Bago-PDF Nih SAC Ralhrang Rallam Sialmi Bomb An Puah Hna, Thi An Tam

Nattalin Peng Ah SAC Ralkap Bomb Puah An Tong I SAC Ralkap 5 An Thi: Pago ramṭhen Nattalin peng Kuaikyi(ဂွေ့ကြီး) khua le Kyaukpioh (ကျောက်ပြုတ်) khua karlak ah SAC ralkap rallam sialmi hna cu April 23 zing sml 8:00 hrawng ah bomb kan puah hna, tiah Bago Region PDF nih an thanh. Tayarwaddy peng PDF Battalion 3801, Company 3 nih bomb cu an puahhnawh hna i SAC ralkap 5 an thi, hliam fak ngai a tuar mi zong an um, tiah cathanh an chuah.

“Bomb puah an ton hnu ah a pawngkam khua pawl cu cheknak an tuah hna i mino hrimhrim cu an chek tuk hna,” tiah tualchung mi pakhat nih a chim. April 22 lio zong ah Taungngu(တောင်ငူ) peng PDF, Battalion 3501 nih Sapacuai(စပါးကြွယ်) palik sakhan cu mei in an khangh, thlanglei SAC ralkap Camp i an zam mi Electric meitung zong an hrawh i, Mytel tung sakhan zong an hrawh, tiah kan theih. Cu Mytel tung an sakhan kahdohnak ah SAC ralkap leiin pakhat hliamhma a pu i, Taungngu peng PDF Battalion le a dang phufonh PDF hna nih gate sakhan pakhat an kah ṭhan i SAC ralkap lei in 2 an thi, tiah theih si. Crd; The Chin Post

Relchap; Myanmar ram pumpi in dohthlennak tuah hnu April 23, 2022 nikhat chung kahdohnak ah SAC ralkap 51an thi, tiah Yangon Khit Thit nih a thanh. Cazin ning ah SAC ralkap a thi mi hna hi Karenni peng Pharuso ah 3, Taningtharyi ramṭhen/ Myait peng ah 10, Boh Pin(ဘုတ်ပြင်း) peng ah 3, Mon ramkulh Yee peng ah 3, Sagaing ramṭhen Kalay ah 10, Tamu ah 15, Pago ramṭhen Nattalin(နတ်တလင်း) ah 5, Magwe ramṭhen Thilin(ထီးလင်း) ah 2, an dih lak 51 an si.

Wuntho Tu Peng Khuate 8 SAC Ralkap Nih An Khangh!: Sagaing ramṭhen, Wuntho(ဝန်းသို) peng khuate 8 SAC ralkap nih April 23 zaan ah an khangh, tiah tualchung mi nih an chim. Cu lak ah khuathum cu a khua ning piin a kaang dih, tiah Wuntho Revolution chungtel pakhat nih RFA ah a chim. “Zahan Sml 11:00 ah Sein Lay(စိမ်လည်) khua an khangh hmasa i, cu hnu cun Tapyi Thar(သပြေသာ), Shan Suh(ရှမ်းစု) lei kap an khangh.

Kawlin(ကောလင်း), Pinlaybu(ပင်လယ်ဘူး) le Wuntho khua ah ralkap a thi mi an tam caah hika lei kap khua hna an khanghnak hi a si, a rawk mi zat cu theih a si rih lo,” tiah a chim chap. Wuntho ah umhmun a khuar mi khah-mah-yiah(ခမရ) (111) SAC ralkap 50 tluk nih Sein Lay, Tapyi Thar, Shan Suh, Alaykhone(အလယ်ခုံ), Kyun Hla Khone(ကျွန်းလှခုံ), Aung Kone(အောင်ကုန်း), U Shit Khone(ဉသျှစ်ခုံ),

Kyout Poh khone(ကျောက်ပေါက်ခုံ) le Kyun Hla Khoe(ကျွန်းလှခုံ) khua lei ah SAC ralkap nih rallam an sial caah Wuntho thlanglei kap khuate 40 in tualchung mi 20,000 leng ral an zaam, tiah tualchung mi nih an chim. Data For Myanmar cazin ning ah 2021 February 1 in 2022 April 13 tiang ah SAC ralkap nih mipi inn an khangh mi hi inn 9,187 a si cang, tiah theih a si.