Press "Enter" to skip to content

Bethel Baptist Church Hakha I Pastor Rian In I Dinhnak

2021 February 1 ni thok in Bethel Pastor in rian kaa din cang, tiah thawng kan thanh hna. Rian kaa dinhnak a ruang bik cu Private Education Services kan tuanmi leiah caantling in tuan kaa timh caah a si.

2009 April 4 in Bethel Baptist Church ah Pastor in ka lut i nihin tiang ah kum 11 ka tuan ve cang. Khrihfabu nih an ka dawt i Pathian zong nih Khrihfabu hmangin thluachuah tampi a ka pek. Pathian min ka thangthat i Khrihfabu cungah kaa lawm.

2015 kum thok in kan miphun le ram caah siseh, ngakchia hna sersiamnak in Pathian sunparnak caah siseh, hawikom rual 10 nih Amazon Private School kan rak thok. Tangka hram tlawmpal cio kan thawh i a miak a um lo zongah amah tein sianginn a kal khawh ahcun a za ko, tiah pumpek in kan tuan cio. Ahohmanh thlahlawh kan la lo. Board of Director minung 3 chungah kei nih Managing Director tuanvo ka lak. Cuti cun kanmah le ti khawh ning cio in pum kan i pe.

Kei ka tuanvo hi a tam bik a si. Pathian lamhruainak thawng in nihin tiang ah kum 5 kan kal cang. Kan rian cu tlam a tling chin lengmang i rian a tam chin lengmang. Cucaah sianginn lei tu ah caantling in tuan ding biakhiahnak kan ngeihmi hi a si. Thla kan campi ve ulaw, Pathian a tih i nuncan ziaza a thami le miphun le ram caah siseh, Pathian sunpar pennak caah siseh, a thahnemmi bochannak tlak minung tampi kan ser khawh nakhnga Pathian tu nih lam kan hruai ko seh.

A ka dawtu le ka dawtmi Bethel Tipil Khrihfabu cu mitthli he ka dinhtak phot ko. Pathian nih umpi sehlaw a sunparnak caah hmang chin ko seh! Kei le ka chungkhar nih Khrihfabu cung i kan i lawmhnak hi kan techin fapar chan tiang kan philh lai lo. Kan i lawm tuk hringhran. Fimthiamnak rian kan tuanmi zong kan dirkamh ulaw Pathian nih miphun le ram caah thluachuah kan pekpiak ko seh! Upatnak he, Kam Lo

Be First to Comment

Leave a Reply

Your email address will not be published. Required fields are marked *