Press "Enter" to skip to content

Breaking News! Chin Ralkap Pasaltha Pakhat Cu SAC Ralhrang Nih An Thah

Breaking News! SAC ralhrang kut in CNDF ralkap rawlchuang pakhat nunnak a liam, 2022 March 18. Chin National Defense Force (CNDF) Kalay camp an rawlchuang pakhat cu SAC ralhrang nih 2022 March 14 an tlaih i 2022 March 18 ah a ruak in an hmuh tiah theih a si.

CNDF ralkap rawlchuang pakhat a ruak an hmuhnak kong he pehtlai in, ” March 14 ahkhan khuachung lei ah thil cawk dingin a kal i SAC ralhrang nih an tlaih. An tlaih ni nganak ah aruak in hmuh a si. A ruak zong kan laak khawh. Anih hi Kalay peng camp pakhat ah kan ralkap pawl ca ah rawlchuangtu a si,” tiah CNDF rian ngeitu pakhat sin in thawng kan theih.

Atu nunnak liam mi pa hi an tlaih hnu ah an thah mi a si. Cun a min le a kum fiang in theih a si rih lo. Tuzarh chung lawng ah CNDF mipi ralkap in ram le miphun ca ah nunnak a pemi minung pathum an si cang. Credit; The Hakha Post

Kan ram le miphun Intuarnak kong Australia Prime Minister an ton, biaruahnak an ngeih, 2022 March 18 — Senator Dean Smith le MP Vince Connelly khuakhan lairelnak le tawlrelnak thawng in Australia Prime Minister Scott Morrison cu Australia um Ramkomh Kawlram pumpak le a bu in minung pariat nih March 17 (cawn nili) ah tonnak an ngeih tiah theih a si.

Kan ram le miphun harsatnak le intuarnak kong he pehtlai in kan Prime Minister cu kan ton, biaruahnak kan ngeih tiah, tonnak ah a telmi Australia Chin Federation in Chairman Pu Renny Ceu Lian Mang nih The Chinland Post ah a chim.

“Salai Ram Tinthei (Cungpi) nih SAC ralhrang ralkap nih hramhram in uknak an lak ruang ah kan miphun nih harsatnak a tong mi hi kanmah tein kum khat fai kan bawm cang hna, Australia cozah nih Humanitarian aid le a dangdang in bawmhnak ding pek ding ah a chim” tiah Pu Renny Ceu Lian Mang nih a chimchap.

Cun, amah Pu Renny lila nih cun, Prime Minister sin ah cun “Thlantlang khua cu ralhrang hna nih an kan khangh piak dih ruang ah Thlantlang khua cu kan chuah tak i Mizoram ramri ah ralzam dirhmun in kan miphun nih intuarnak kong le India cozah nih zeihmanh bawmhnak a kan pe lonak kong. Atu tiang ah, miphun unau a si mi Mizoram lawng nih an kan bawmhnak kong a chim.

Hi tonnak ah, Prime Minister Scott Morrison nih an chimmi chung in bialehnak le biahalnak a tuah mi hna chung in, a biapi cu 1. UNHCR nih an in bawm hna maw? 2. Chin ralzam pawl khuai ka dah an um? timi a si. Cun, Bawmhnak phaisa cu zeitin dah nan kuat hna? timi hi a hal chih hna tiah theih a si.

Palai a tongmi hna nih, UNHCR le Ramdang in NUG pawl sin in zeihmanh bawmhnak hmuh lo nak kong le Chin ralzam kan umnak hmunhma cu Map in tha tein kan hmuh sak. Atulio ah, Ramkomh Kawlram cozah bank hman awk a tha lo caah agency in bawmhnak phaisa cu kan kuat nak kong cu an chimh.

Senator Dean Smith nih Chin miphun cu hmunkhat te ah lungrual tein an miphun caah rian a tuan cuahmah mi miphun an si, amah lila zong Chinram ah voi hnih a phanhnak kong, atu an chimmi vialte hi cozah nih theihpi tlak le cherhchan awk atlak mi Chin Human Right Organisation (CHRO) nih a khomhsuatmi le a thanh (update) a tuahmi lawngte a si tiah a chimh.

Keimah pumpak zong CHRO nih an rak ka thanh lengmangmi a si, an rak ka pehtlaih lengmang tiah Prime Minister sin ahcun, Senator Dean Smith nih a chim. Senator Dean Smith nih cun, Kawlram kong ah Australia um Chin upa pawl le CHRO he tonbiaruahnak kan ngei cang, cun tuan deuh ah Chin ralzam pawl caah Malaysia UNHCR zong ka rak ton bal cang hna tiah Senator Dean Smith nih Prime Minister a chimh chap.

Cu kong he pehtlai in, Prime Minister nih “Chin miphun caan saupi na rak bawm ca hna ah kaa lawm tuk, keimah zong kan Biakinn nih bawmhnak kan kuat bal hna,” tiah a ti. MP Vince Connelly nih Local Burmese Community hna nih an har nak le an herhmi bawmhnak an kan halmi cu fakpi in na ruah piak hna lai tiah ka zumh tiah a chimh fawn.

Prime Minister Scott nih Kawlram kong ah policy [Australia] ngeihmi zoh than nak kaa zuam lai , Humanitarian Visa le Humanitarian aid kong he pehtlai in tuanvo ngeitu hna le Kawlram lei kong a thei mi le Kawlram zong ah Ambassador a tuan balmi le Kawlram kong ah ruahnak petu ka hal lai a tiah tonnak a kalmi palai hna sin ah a chim.
A hlei in, Prime Minister nih tutan bia kan i ruah nak hi thaizing kiptuh ah tuah kho cawlh mi a si lo, dot khat hnu dot khat ni tuah a hau mi a si.

Cun, hartong le Ralzam kong le a dangdang nan herhmi cu Senator Dean Smith le MP Vince Conaly sin ah rak chim hna uh law keimah le a dang tuanvo ngeitu hna sin ah an kan chimh than lai i data le update tuah khawh nak ding kan i zuam lai tiah Prime Minister nih a cahtak hna tiah theih a si. The Chinland Post

Be First to Comment

Leave a Reply

Your email address will not be published.