Press "Enter" to skip to content

Breaking News. Halkha cung in SAC ralkap Jet Fighter Raltuk Nak Vanlawng A Zuang Ee

Breaking News. Halkha cung in Aug 13 zan sml 10:03pm ah Jet Fighter raltuk nak vanlawng a zuang. A thawngpang cu a sang tuk in a zuang lo timi a aw in theih khawh a si i, chum a tam tuk caah a mui a lang kho lo. Mizoram ramri tiang a zuang.

Mah vanlawng hi Timit lei kahdohnak ah ralhrang an dirhmun a chiat ngai caah raltuknak vanlawng bawmh an hal tiah theih si. Credit; Salai William Hlawnceu

Thawngdang Relchap>>>>>><<<<<< MYANMAR RALZAAM KUAT THAN DINGIN RALHRANG LE INDIA CAIHNAK NGEI. Lawngtlai, 12 Hniang 2022 : Myanmar ram ah ralhrang nih nawlngeihnak an lak hnu in, inn le lo chuahtak ruangmang in Mizoram ah aa dormi ralzaam mizapi hna kuat than dingin Myanmar ralhrang le India caihhmainak an ngei tiah cazuang pholanghmi ah langhter a si.

Ralhrang Foreign Affair Minister U Wana Maung Lwin nih 5 Hniang nithla khenh in ralhrang zungah a kuatmi catlap chungah Myanmar ram lei in India ram lei ah a lutmi hna, phungning loin a țhudirmi hna thawngpang a um ahcun Myanmar lei ah thawngpang țhanh dingin Foreign Affair Ministry, Myanmar – India palai hna 26 Chiapa ah tonnak an ngei.

Hi kongkau he pehtlai in Myanmar ralzaam kuat thannak ding kong ah, Mizoram cozah nih Kolkata ah a ummi Myanmar Consular zung ah theihternak ca a kuat tiah an langhter.

Mizoram cozah nih cakuat an țialmi i an langhtermi cu Myanmar ram humhimnak sining ruangah umhmun zaamtak mi Myanmar mi an nun hunhim ding a herh caah, an umnak i kuat than ding cu thil si kho a si lo, an nunhimnak ding le a dang a herh baumi bawmhchanhnak an herh tiah an langhter.

Myanmar ram ah 1 Nohawng 2021 i ralhrang nih nawlngeihnak an lak hnu in Myanmar ramkulh le ramthen in minung nunhimnak ding caah India ram nichuahlei Mizoram ramkulh ah i dor in an zaam hna.

India ram hi ralzaam kong ah minthutnak a tuahmi a si lo caah Mizoram i aa dormi hna cu khirh hna dingin nawl a rak chuah ko nain Mizoram cozah nih a cohlang nenmam lo.

Cun Mizoram Chief Minister Pu Zoramthanga nih kan ramchung i a rak i dormi ralzaam hna cu an umnak ah kuatthan an si lai lo tiah India Centre cozah sinah lehnak a tuah i, nihin tiang ah Mizoram ramchung ah ralzaam camp sakthar mi a um peng.

Mizoram cozah nih Myanmar Consular zung ah theihternak ca a kuat le kuat lo Mizoram cozah lei nih thanhmi a um lo. rd; The Lairam Times

FEDERAL LO RIAN AH ( HMUHNING) ✍ Iang Ngei Lairam. The Lairam Times. Nihin Laimi nih kan ton mi kan rian va ti ko ning law, kan tonmi harnak kan ti ahcun huatu Min Aung Hlaing diriamnak bia fang ah a can lai caah, kan ton cuahmah mi hi a harnak lei siloin kan rian, kan pipu nih an kan roh mi Federal lo (dum) rian, kan lo hma chuak kan tuan hrimhrim ding a si ti kan hngalh khawh ahcun cucu Federal lungput cu a si ko.

Kan pipu hna nih taam haalnak an ton caan ah “Pasal rawltam lo kau thlo, nupi rawltam Bel lian khing” ti’n thazaang an i pe tawn. Innchungkhar pabik nih teimak chuah in, Lo kau pi a tuah (thlawh) ahcun, Fikfa, Cangvat, nilinh, ruahsur, i tuksah hliam, harnak tampi a tuar a in ti cu a fiang ko. Asinain a chungkhar a dawtnak le ka rian, ka tuan ding hrimhrim a si tiah Lo kaupi a thlawh (tuan) nak a ruang a hngalh fian caah hlawhtlinnak a hmu tawn. Vanchiat ton ah thih lohnak tong hmanhsehlaw a chungkhar cu pawkhim, rilkhim tein a roh ta tawn hna.

Cu bantukin Federal thlum-alnak tamhaal in pasal rawltaam Lo kau thlo lungput he Federal Lo chungah fanu fapa zei mawzat nih harnak tampi tuar hnuah mual an kan liamtak. Zuuntuar chungkhar unau hna zei ti hnemh zia kan in thiam hna lo, a poi tuk ti hlei cun, asinain techin fapar duhtlinnak ca Federal ramthar chanthlengtu an sinak cu Laimi phun thinlung ro catlap ah thitchih an si.

