Atulio Chin miphun nih kan herh mi Hruaitu- Victor Khen Sang
A phi chuak (result) alangh hlan ahcun keimah tuah mi, keimah ta kan ti cio nain ruahchannak leng in “alettalam” in aphi ahung chuah ahcun nangmah tuah mi, nangmah ruang ah, ti i midang hei puh hman khi mi țhangcho kho lo ding hmelchunhnak asi.
Kan tuah bak mi cu țuanvo laak ngam ahau. Kan i ruahchan ning tein aphi achuah ahcun i lawmh chin chin ding, alettalam le kan i ruahchan ning ralkah in aphi a va chuah sual zong ah “keimah ruang ah, keimah tuah sualmi ruang bak ah asi ko” ti ngam fawn ding. Cu bantuk hruaitu cu Chinram le Chin miphun zong nih kan herh bik mi asi.
Chinram Raltuknak! Vulei cung ram kip hi ral an rak tho bal dih cio ngawt ko i thisen luannak, minung thihloh le khua le ram arawk bal cio dih mi tuanbia an ngei cio hna. Ral athawh paoh ah hin aruang cu daihnak kan duh ti ruang deuh ah asi dih ngawt fawn.
Cucaah raltuk tikah hin zungzal raltuk aum bal lo i adonghnak lei ahcun ateitu nih teinak in dihter asi lo le kaphnih biaruahnak in dihter asi deuh tawn. Cucaah raltukning zong hi sianginn kan kai i dot khat hnu dot khat in kan kai bantuk khin adot tete in raltukning hi akal țheo ve tawn. Daihnak ser tik zong ah dot khat hnu dot khat țhiamțhiam in kai i ser asi ve.
Atulio ralhrang pawl nih Chinram faak tuk in avun nam hi “Exit Strategy” timi “Faak Cem In Vun Tuk Pah In Chuahnak Kutka Kawlnak” khi asi i an thazaang dihlak in an vun kan nam hnu ah daihnak serpi an kan timh khi asi caah an ngian (Deception) hi țhatein kan tlaih lo ahcun hlan chan lio NCA bantuk ah khan tlaak kan fawi te.
NCA – Ceasefire Agreement – meithal khah ngolnak cu ram uknak tlaih aduhtu hna lei kap nih hlawknak (profit) tam deuh an hmuh paoh ahcun an hman mi hriamnam asi deuh peng fawn. Cucaah atulio ah hin ram pumpi, mipi vialte nih sining thazaang dihlak in rak diar-onh (National Defiance) aherh tak tak lio caan asi.
“Raltuk incun nan kan tei lai lo hih, asinain daihnak tu hi kan duh mi asi” timi hlennak faak an vun ser thluahmah lio mi ral mei-alh asi timi thei cio hna usih. Abik in hi hnu thla 3 chung cu Chin State le Sagaing Division chung ah hin ral mei-alh dan asang lai tiah ka zumhning asi.
Hriamnam he raltuk in teimi sinak in atuletu hlen khawh i teimi sinak hi alet tamtuk in afaak deuh mi asi lawng siloin salsinak in achuak thiam hrimhrim rih lomi sinak langhternak zong asi. Keep Fighting! By- Victor Khen Sang (Jan 30, 2022)
