Atulio Kan Ton Cuahmah Mi Kongah Hakha Circle Council Nih Thawngthanhnak An Van Tuah Cang, Uar An Um Kho Taktak Si
SAC ralkap nih Myanmar ram hramhram uknak a laak hnu in ramchung hmunkip ah tualchung mipi nih eiding, umnak, herhhai le pawcawmnak kong ah harnak a phunkip in ton cio a si.
Gangaw le Kalay lampi a pih lio a si ruang ah Hakha khuachung facang dawr ah mah duh paoh in facang cawk khawh a si ti lo pin ah, cheukhat facang dawr ah cun facang a dih cang caah dawr a kharmi zong an tam cang tiah theih a si.
Cucaah khuapau dohthlennak caan chung ah hin Hakha khuachung ah ngunkhuai khawlhnak(tax) laak rianṭuan lo ding le a hleihluat tuk in thil man kaiter lo ding in Hakha Circle Council nih April 19, ah thawngthanhnak le ralrinpeknak cathanh an chuah.
Cathanh chuahmi nawl a zul duh lomi hna cu Hakha Circle Council (HCC) nih phungning tein dantatnak kan in tuah hna lai tiah an cathanh chuahmi ah cun an langhter. Crd: The Chin Post
Magway ramṭhen, Myaing peng Magyikan khua ah SAC ralkap cu April 18 ah an lut i, sii aa thlop liomi mino 10 nak tlawm lo an thah hna pinah, tualchung mi 30 leng ralphaw hman ding ah an tlaih hna, tiah PDF nih an chim.
April 18, zing suimilam 11:00 hrawng ah SAC ralkap nih Magyikan khua cu Mi35 Helicopter pakhat in an kah pin ah, Mi17 Helicopter 2 nih ralkap an thlak hna i sii-inn ah sii aa thlopmi tarnu tarpa hna zong an tlaih hna. Sii aa thlop liomi a zaammi mino 10 nak tlawm lo zong an thah hna, tiah theih a si.
“SAC ralkap nih an thahmi hna chung ah kum 17 tluk tangkua siangngakchiapa ruak pakhat kan hmuh. Sii vialte zong an khangh dih. Mizaw khuaihlainak khaan zong an hrawh pin ah sii-inn hmai inn 4 zong a kang,” tiah PDF nih an chim.
SAC ralkap nih Magyikan khua cu vanlawng in an kah hnu ah sii-inn chung a ummi mizaw mino 10 hrawng an thah hna. Cheukhat cu an zaam i lamhlatpi a zaam kho lomi hna zong an thah hna. Thah a tongmi chung ah mizaw congtu hna zong an i tel, tiah theih a si.
SAC ralkap nih tualchung mi 30 tluk an tlaih hna caah hmunkhat ah an chiah hna i, an hrem hna. Magyikan khua ah SAC ralkap an um rih caah thawngpang fiang tein theih khawh a si rih lo, tiah theih a si. SAC nih cathanh an chuahmi ah cun pa 10 le nu 20 cu PDF he pehtlaihnak a ngei khomi an si caah ralkap nih an tlaih hna, tiah an thanh.
