Press "Enter" to skip to content

Breaking News! Falam Le Hakha Kar Kahdohnak A Fak, CDF-Thantlang In Salai Tha Hlei Sang Nih Ram Le Miphun Caah A Nun A Pek Ve Ee!

Falam le Hakha karah an i kah cuahmah lio a si than ee! Tuzing kahdohnak ah CNA ralkap Salai Thawng Hup Lian le CDF-Thantlang ralkap Salai Thawng Tha Peng nih ram le miphun caah an nunnak an pek! Mah kahdohnak cu a zual hma chin lengmang ee, CDF-Thangtlang in Salai Tha Hlei Sang nih ram le miphun caah a nunnak a pek ve ee! SAC ralhrang nih CDF-CNA an kulh hna lio a si tiah neihniam min langhter lo mi sin in theih a si tthan ee! A poi tuk ee, thlacamnak in bawm hna usih. Crd:

Relchap; Mi Firkhut Rual Nih Hruai Mi Paucan Dohthlennak Asilo Abiapi Ngai. Democracy thawtnamnak cu Mipi nih kum (10) chung kan tep ve. Eihmur le ziknawk nih anmah le chungkhar, sahlawh rumnak caah a thawt ning cu; Uktu Luban vialte nih an tep bak ve. USDP le Rallokap Luban hna cu Hmuhko na rawraw in an fir. NLD Luban rualcu langhhang bakin an fir, an ei caah mi firkhut bak ansiko. Cucaah Democracy chan kum (10) ah cozah Luban a ṭuan bal mi nih Paucan Dohthlennak hi an hruai lo ah a ṭhabik ko.

Mi fir vuanci le Luban asi tiah Chin Mikip nih theihhngalh mi nu / mipa zong nih Paucan Dohthlennak hi an hruai lo ah a ṭha. Keimah ruangah Dohthlennak a khulnuar I, hnu a pilh ding asi ahcun, a dang nih hung kan hruai uh ti hna hlahseh, mah tein I din hna sehlaw, dai tein um hnaseh, Mifir an si kha an I hngalh buin Paucan Dohthlennak ah Hruaitu Upa I cuh ti hna hlahseh. NLD Luban mi firkhut an si nak cu Amay Suu bia roling in hngalh khawh asi. A fir mi le corruption mi Vuanci le Luban hi ziah na phuak hna lo tiah, mino nih an hal tikah, Keimah lawng in maw ka tang kun ne lai, Keimah lawng in ram hruai khawh asilo caah rak kan theihthiam ko uh tiah Amay Suu nih a leh hna. Keimah Bia asilo hi mu.

Zei bantuk cozah an kai zong ah a kal sual mi phun hnih an um. Cozah cu ahopoah nih kai sehlaw, hruai koseh, Keimah rian asi lo I, kaa ceih fawn lo ati tu an um Bantukin, Cozah cu aduh mi nih kai in ṭuan ko hnaseh, kanmah tein kan ṭuan lawng ah kan kut man kan ei lai atitu zong um thotho asi. Phukhat nih an ti ve mi cu “Cozah an ṭha lawngah kan zapi tein kan ṭhancho lai, kan rum lai” ti asi. Ka phan bal mi ram poah ah alamkip in a tling mi cozah le ram an um rihlo nain, Kawlram tluk in Ralhrang nih an uk mi Uknak chiakha belte kan hmuh bal rih hna lo. Kawlram uktu tluk in a chiakha mi le a thluak a ṭhatlo mi an um rih lo.

Ramrum le ram ṭhancho an ti mi tampi ah ka um bal. Cu ka ram hna zong ah Innlo le rian ngeih loin an vakvai mi thahcawk lo ansi. Rithai sii le zukhmawm ahmang mi relcawk lo an si ve ko. Tangka chut hmang le fir hmang zong an tam pi bak ve ko. Mi sifah hrimhrim tampi ka mit in ka hmuh ko hna. Cucaah Cozah an ṭha ko ahcun timi bia hi adik tawn lo ka ti cang. Cozah ṭha nih a hram lawng an kan bawmh khawh, asan nak lei kai awk ah hlei an kan tunh piak khawh. Rum le siṭhat duh ahcun mah tein cawlhcang aherh bak ko. Ramṭha bik ah aum mi si ko hmanh usih law, thathut zangzel mi, rian aazuam lomi, tuaktan loin duhtlawng in anung mi hna cu, an sifah thotho ko.

Aduh nih cozah si koseh, kaa ceih lo timi Theory hi Democracy ah apuitling cang mi ram caah a si phum ko hnga? A hman an ti khawh men ko. Nain adik mi Theory asilo. Bianabia: American ah Trump a kai ah siseh, Biden a kai ah siseh, Mipi caah thlennak cutluk pi in an tuah khawh cio lo. Mipi zong cu tlukin an I thlen kan hmuh lemlo. Tamada pa a thluak a chiat tuk I, zei san tlaih lo a va si zong ah, Phungphai le upadi a ṭha tuk hrinhran in a puitling mi Upadi asi caah, cu upadi nih Tamada le mipi he a khumzual hna. A hran le a hram a fek cang mi ram an si Bantukin, Mirum si awk ah Trump le Biden cung ah aahngat lo. Mah tein I zuam cukmah nak tu ah aa hngat deuh mi asi.

