Press "Enter" to skip to content

Australia Agriculture Visa (Lo Kal) Thawng Thar

30 September 2021 ni, a biakam bantuk tein tuanvo pek mi Department of Foreign Affairs and Trade (DFAT) nih Lo kal Visa (Agriculture Visa) he pehtlai in thawng a hun thanh than. Kan rak chim cang cia bang, ASEAN chungtel 10 a rak ti mi chung ah Kawlram telh a hung si in zaren nih thawng fiang hngahhlang mi Visa a si. ASEAN ram 10 tel ding in a thanh hnu ah adang ram 10 a telhchih than kha si, sinain nihin tiang ah Indonesia cozah lawng nih ceihkhanpinak a ngeih rih, cu zong biachah ngaingai a um kho rih lo.

Australia nih Lo Kal Visa a auh an ti cangka fawilaang tein umkal khawh a si, tiah cheukhat kan Laimi nih an rak chim. Thawng fiang a um hlan hmanh ah Hakha le Thantlang ah i chawk in tangka sing 50 nan kan pek cun kan in kalter khawh hna lai a ti mi zong an rak um. Cucaah a hnubik Cozah thawng thanhnak ka van thil nolh hi a si. Hi Visa tuahnak ah a herh mi kong ka rak tial mi (https://www.facebook.com/profile.php?id=100028127243234 bih) pin ah an chapchuan mi cu: zulhphung

DFAT nih a pehtlaih mi companies rian thiamnak a tlinh mi siloah tuan tinak hmun ah a tuan kho mi.
Australia nih English Language Codes a tuah mi ning in Number 2 (Well (E.g. can speak English well enough to deal with basic social and work situations) siloah Number 1 (Very well (eg. can speak English with little hesitation and few errors in most situations) tal a tlinh mi a si lai.

Chungkhar he ram chung a lut lai lo (Nupi tefa a ngei mi a si ko zong ah amah lawng a si lai tinak); riantuan ah a ra ding a si bantukin kum 21 nak niam lo a si lai.
Hi Visa hmuh khawh nakding ah tahfung sermi tampi lak ah, DFAT nih cohlan mi Temporary Activities Sponsor (TAS) nih auh mi a si lai; DFAT nih theihpi mi le cohlan mi a si lai; ngandamnak fahfung a tlinh pin ah, nun tuanbia dawh (tlaihkhih, biaceih zung phan tibantuk hma ngei lo mi) a ngei mi a si fawn lai; Australia ramchung a um chung ca a tawkza in Health Insurance a ngei mi a si lai.

Hi VISA cu minung rikhiah a ngei mi a si lai caah Australia cozah he hnatlaknak (agreement) a ngei mi ram hna he zohchun in minung lak ding a si. DFAT fahfung a tlinh i VISA pek mi hna cu, DFAT zulhphung bantukin rian latu siloah autu (Employers) nih thutdirnak vialte a tawlrelpiak hna lai; sinain kanmahte in kan i tawlrel ko lai an ti sic un, mahte in i tawlrel a herh lai. Theih ding mi cu, pulrai a kian dih lo caah, zeibantuk visa i tlaih in Australia luh na timh a si zong ah, pulrai he pehtlai in zulhphung nih nenhchih philh lo ding.

Nizan tihni ah Khualtlawng VISA in luh khawh a si cang lai, tiah thawng a thanh kha a si, sinain Victoria pengkulh haotu (Premier) nih cun Covid sii a voithumnak (Booster Vaccine) na chunh lo ahcun kan luhter lai lo, a ti diam. Chimh duh mi cu, hi bantuk tete in pengkulh cozah zulhphung aa khah lo caah, VISA na sok tikah na kalnak ding pengkulh cozah zulhphung zohchih lengmang a hau lai.
Agriculture Visa kong he pehtlai in April 2022 ah thawng fiang an thanh lai zumh a um a si caah, khi tikah tharchuah (update) kan van zuam than te lai. Credit; Salai Carson Twintwin

Be First to Comment

Leave a Reply

Your email address will not be published.