Breaking News: Atuhi Kan Ralkap Le SAC Ralkap Hna Cu Valung Khua Lonh Ah An I Kah Cuahmah Lio A Si E, Thlacamnak In Kan Ralkap Bawm Cio Hna Usih

#Breaking_News; Atu hi mipi ralkap hna le SAC ralhrang hna Valung khua lonh ah an i kahlio a si tiah theih a si.

Mipi ralkap hna an him nakhnga thlacam daithlang hna hlah usih… #CCN_Channel

Thawngdang Relchap; Uknak Lak Le CDM (Part 2) Nan dam ṭha hna maw, nau tiah biahram a van thawk hmasa. U Sui kan dam lio si nannih teh zeidah nan lawh tiah ka hei hal ve. Ka nau aw kan sining cu na theih ko kha, kan pa cu ihkhun cungin khoika hmanh cu kal kho hlah kaw a zawtnak ruang ah a zengmi cu a ihnak ah rawl pek le fimhlawm cu si peng ko, a dang ka fa le le keimah cu kan dam lio si ko tiah a ka leh.

Nau, bia dang pi ah chimhruah ding bia kan ngei, nifatin hi ka lungrethei in molh hnik kaa tim cang tiah a thawpi fak nawn in a chuah thawng cu phone chungin ka vun theih. Aw si maw? USui zeidah na ton rak ka chim ko tiah ka hei ti!

Kan sianginn ah hin a tam deuh cu CDM tuahmi an si, kei hi CDM ka tuah lo! ka tuah lonak a ruang zong na theihthiam ko lai nang nih cun, cozah ṭhat lio thlatin ka thlahlawh hmanh kha ka hmuhmi phaisa a cheunak tam deuh cu a pa si-ai ah hman peng cu si kaw ka fale 3 he kan eidin man hmanh hi harsatuk in kan nung va si kaw, atu ah hin CDM tuah ning law ka va hi ka mit lawng zoh sawhsawh in cun ka zoh kho lai lo ka ti i CDM ka tuah lo ee nau aw a ka ti.

CDM ka tuah lo ruangah hin aa daw tuk ko mi ka hawile le ka rian ṭuanṭi hawi nih an ka chawnhbiak ning le ka kong an ka ceihmi hi kaa theih dih ko ee, aw…. an mawh lo rak ka ceih ko hna seh , tulio kan ram sining ruangah CDM tuah lo hi cu an kan ceih zongah ceihphu kan si ko tiin ka hna kaa cheh, cuticun lungcan kaa pe i CDM tuah lo cun ka um ko.

Midang nih ka kong an ka ceihmi nakin CDM tuah kho dirhmun ka si ve lo mi nih ka ngaih a ka chiatter khun, hi uknak ṭha lo hi zeitin ka va ṭanh hlei hnga i ka duhbik hlei hnga mu, ka chungkhar sining nih a pek lo tuk pinah ka kong an ka ceih i a hrial in an ka hrialning ka zoh tikah ka ngeihchia tuk ee tiah duhsah tein a aw a dinter chin lengmang mi U Sui bia cu ka ngaih tikah ka lung a ṭha lo taktak.

SAC nih uknak a rak lak ka te ah cozah rianṭuantu hna nih hi uknak ṭhalo hi ka duh lo tiin CDM tuah a rak si ka te ah, U Sui nih cun phone a rak ka chawnh bal cang, culio zongah cun CDM rak tuah ve ko tiin tam tuk ka rak sawm bal.

Caan zeimawzat a rauh hnuah phone a ka chawnh i a tonmi thil a ka chimhruah ṭhan tikah na mawh lo ee ti leng zeihlei bia peh ding ka hngal ve ti lo , a sining vialte a ka chimh i ka theih ko bu ah zeitin dah keimah nih cun CDM tuah ve ko ka ti ngam hnga mu, a caah fangkhat hmanh bawm kho dirhmun ka si lo ti kaa fiang.

Ka nau aw CDM hi tuah ning law bawmhnak te zong cu a kan pe mi an um ko lai nain ahonidah thla tin cu ka pasal thlopnak sii-ai ca le kan ei-din ca he cun an kan bawmh khawh hnga. Chungkhat sahlawh nih le kan zawtfah le kan sii-ai ca a dihmi a tam tikah zoh hmanh ṭhaṭhi in an kan zoh kho ve lo cu.

Zei can a rauh lai ti a fiang lomi dohthlennak kongah hin kan chungkhar sining nih cun pe ve seh law mu hrial le ceihphai ton hau lo tein CDM cu ka tuah diam ko hnga ee! Asinain kan dirhmun nih a pek ve lomi cu zeititha, thangchiat le soiselnak bia phun phun cu sia ruah tuar bang kan tuar teh a hauh ko lai!

Cuticun ni le caan an liam i nikhat cu ruahlo piin U Sui nih Messanger in a ka call i ka nau CDM ka tuah ve cang ee a ka ti. An sining fiang tein ka theihmi a si caah ka khuaruah a har. A pehmi bia hna nih ka thinlung a ka suk i chunnitlak lung nuam loin a ka um ter. (Ka peh ṭhan te lai…) By. Anna Par (Journalist of The Chin Post)