Breaking News; Chinram Hakha Le Thantlang Peng Lei Ah Raltuknak Vanlawng An Ra Cuahmah Than Cang Ee

Tu sml 4:04 PM ah Mi-Mi35 pakhat le Mi -17 pahnih Chinram lei hoih ah an hun zuan lio si tiah kan theih.

Vanlawng zawnzam cu a dik bak ti awk ttha dih lo,a ruang cu hmundang tbk ah an i mer tthan tawn caah a diklo rumro hun post silo kha nan ka theihhiam nak lai kan nawl hna. Credit; Salai William Hlawnceu,

A ngai ngai ti ahcun, Pathian kong cu supernatural a si caah minung thluak nih theih dih khawh a si lo, evangelist hna nih an chimmi khi a dik khomi zong a si i lih zong a si kho ve, thluak hman lomi zong an i tel kho ve men ko hnga. Nain, Pathian kong cu Pathian lawng nih a theih dih khawh caah a thei dih ve bang ninghngal tuk in Pathian riantuantu hna thangchiat khi i sum deuh a tha lai, abik in pastor ai ti vemi nih cun.

Van Tha Kam Thang hi pastor a tuan te lai ka rak zum bal lo, aruang cu 2015 catial kai awt hnu in Facebook ah isiknak kip le i thangchiat nak poah ah midang a thuat hna nak comment tuletu ka hmuh zungzal. Keimah he kan i lo tuk ka ti tawn. Amah hi le Zammang Mualcin khi cu buai le sandah piah a huam phun an si i ‘activist’ rian deuh khi tuan te hna seh ti ka rak duh sak tuk hna nain atu cu pastor an tuan rua i a poi zet ka ti. By- Salai LTT

Martial Law: ‘warning’ pek um loin kah khawh kan si cang lai. India sianghleiruun ka kainak Chennai in 2011, April thla ah Hakha ka rak tlung. Manipur khualipi Imphal-Tamu-Kalay-Hakha tiin ka rak kal. Imphal ah cun ka rak phan i Laitlang he ai lawhnak a tam pah, a thli a thiang i a kik pah fawn caah a nuam ngai. Nain, lampawng kip ah India ralkap nih an uniform le an meithal tihnung he hmunhma an lak dih. Chikhat te cu ka khuaruahhar pah ve.

Mah zaan cu vanlawng kai citnak ka ba pah caah ka zau i duhsah in zaan riah ei kai tim. Kala ram sianginn ka kainak Chennai le Delhi bantuk khin ka ruah i zaan tim zong ah aleng chuah in rawl ei a ngah ko lai tiin ka rak ruah. 9pm hrawng cun hnangam ngai in rawl ei ding ka chuak.

Ka rianhnak hotel pawngkam cu an daithup ko, ai chawkmi minung hmuh awk an um lo. Mithla or zombie khua dara ka phan ti tluk khin a king. Hotel riantuantu ka hal hna i Imphal ahcun India ralkap nih zaan ah a vakmi hna kha ‘tapung’ ah an ruahsual hna i an kah sual lengmang hna, hi ruang ah zaan ah a leng chuah kan tih cionak a si aka ti. Cule cangka cun leklak ka lut than ve, zaan riah caah changreu lawng ka ei.

Cuhnu cun, Imphal i mi sawhsawh thah an ton lengmang nak article le news tampi online in ka kawl i ka rel. Kei ka phak hlan ni 2 ah zuu a rimi pakhat cu a ke in inn a tinnak ah India ralkap (Assam Riffles) nih an kah i a thi.

Cubantuk kahsualnak cu Manipur le Nagaland ah voi tamtuk a chuak sual cang. Nikum zong kha Nagaland ah riantuan nak in a tinmi Naga mino 15 bak India ralkap nih ‘hriamtlai phu’ ah an ruah hna i an thah sual hna. A kaptu India ralkap hna cu phung ning tein taza an cuai than ve hna.

MAH zong nih Myanmar ram chung myone 330 lakah 37 hi daihnak a um rih lo a ti caah ralkap nih a herh ning control ding nawl a chuah. Martial Law thanhnak hmun ah cun 2008 Constitution nih a kan pekmi pumpak covo te hmanh kha a um ti lo. Ralkap nih a herh an ti ning poah in zulhphung an ser lai. Ralkap nih bia an ceih dih lai.

Thihdan tiang kan pek lai an ti. Ralkap nih mi sawhsawh an thah sual zong ah bia ceih piak le dantat an tonnak ding lam a har chin, an duh ning in minung thahnak nawl an ngei deuh cang lai tinak khi a si.

Tuzaan kha Falam ah 6pm in zinglei 5am tiang aleng chuah lo ding order an chuah cang. Hakha le hmundang zong ah an chuah colh ve lai.

Zaan ah aleng chuah sual ahcun ruak in inn tin than a fawi tuk cang lai, Hakha ah cun kah an ton a tam pah caah zaan ah an hmuhmi poah kah colh khawh an i zuam te kho. India ram i Manipur state le Nagaland state khi kan hluan te men lai, Delhi te pawl Kala khuapi dang vialte ah cun meithal thawng hmanh theih bal a si lo nain.

Yangon le Mandalay te pawl ah cun 12:00AM- 04:00AM leng chuah lo ding an ti nain kei cu a herh caan ah cun 2AM zong ah inn ka tin tawn ko. Voi tam deuh cu check zong a um lo. Palek nih a chel caan an kan check sual hmanh ah kah colh a si lo, an kan dirter i biahnalnak kha tha tein kan leh ko hna ahcun harnak pek a um bal lo.

Nain, Martial Law an thanhnak khua ah cun dir ter hmasa le biahal hmasa loin kahnak nawl an ngei lai caah mipi i ralrin a herh khun te lai. By- Salai LTT