Keimah zong hi chungkhar ka dirh in 2021 February 1 tiang cu pumpak chungkhar caah pasal rawltam Lo kau thlo lungput in chaw ka kawl, rian fak pi ka tuan. Tlakrawh inn tha le dawr khaan tha mawtaw hna le thilman sung he ka nupi le ka fale hna an kut dong le an ban pawr tiang, an hngawng cungah cer dikdek in ngunpar cuang tiang ka hlawh a tling. Pathian thluachuah ka hmu tiin hnangam ngai in khua ka sa ve.

Kum 2021 February 1 in ka tlakrawh inn le ka dawrkhaan hna, ka ngeihmi thil mansung hna cu ralhrang kut le kaa chung an phak tikah lungfak, lungkuai in khua zaza ka ruat. Cu lio ahcun, Lairam fingtlang cung in Fedaral authawng cu a hong thang. A bia cu; maw Lairam hrin farual hna, Lairam ah Federal Thantar a dir ta lo ahcun nan ngeihmi thil vialte hna cu ralhrang caah nan khon a si. Kan Lairam luatnak caah, himnak caah cun Federal Lo (duum) rian tu hi tuan hmasa cang ti authawng a si.

Cu ni thawk cun a liamcia caan hmannak ah Federal Lo (duum) ca i ka nun ka hman lo ning le zei ah ka rak rello mi ka van ruah tik ahcun Federal ram caah ka caan ka rak pek lo mi cu kan innchungkhar ka dawtlo pei a rak si hi tiah ka lung a hong pem. Federal hi 2021 February 1 in ai thawk mi a si tung lo. An pei ralhrang nih Lairam a einak le a dolhnak cu kum 70 leng pei a si cang hi, kum 70 renglo hringtu kan nu Lairam nih cun fahnak tuar in a hrin farual caah nusal ti’n a dir peng ko mu ka ti.

Nikhat cu, CNA/CNA nih an rak tuhmi Federal thlalang cu ka van i bih, thlalang nih cun taza a ka cuai i hi ti hin ka nun a ka hmuhter:
A) Lai miphun himnak Federal. B)Kan ngeihmi thil himnak Federal. C)Arti bung le mei cung sapherh himnak Federal. D)Fanu le fapa, kan biaknak himnak Federal. E)Techin fapar duhtlinnak ca Federal tiin,

“ka pumpak ca, ka chungkhar ca lawng ruat in ka tuan ka kawl nain Federal thantar kan Lairam ah a dir lo le Federal Lo rian ka tuan hmasat lo ahcun ka ngeihmi thil vialte hna hi an donghnak cu ralhrang kaa chung ah a si thiamthiam tihi a si.” A liamcia ka nun ahcun CNF/CNA hna hi zei ah ka rel lem hna lo, san an tlai lo,

zeihmanh an si lo tiin an thang ka chiat tawn hna. Chawnva ka bawmhmi hna hmaihngal in kan duhning in um ter, si ter, tlangtlak, le an rian ah i sawhkalh ngai in ka um. Ka bawmh mi hna tangka hi ningcang loin an hman ti ah Online in ninghngal ngai in an kong ka chim rel tawn. Asinain CNF/CNA kong ka ruah caan paoh ah hi thil hna hi an hong lang ve tawn;

ka ngaidi inn Camphio inn ah, Saphaw tang phah Sahmul puan ah, Lo thlo dirhmun ramkip cul tiang, nung za tlem lo ngun siang cung tiang, ngunsawm tawhfung Hello number, Ke khuallam cu thut hmun khuallam, arthin tuh ah Siapi kikawng
ruak thlah zaan rawl Dollar hang runh.

CNA, CDF cu uniform le hriamnam ah an tlinglo, Lairam dawtnak Federal ramthar caah lungthin, nun zia, dinnak le zumhtlak nun ah hram a bunh mi a si. Cucaah uniform, hriamnam kan i tlaih lo zong ah zumhtlak nun le dinfelnak he Federal ramthar dirhnak caah Laimi phun kan dihlakin CNA, CDF kan si dih timi lungput he lungkhat anruang tein kan dirpi hna i kan tuanpi hna ahcun kan Lairam ah federal thei thlum cu kan zuun ko lai.

Exo. 17:8-16 ah Joshua nih Amalek ral a tuk, Moses nih ban kutthlir in thla a cam. Aron le Hur nih Moses ban an domh piak, Moses le Aron le Hur cu ral dotu ralkap an si lo. Uniform i hruh in hriamnam zong an ngei lo, asinain Joshua nih Amalek ral a tei nak ah a biapi cem mi an si.

CNA, CDF nih teinak an hmuh nakhnga a biapi cem mi cu Laimi kan phun ning in Pathian bochan bu in kan tuan ti ahcun kan Pathian nih kan Lairam ah kan tum federal thantar cu a kan phun piak ko lai. Moses nih a kut a thlir khawh leng tiang in a thlir bang in Lairam caah kan ti khawh leng tiang hnek deuh in thlacam le tuan ti kan herh ko. Nan dawtmi Federal fahniang, Iang Ngei Lairam

Be First to Comment

Leave a Reply

Your email address will not be published. Required fields are marked *