A ṭhancho lo tuk mi le Democracy a fekfuan rih lo mi Kawlram caah, cozah ṭha an kai hi abiapit cem mi asi. Cozah le Luban rual nih cozah phaisa kha ningcang loin an hmang I an ei ahcun, kanram a ṭhancho khawh ve bak lo. Fimcawnnak phaisa an vaivuan in an eihmur ahcun, rampi fimthiam nak a tlu bak ve. A ril bak ko zalam tlang ah. Sehhmuh lei phaisa an eihmur tikah Sehhmuh ram ah I thlen khawh ve lo in, lothlawh mi ka si ve bak ko. Ramdang investment tampi lut awk ah, lampi, hlei, innlo hna ṭha tein le fel tein kan sak I kan remh lo tikah,

Ramdang Sipuazi tama le company tampi an ra duh ve tilo. Alamkip in fir le eihmur asi tikah, rampi le mipi ṭhanchonak, siṭhatnak caah, Ngunsawm viatle liangluan cu kut thuamkhat zat asimi Luban lubo rual caa lawng ah an si dih thlu. Anmah ruang ah Ram le mipi cu Sifahnak khawr ah zungzal nunchung tlak asi cang. Apoi tuk ti cio asi. Cozah nih rianṭuan awk hmuhhma le rian tampi an sersiam khawh lo tikah, Rian ngeih lo kan tam chinchin, Mah nih I zuam duh zong ah, ṭuannak nawl kan hmuhco khawh tilo. Eihmur le Ziknawk cu chim hlah, Rampi Ngunsawm hmannak mumal aa ningcang lo tikah, harsatnak a tawn mi cu Mipi thotho kan si.

Ram rum le ram ṭhancho ahcun, mah I zuamnak in rum khawh asi ko nain, Kawlram ahcun kan I zuam tluk in hlawhtlin asi lo. Fir lo le eihmur lo ah rum khawh asi lo timi Theory chiakha taktak mi he I ciah asi. Dinfel tuk ahcun rum khawh asi lo timi mumal cu kwalram ah aa zelh cang. Kawlram Ramkhel Nunphung thar ah aa chuak bak ve. Fimthiam nak le zuamnak ah, I tluk ko hmanh sehlaw, ram ṭhancho cu Kawlram nakin, an ruam a fawi deuh tuk. Kawlram cu mi firkhut rual le Thluak ngeih lo hna ni kum tampi uk mi kan si caah, dinfel nak in rum khawh asi ti lo timi Theory tu A LAL cang. Cucu Cawimawi cio asi, uktu Luban le hruaitu asi bak mi kip nih. Cucaah, Ramdang in kuat mi le CDF caah kuat mi phaisa poah poah an vaivuan I an fir lengmang nak hi asi. Kawlram ahcun fir lo ahcun timi hi Kan nunphung bantuk asi cang. Keimah lawng a fir ka silo, a mikip le Bawitlang kip nih fir cio asi ko hen cu kan ti salam rih. Ngaichiat a va si dah.

Cozah ṭhat lo lawng lawng nih uk zungzal mi kan si tikah, Sipuazi tuah aduh lomi, a tuah thiam lomi le eihmur aduh lomi cozah rianṭuan tu hna cu an sifak bak ve. Eihmur zia a thiam tukmi Upa Luban Lubo rual hna cu Sipuazi tuah bak loin, hmakhat te ah mirum an si cawlh lengmang. Thluak ngeih lo le cozah ṭhalo nih uktu le an Hawikom vialte rumnak aphawrh hna nain, Mipi kan si fak chinchin ve. Rampi phaisa cu uktu le an minung hna zal ah khumh in chiah zungzal asi caah, rampi ṭhancho nak lam a pit bak ve. Rampi eihmur tu an tam chinchin tikah, Mipi cu Sifahnak in kan i hlihphuah khawh ti ve lo. Fimnak, thiamnak, Ngandamnak le Sipuazi tbk in alamkip in an kan bawmh lo I an kan chanchuah lo tikah, Mipi le ṭhancho nak cu kan I hlat tuk cang. Van le Vawlei tlukin aa hlat cang ve. Ṭhancho nak timi hi kan chanchung ah aum ve hnga maw tiah mipi cu ka vuivai dih cang.

Cucaah Cozah a ṭuan mi paoh poah cu Kanmah Kawlram mi le CHIN MI he aa pehtlaih mi bak asi caah, kan I ceih tuk palia tihi Kawlram Ramkhel a tuah tu vialte nih hngalh a herh ngaingai. Mipi loin asikhawh bak lomi Kawlram dirhhmun asi. Mi firkhut hna pupit an phan ah siseh, Thluak ngeih lo mi hna (MAH le Rallokap bantuk pawl) Ram Pulpit ah an phan deuh deuh tikah, rampi kan si a fak chin chin ti hi hngalh ko ahcun, Ralhrang MAH kan doh hi adik mi tiah hngalh cawlh asi ve. MAH ka doh lailo ti cu Ramkhel ah ngakchia le mi molh, fangkhat tlin lo mi hruaitu le pengtlang kansi zong kha mah tein I hngalh bak ding. Bianabia, ZRA le MDF bantuk rual hi cu Ralhrang MAH caah nawnṭha le Vawlei ṭha an si.

Mi firkhut uktu Luban rual cu Rampi le mipi Ukhruainak pulpit in an ṭum duh lo ahcun mipi nih ṭhumh awk ah rian lianpi kan ngei. An duh lo ahcun an ban in rawt in Vawlei ah ril ko in hnuk in thlak ding bak ansi. Mi firkhut cozah le Luban kan herh lo Bantukin, Paucan Dohthlennak ah siseh, CNF/ CDF hruaitu le Luban rual ah siseh, CDM bawmhnak, CDF bawmhnak, le adang bawmhnak rian ah siseh, hlan ah a firkhut mi le a fir balmi, tutan ah a fir ko tiah kan theihhngalh mi upa Luban vialte cu nan rian in mah tein nan I dinh nak lai dawtnak le zawnruahnak he caa kan kuat hna. Crd; Zingtincuai Cinzah

Be First to Comment

Leave a Reply

Your email address will not be published.