kan raltuk ngol dingin a chimnak video a chuak, mah kongah Pastor Van Tha Kam Thang nih a siknak hi van zoh ve hmanh zeikhi dah na hmuh ning a si ve.
Video in zoh ve hmanh an chimmi ah hin zei leikap dah na zumh mi a si ve? Kan ral nih an kan thah cuahmah lio ah doh ve lo hi a phung si na ti maw? Asiloah, tuchan zong ah Pathian nih bia a ruah ve ko hna na ti dah? Na zumhning langhter ve? Video a tagbikah a um lai mu….
Salai Lungthli Tum Chinmi: ‘Pathian nih bia aka ruah’ tiah a chimtu hna cu thluak hman lo an si tiah Pastor(?) Van Tha Kam Thang nih a chimmi ka hmuh ve. A zumh lonak a langhter sawhsawh men si loin pastor nih pulpit cung hman ding ai dawh deuh lomi biafang tiang hmang in a thangchiat hna.
A ngai ngai ti ahcun, Pathian kong cu supernatural a si caah minung thluak nih theih dih khawh a si lo, evangelist hna nih an chimmi khi a dik khomi zong a si i lih zong a si kho ve, thluak hman lomi zong an i tel kho ve men ko hnga. Nain, Pathian kong cu Pathian lawng nih a theih dih khawh caah a thei dih ve bang ninghngal tuk in Pathian riantuantu hna thangchiat khi i sum deuh a tha lai, abik in pastor ai ti vemi nih cun.
Van Tha Kam Thang hi pastor a tuan te lai ka rak zum bal lo, aruang cu 2015 catial kai awt hnu in Facebook ah isiknak kip le i thangchiat nak poah ah midang a thuat hna nak comment tuletu ka hmuh zungzal. Keimah he kan i lo tuk ka ti tawn. Amah hi le Zammang Mualcin khi cu buai le sandah piah a huam phun an si i ‘activist’ rian deuh khi tuan te hna seh ti ka rak duh sak tuk hna nain atu cu pastor an tuan rua i a poi zet ka ti.
Relchap; Ka nulepa umnak inn ni 2 ka hrial tawn. Kei hi dohthlennak he pehtlaih in ca ka tial poah ah ka nulepa an umnak inn ah ni hnih hrawng tin loin ka um tawn. Ka tin sual ahcun ‘hi ca na tial ah zeidah a kan thahnem? Huat nai huahmi le thah ding thihphaih na ton lengmang mi lawng ai chap ko lo maw? Thinphang le ih nuam loin na kan tuah lengmang. Na kan daw rua lo. Voi zeizat dah dai tein um ko law tiah kan in chimh lai?’ tiin an ka sik tawn caah ka lung ai nuam ve lo i ni 2 tal ka hrial tawn hna cu asi.
A hlei in, ka nu khi lungthin zawtnak a ngeimi a si. Lungretheih nak a um poah ah rawl a ei duh ti lo, ai hngilh kho lo. Kei ca ka tial ah a zawtnak a zual deuh tawn. Keimah pumpak lei kap in thahnemnak pelte hmanh a um bal lo, sunghnak lawngte a si timi cu ka tial hlan hrim ah 100% fiang taktak in ka theih ciami a si ko.
Asi nain, ka unau hna nih tiva pakhat tan an timh, a thuk tuk, aho tal hmanh tiva ral an phan kho lai lo, tuan ah an kir lo ahcun an pam dih lai timi fiang tein ka hmuh khawh. A thuk ngai timi cu ka unau hna nih an thei lo, cu tiva ah ruak kawl in paw ai cawmmi tam deuh nih cun ‘a thuk lo, fawi tein nan tan khawh lai’ tiah an hlen hna. Ruak kawl awk tam deuh seh, phaisa tam deuh lut seh ti an duh caah a si. Cheukhat belte nih cun a thuk lo tiah an zumh taktak ve ruang ah dawtnak lungthin he tan ding thazaang an pek ve hna.
Cu tiva an tan ahcun an thi dih lai i tiva khuachia an hrang chin lai caah kan khua ram zong muihnak lei a panh chin lai timi kai fian tuk ko buin phuan loin dai tein hmur cip ding khi kai sum kho tawn lo, kai sum ah khin ka lungthin a baa tuk. ‘A thi ding khamhnak caan tha na ngei nain na khamh duh hna lo, kan khua ram a rawh cikcek nak hnga lo biadik na theih ko nain a caan a tlai tuk hlan ah na chim lai lo maw? Na miphun maw na dawt deuh lai, nangmah pumpak dah?’ timi ruahnak nih um thiam loin aka tuah. Hi ruang ah sunghnak a ngan tuk ko buin ka miphun le ka unau hna caah ka siaherhnak ka tial tawn hi a si.
Saya Van Ram Uk, Saya Tial Lian Thang le Saya David Lah hna nih nikum lei ah khan an siaherhnak an langhter bal ve. Fak tuk in doh an tong i an dai. Saya James Vannei Lian le Saya Rual Uk zong nih tlawmpal an chim ve. Ruahnak a bi deuhmi nih cun mihrut ah nan ruah men ko hna lai, nain tulio kan dirhmun ah cun khi bantuk biadik khi miphun nakin mah pumpak ai daw deuhmi hna nih an chim ngam lo, mah pumpak nakin miphun adaw kho deuhmi pasaltha lawng nih an chim ngammi a si. Crd; Salai LTT
